Boy’z 嘅張致恆 Steven 琴日晏晝宣布結婚，之後被揭奉子成婚，喺 4 月已經誕 B 仔，啱啱搞埋百日宴，老婆唔係之前宣布拍拖嘅舞台劇演員女友 April，而係一名叫雯雯嘅粉絲。Steven 喺琴晚再貼百日宴相，去到凌晨 12 點，April 終於開腔留言，驚爆原來佢一直被蒙在鼓裡，睇新聞先知 Steven 同另一位女人有咗骨肉兼會結婚！
April 留言向 Steven 大逼供：「你會唔會覺得你有嘢要同我講？你想逃避到幾時？一個電話都唔面對？你所有衫褲鞋襪都仲喺我度，你嗰啲愛我嘅messages呢？先幾日仲有喎？你仲爭我好多錢，你唔打俾我嘅話，醫院見！」愛郎結婚了，新娘竟然唔係佢，仲要做埋人地老豆，要睇新聞先知，實在心如刀割。唔止咁，April 話呢幾日同 Steven 原來仲有聯絡，前日有見面，亦有傳愛的短訊，兼一直借咗好多錢比佢！April 最後話「醫院見」「忽然世界末日」「我怕過唔到今晚！」，令一眾網友非常擔心。
除咗 April，仲見到有另一位疑似受害者現身留言，暗示唔止自己係第四者，仲有第五、六者，嗰位網友話：「他這些天也跟我說他愛我！唔該 april 覆 ig 私信。受害者不是你一個，依家我仲有兩個女仔等你。」呢位網友更講明「周一見」，暗示有 Steven 男人心一字馬腳踏 N 船嘅黑材料。
曾表示患性上癮需要求醫嘅張致恆，睇嚟都係「死性我不想改」，被網民列入「恆字頭」賤男（與周永恆齊名），嚟緊同 Kenny 嘅九月紅館騷，檔期都唔知會唔會受影響而三度轉人喇！
#真係無眼睇 #死性不改
#希望april振作 #唔好做傻事 #下一個會更好
#安仔呢個紅館檔期好邪
