蘋人誌：謫仙記 蔡一傑
蔡一傑形容自己是上天委派來凡間表演的神仙，故未被天國收回之前，每事也要做到最燦爛。
作為盛世走過來的偶像，蔡一傑很有點功架、派頭，慢熱，直至說到這段，反而肺腑之言：「我覺得上天委派我，我應該係某位神，任務是來凡間表演，表演完，有一日會收番我，咁我就返回天國。在此之前，我只求做到最燦爛，唔好諗其他。」
換轉以前，筆者必定認為他儍咗，但近來，人心不古，越發懷念80年代的簡單快樂。時下歌手扮晒親民又如何？好鬼假，而且親民只因市道差；蔡一傑那一輩高姿態地聲色藝全，才是貨真價實娛樂大家。尤其，當經典藝人紛紛淪為腦滿腸肥的維穩派生意佬，蔡一傑猶帶點不羈反叛，鶴立雞群。張國榮和梅艷芳不會變質，死了永遠年輕，難在堅持，蔡一傑52歲，比Leslie、Anita辭世時都年長，歲月悠悠。
堅持其實不抽象，首先別容許自己肥。甫見面，蔡一傑借意用手背拍拍筆者肚腩，無關揩油，他在尋找同道，拍出八粒朱古力便有共通話題了，討論如何精益求益操靚副偈。可惜我令他失望，他從不令我們失望。每日健身3.5小時、嚴格節制飲食，當然不只為做show，甚至不只為工作，工作為搵食，卻辛苦搵埋無啖好食，又沒仔女繼承，我無法明白。上述「封神論」，是我不斷問他為何苦行僧式keep fit、單身寂不寂寞、怕不怕老……蔡一傑總結的答案。的確，有信念便不解自明，而支撐他信念，包括相信自己係神。
我不相信，但寧願有人相信，像草蜢唱的《世界會變得很美》，至少優雅些。偶像供膜拜，並非隨口叫，請具備神般意志。群星殞落，或於亂世照妖鏡現形腐敗了，諸神的黃昏，蔡一傑，可能是最後一位小謫紅塵forever young仙童。
飛躍千個夢
拍攝現場為他安排了饗宴，蔡一傑卻由節食談起：「我戒吃澱粉、甜品和醬汁，戒到對住都不感興趣。30年前，可以嫌他姿整；34年後，這叫職業道德。「頂住大肚腩上台跳，做咩先？要向觀眾交代嘛。」他說：「我又貪靚呢，否則點keep住我靚body。」
他應該是繼羅文和張國榮，唯一講得咁自然的男星。「也不寡的，例如白灼蝦，只要夠新鮮，用清水烚，已經好正。一條蘿蔔，細心欣賞自有味道，係都要醃要點汁，究竟吃醬料抑或吃食物本身？」蔡一傑續道。
人生何嘗不是？反璞歸真，草蜢出道以來，首次單飛開個人音樂會。「演唱會由很多舞台效果，很多爆破，很多dancers堆砌而成；音樂會就音樂行先，歌手與音樂人cross over，以歌會友。」
竟然不跳舞？
「如果我說不跳舞，你信唔信？但我多方面嘗試，不單靠跳舞令大家開心。以我行走『漿』湖卅幾年，我唔只咁簡單。」草蜢是跳舞組合，不算樂隊，音樂修為一直被忽略了。興之所至，蔡一傑曾化身DJ Remus公開打碟，他說：「其實第一張唱片第一首歌，已經自己揀。」
豈不就是《飛躍千個夢》？
「係，那時我們三個很迷東洋風，首歌好有爆炸力，填埋詞，越加貼切，像預言般，所以它永遠是我們的主題曲、序曲咁。
「到《失戀》，我可能是首個發掘泰文歌的香港藝人，原唱者本來不活躍，因此成了泰國國寶，至今都與我好好朋友。」
一般香港人聽見泰文或越南文只覺搞笑，蔡一傑說：「那是因為你唔想去識。」已不止音樂修為，關乎胸懷。
奇在，當年寶麗金容許黃毛小子自己揀？「關維麟（A&R高層）很信任，我們又反叛青年，現在則是成熟猛男。品味行先，像葡萄酒，現在更成熟，俾大家品嚐吓我。」
再一次，內容肉麻他卻講得毫不惹反感，自然率性，得天獨厚。
獨行派對
關於10月尾的單飛音樂會，蔡一傑說，像泳手游開4x100，今次個人名義報名，不用大驚小怪。
