［中銀香港一季走咗325億存款喎］不過業績，好似仲係幾好
埃汾抱恙（唔係點會咁早寫文），快手寫完快手訓。仲要返工（唔使做咩，你養我？）
中銀香港（2388）業績在此（http://bit.ly/331aioK）
1. 嚴格嚟講唔係業績，香港公司唔需要一定出季度業績，而呢份嘢冇最重要嘅嘢—純利，所以其實唔係完整業績
2. 先講你地最關心嘅嘢。食拉麵梗係睇冰水，睇年報梗係睇人地幾錢人工，咁睇中銀梗係睇存款。仲有乜好睇。
3. 想當年（證明而家一事無成），阿叔由中國銀行都未撚上市已經開始睇中銀香港。真係見佢管理層嗰啲睇，唔係在屋企睇許志安食女嗰啲睇。知你地想要乜啦。
4. 冇標題黨，9月尾存款19,857億（其實係咩概念？），6月尾20,182億。一季冇咁325億。呢個數甚至係低過3月尾時，不過仲係高過舊年年尾5%
5. 但其實，325億存款好似好多錢，講緊，1.6%。
6. 9月金管局嘅大數未出（10月31號出），冇得相比
7. 不過，其實匯豐，第二季嘅存款都係跌嘅，但當然只係微不足道，其實係持平。當然固執撚可以堅持跌一蚊都係跌，隨你。
8. 咁我當然係講匯豐香港，蘋果對蘋果嘛。渣打？有數，但冇拆香港存款出嚟，冇得比。
9. 但又話時話，其實中銀香港有堆東南亞業務，轉埋港紙計埋入嚟的。以前係老母（中國銀行），早幾年賣畀個仔。斬埋都佔佢大約5%
10. 中銀香在東南亞8個國家有業務（其實東南亞有幾多國家咁大把？計東盟咪十國）。Comment 有張圖就係早幾個月我在柬埔寨影的，暹粒都有2388呀！唔止金邊有。清清楚楚寫住中國銀行（香港）。唔係中國銀行
11. 本人一路主觀認為老母的老母（中國政府）係想將中銀香港，在東南亞整到可以同星展渣打之類抗衡（所以一路有講法話星展會同渣打合併，反正淡馬錫係共同股東）。用香港牌頭亦係方便做嘢，白手套是也。
12. 講返中銀香港。冇咗325億存款，又如何？等於踢波咁，你講乜控球射門乜都假，贏定輸丫？業績一樣，話知你存款升定跌，純利點先得丫？答案係，唔知，都話季度冇出
13. 不過要睇蛛絲螞跡小強腳毛都係睇到的。九個月「提取減值準備前的經營溢利」盛惠港紙326億，較去年同期上升7.3%
14. 呢個「」一抽咁長嘅嘢，即係乜？英文簡稱叫PPOP，讀作P-POP（K-POP啲朋友），pre provision operating profit 是也。
15. 仲唔知係乜嘅，好簡單啫，銀行點運作？咪借錢出街有利息收，但要畀利息存戶同埋同業拆借，加埋啲非利息收入（中銀香港嘅股票佣金收入好Q大舊 ），自己坐盤炒房嘅收入，仲有保險嗰塊（唔係間間銀行有，冇就冇咁煩）。然後減走交租出糧燈油火蠟嘅開支。呢堆嘢加埋晒，就係PPOP
16. 咁仲爭咁啲乜？PPOP都話pre provision，未計貸款減值咯。仲有，未計交稅。
17. 好啦，個PPOP靚唔靚仔？睇唔到分析員估幾多，彭博都只係得全年嘅數。不過都仲係大約睇到，應該係幾好嘅
18. 首先，九個月個PPOP按年升7.3%。Per se唔代表乜，但半年比半年，即係上次中期業績時，大約係6.8%，即係加速緊
19. 而你睇單季度，第三季PPOP亦都比第二季有增長2.3%。
20. 見到大摩（http://bit.ly/2NsS6Ov）估個PPOP按季跌，結果係升嘅。
21. 再睇落去，銀行最重要嘅，凈息差。按年升10點子（0.1厘），按季升1點子。Er，資金成本好似冇大升喎
22. 咁冇講純利喎，會唔會撥備完蝕錢煲爆架？事實唔係今次身有屎講，一直以嚟（即係，由我睇以嚟，歷史由我開始，但都十幾年啦）季度業績都唔講純利。但有講撥備的，第三4億，其實少過第二季。堅持下季爆煲嘅請便，反正下季未爆煲可以講下年，下年未爆可以講下下年。
23. 其實講返，少啲存款，「銀行利息開支咪仲少咗咯」，有利業績添。所以真係懲罰中銀應該存錢入去要佢畀利息你先係呀
24. 當然以上只係八奇式亂講，梗係唔係咁啦，如果係咁嘅銀行應該日日打嚟叫你拎走啲存款啦。
25. 銀行係高度槓杆嘅行業，中銀香港講緊一蚊股本做十蚊資產，十倍槓杆。而講緊其實相當低。金融海嘯前啲美資歐資銀行，係四五十倍。點解會咁同點解要咁，或者如果唔係咁會點，搵次講，不妨思考下
26. 但銀行既然係高度杆桿，當然就好易爆煲，亦都特別受監管，再自由嘅經濟體系都係咁。例如銀行要有資本充足率，槓桿又唔可以超過某個水平，否則監管機構會GUT，而當然亦都要有存款準備金，亦要守LOAN TO DEPOSIT RATIO。中銀香港講緊近70%，冇晒存款咪做唔到貸款咁咯。咪要高成本吸返存款，咪會影響利潤。
27. 講咗咁耐即係點？業績遲乎係靚仔嘅，但最多咪升一日（都唔知有冇），股價永遠炒前景，前景就梗係麻麻地啦，都不用多問，近日都有唔少投行報告有講了。
28. 金融海嘯後其實全球銀行都已經冇乜運行，低息環境當然唔好玩（下一段講），又要面對更多監管，仲要面對啲FINTECH挑戰。而家仲要面臨經濟衰退，銀行撥備點都會有壓力的。
29. 最後解多次點解銀行唔鍾意低息環境，舊文重貼：理論上呢，銀行就只係過水濕腳，拎舊肥豬肉揩下油（舊文有講：http://bit.ly/2IAdkLg）。加息咪貸款息又加2厘存款息又加2厘，減息咪又兩邊一齊減咯。但實際上唔係咁，因為實際上存款息唔可以減到負數嘛！所以銀行鍾意高息年代，所以點解近十年銀行股都冇乜運行
