好唔開心﹗好唔開心﹗
如果大家是我的長期讀者，應該記得我地都有去過探訪基層家庭，其實本身都打算今個暑假會再搞，本來想去完旅行先籌備，但我想襯我個心呢一刻有團火時，即刻講咗先，唔好遲啲又話太忙，而無去行動﹗時間暫定係 8月 13日/ 20日，大家有興趣可以 pm 我留名先﹗
事原是今早係另一個親子博客的專頁睇到呢單新聞，對方覺得『基層小朋友無得去迪士尼有幾慘？﹗』，我回了一句: 『有錢唔去，同因為冇錢，所以冇得去，其實是唔同。』，佢回返我話:『我都無錢送仔女讀哈囉，報名都唔敢報呀，咁佢地係咪好可憐呀？』，我無再回應，大家諗法唔同，再講落去都無意思，只是有少少失望，因為我平時好喜歡睇佢的文章，而且好多人留言都是覺得係家長自己自卑/ 虛榮心。
我知我代表唔到基層家庭，不過我自己係探訪時接觸過幾個家庭，我可以話其實好多香港中產，真是唔會想像到依家香港基層家庭的生活。
我好記得其中一個媽媽同我講，佢最怕小朋友幼稚園開生日會，因為其他小朋友都會帶好多糖返學校，又有靚裙仔著，要刻意去買又會增加屋企負責，唔買又怕唔好睇。原來我地好開心好期待的幼稚園生日會，對某啲家庭來講，會是一個負擔﹗係我從來都無諗過﹗
另一個家庭，我見到小朋友有電腦用，我當時都心諗，其實唔係好差啫，當然電腦連上網費都是政府資助，但除了電腦，其實佢屋企連電視機都無，絕對可以用『家徙四壁』來形容，言談間睇得出小朋友的確係好自卑，唔多言﹗
又另一個家庭2大 3小，只有 2張碌架床，1張摺枱，廚房係洗手間入面，當然沒有電視，我眼見係連玩具都無，剛考聖誕節，我地帶咗玩具送比小朋友，個姐姐應該都只有 7-8歲，一收到就問我佢可唔可以轉送比妹妹，其實我地都有預備比妹妹，我叫佢地一齊玩﹗走的時候，大頭妹問我，點解佢地無床褥既？其實我無為意，因為地方太細，我同阿旺是一路企係度，唔好意思坐人張床，係大頭妹走上床同姐姐玩，所以佢先留意到。
其實好明白作為家長，好希望比『能力範圍』內最好的比自己小朋友，唔係話唔去驚比人笑自己窮，而是小朋友幼稚園畢業，『人人』都出席，小朋友當然都會好想出席，尤其可能平時同學都有去迪士尼，自己一次都未出過，就更加渴望，家長又點捨得小朋友失望﹗
忽然好興幸大頭小丸的幼稚園，生日會唔比帶糖果/ 生日蛋糕，學校會預備，人人有份，人人都一樣，上年大頭妹畢業時，校長講明不會出席家長自己的謝師宴，仲叮囑唔好舉辦豪華謝師宴，之前覺得有點奇怪，現在終於明白校長的用心﹗
最後最後，我都想多謝我好有愛的老公﹗7月份是我地相識的月份，又是我生日月 (我地係我生日時第一次見面)，所以我一直都覺得阿旺是我一生人之中最好的生日禮物﹗
Athena Chiu Joe Chan
家徙四壁 在 社團法人屏東縣原住民文教協會- 小學三年級的成語造句 的推薦與評價
例如南柯一夢，家徙四壁，望洋興嘆……！但孩子們用心的學習而且完成作業，因此鼓勵學生從閱讀中吸取語文的運用與表達，增加作文的能力，時而大家也會互相激盪，使學習多 ... ... <看更多>