恰恰相反，是為甚麼遲來了？蔡一傑本就是草猛主音，軟硬天師在紅館笑過：「合唱只聽到傑仔把聲。」想像他台上獨唱，有啥分別？
「可能因為我學過聲樂，嗓子比較嘹亮，錄音時又唱埋和音，夾埋便多。阿智（蔡一智）和我親兄弟本身似，有時自己聽番都分唔清，蘇志威把聲就易分些。」
更重要在，草猛fans從來便偏愛企中間的蔡一傑──你知吖？「我唔知。」蔡一傑堅決搖頭道：「入場睇波睇隊形，尼馬點好波總不能踢晒。各人有特別fans，但整體一定係捧草蜢。」
這天，筆者剛巧收到舊同事WhatsApp，我提及即將訪問蔡一傑，她即覆四個字「兒時偶像」，無花無假，我遞給蔡一傑看，他說：「三腳凳少一隻會冧，去爭咁無道行，就做唔到咁多年啦。」
或者，可套用他小時候志願來說明。「我想做海豚訓練員。海豚乖，你對牠好，牠便對你好，永遠唔講是非，但不代表牠蠢，牠很高智慧的。」出於經濟效益，從沒有人慫恿過轉為獨立發展嗎？「有，草蜢出到第四、五張時，關維麟叫過我，當時覺得自己未夠火喉，未係時候。現在，無所謂了，上天自會安排，人根本可以有多重身份。」
他舉新歌《獨行派對》為喻：「結咗婚的朋友，我都勸大家偶爾放空吓、出走吓，一個人享受自由自在。」
實情是，他不忘提及明年又搞草蜢35周年show。這個兄弟無得頂。
流淚的怪獸
蔡一傑與其餘兩蜢大不同，獨行派對，不只舞台上間中一次咁簡單。蔡一智和蘇志威均已結婚、兒女成群，朋友們facebook相冊常常family day，這時，筆者會尋覓那恰如其歌的《Lonely》蹤影。蘇志威更綽號「蘇老闆」，一早生意多多，卻甚少聽聞蔡一傑有甚麼人生大計。Fans偏心傑仔，毋寧疼惜只他貫徹不吃人間煙火的偶像信條。
「我plan了這音樂會兩年，你話我無計劃？」蔡一傑失笑道。
羅文和梅艷芳死，他哭得最傷心，因為他們同路人。
某刊物標題《蔡一傑罕有談另一半》，原來另一半指舞台喎，果然標題黨。「你認為我答得『行』？世間判定某類人算幸福，但無一條路必然right track謂之正途。你問我寂唔寂寞？我話有時囉。誰不會有時寂寞？我想停工一年去讀書，我無仔女我可以，你唔可以。你話：『你無人陪。』係呀，我無人陪。針無兩頭利，沒十全十美。」
為人父母冇咁怕老，因為自己老的同時代表兒女成長。蔡一傑獨唱歌：「到深宵舉起鏡子，鏡內除了我還有流淚的怪獸。」是他顧影自憐的寫照嗎？蔡一傑如此貪靚，keep fit練無可練時，會叫人兜拳大大力打肚，以求腹肌更具層次。
「唱歌演繹而已（指《流淚的怪獸》），我沒那麼憂鬱，卻正因為上天賜予我咁sentimental情懷感動到你們，我更加要唱下去。
「怕老，當然怕，但我無辦法捉住它，除非我今天就死，可以停留在這年紀。順天而行吧。」
「我覺得上天委派我，我應該係某位神，任務是來凡間表演，表演完，有一日會收番我，咁我就返回天國。在此之前，我只求做到最燦爛，唔好諗其他。」
死了，才永遠年輕。
蔡一傑舉杯說：「唔好諗負能量啦，我祝你長命百歲。」所以筆者凡夫俗子。
後記
李太白是第一個被稱為「天上謫仙人」的，除了讚他叻，應該也戥佢唔抵，發熱發亮，奔奔波波，卻何曾真正享福？謫，解作貶官，被小謫到凡間轉一圈，駕返天庭，仍有望會升番官的，價值觀幾市儈。
草蜢唱：「奔奔波波，算不清因果。」（《暫停開始過》）究竟有冇得開始過？蔡一傑其實不計較，筆者順着他意思笑問：「你等天收嗎？」他搖頭道：「人死就似，杯水飲完，無咗，不存在了，是定律。你話哎呀好可惜──飲咗落肚你又唔講？又唔感激？過程中吸取了水份，把握時機吧。」
滿桌饗宴，蔡一傑乾盡最後一杯清水。
