//支持本Page請Click入內文比Clap，已為Medium收費會員請直接Click入內文閱讀，謝謝！//
2020年1月1日民陣元旦大遊行，即係搞咗咁多次，大家都會預期倒大概會有咩發生，反而寫過咁多次遊行抗爭分析，都無好好列出過民陣、勇武、警察三方面嘅各自盤算，藉此機會亦比較有系統咁列出黎：
民陣方：首要目標當然就係催谷遊行人數，造成聲勢，向政府施加壓力。當然人一多，亦方便民陣大台嘅各個組織做嘢：政客可以爭取更多曝光、累積知名度同政治本錢為下次選擇舖路；組織可以乘機向遊行人士籌錢同宣揚理念、市民亦可以響一個相對安全嘅環境下宣洩平時不滿，各取所需。
對於民陣一方黎講，參與人數係非常重要，所以點解到今時今日仲有咁多遊行參加者執著於民陣公佈人數嘅多寡，民陣仍然堅持群眾要由維園出發嘅原因就係咁解。
勇武方：就係要藉住大型群眾運動聚人，然後等待時機進行各種勇武抗爭行為。響組織上，勇武同民陣最大嘅分別就係「去大台化」，因此響統一行動標準上面係會有若干困難，只能靠網上一種微弱嘅共識協調同自律。響同和理非嘅關係上面，則係處於相互理解、互補嘅狀態：簡單黎講就係少數勇武響前線衝、大多數和理非就響後面作為後盾，進行各種支援同掩護。
所以有一個兩難嘅情況係，如果響遊行途中太早進行勇武，就會破壞哂民陣方嘅目標同部署；而如果響遊行完哂先發難，卻又因為一般人以為散完就走，聚人聲勢就大減，留低嘅勇武亦更容易被圍剿。
警方：響19年6月前，警察嘅策略都係盡量透過拒絕封路、堵截遊行人龍黎阻礙遊行人龍、同埋低估人數，以打擊民陣遊行集會嘅順暢度同目標。但係響6月之後，當佢發現民陣和理非遊行經已唔係最大敵人，故意阻礙遊行人龍反而係令到更多人聚集響同一區域，令到驅散行動更難進行，於是就開始盡放和理非先走，再堵截留低嘅勇武。
再去到後期，警方就直頭乘機響遊行途中借「有人搞事破壞」為名發射催淚彈，跟住就警告舉辦遊行單位、要求立刻腰斬活動兼立刻進行搜捕實行一石二鳥。
今次元旦大遊，先不論響下晝最早嘅破壞行動究竟有無臥底參與其中（我個人傾向相信係無，甚至有人話聽倒一男一女向防暴聲稱係「自己人」嘅證供亦極懷疑係假，不過呢樣嘢留番下篇文先講），但好明顯佢地就係想借埋伏大量臥底於遊行隊伍之中，營造勇武同和理非之間嘅猜疑──雖然之前經不乏腰斬遊行嘅先例，但係近百萬人級數嘅遊行被強行中止卻係第一次。
尤其當民陣一直被所有香港市民視為「公認最有權威性嘅和理非遊行申辦單位」，甚至我知有啲怕死嘅市民係只會參加民陣搞嘅大遊行因為至少行完之前都唔會有危險，警方公然響無任何警告之下，響元旦遊行途中突然投擲兩發催淚彈同狂噴胡椒水；之後立刻要求示威響半小時之內一定要完成疏散，仲要未夠鐘就開始推進防線進行威嚇性驅趕、仲要最後響SOGO門口再次採用多頭堵截方式完全封鎖某一地段，重演旺角行刑式拘捕，一次過拉幾百人番差館……
之後響個警謊記者會，個發言人竟然好出奇地「高度讚揚」民陣同警謊嘅配合：包括話佢地好聽話咁提供咗300個糾察、又或全程都努力同警察商討點樣可以令遊行繼續順利進行，「只可惜部份勇武派破壞一個本應可以和平順利完成嘅遊行，呼籲和理非同『暴徒』割席」。
明顯佢地係有兩個目標：
一、就係想恐嚇市民：「以後唔會再有任何遊行係絕對安全，想保住自己條命就唔好上街」
二、就係想繼續深化和理非同勇武之間嘅撕裂，將遊行腰斬嘅原因推去裝修破壞上面
既然警方而家個主要目的係打壓民陣遊行效果、離間和勇之間嘅關係，咁就可以作出某啲策略上嘅調整：
1. 其實坊間都有唔少批評，認為民陣去到今時今日仲堅持響維園出發係多餘，因為假若警方提早腰斬遊行，比你響維園儲倒幾多人都無用；另外如果唔應該再響維園搞埋啲乜嘢誓師大會先出發，應該一見維園儲到差唔多人就開始起步──果啲「今日遊行真係好逼=好多人」嘅無謂自我感覺良好，其實係同餐廳有空檯都特登唔放客入去「儲人龍」一樣咁無謂。
2. 企響勇武角度，我覺得今日裝修時間真係早咗少少：即係遊行無耐經已陸續有唔同地區出現裝修，好明顯就係因為有部份勇武見人多就郁手。但既然由69大遊行以黎大家都有共識係，先比和理非行到夠皮、勇武先進行「加時」，似乎係比較令大家都好做嘅辦法。
當然有人話就算真勇武唔出手、臥底都會出手個結果一樣，咁呢樣當然係防唔倒，而且就算往後有勇武係都要提早郁手，我亦只會尊重而絕不割席：正如今日玩紅燒獅子頭，有人話破壞文物，而家放核彈都唔割，更何況區區兩件死物？但唔割歸唔割，體諒下民陣嘅苦處，作出一啲有益無害嘅策略調整，並唔係壞事。
3. 雖然好多黃絲都聲稱自己「不分化不割席不篤灰」，但每每遇到唔鍾意嘅事發生就會傾向「係鬼做嘅」。所以由今日晏晝開始，包括埋毛孟靜范國威呢啲飯民政棍在內，就係樂此不疲將所有裝修話係鬼做，其實就係一種變相埋怨勇武派搞禍場遊行嘅另類講法。
有關屌七黃屍點樣亂咁「捉鬼」留番下篇文先講，但呢種「獵巫式捉鬼」以前主要係響網上進行，但經過今日一單擬似係鬼嘅一男一女裝修事件後，好多和理非立刻大膽起黎，響現場多次差佬上身，對啲睇唔順眼嘅人搜袋搜身除口罩，而最七嘅卻係每一單都證實係捉錯鬼。
好彩嘅係，今日警方嘅瘋狂警暴，再一次將大家嘅視線轉移咗，唔係呢個矛盾其實係足以引爆群眾間嘅巨大矛盾。響度再次嚴重警告，唔好以為自己亂屈人係鬼就好正義，其實你都係分化撚，搞散成場抗爭，你一定有份。
寡佬證收費 在 申請登記事項證明書 - YouTube 的推薦與評價
資訊影片 寡佬證 是什麼 申請無結婚紀錄證明書過程✨#香港人#移民台灣#貓貓也移民#台灣生活#台灣依親移民. Couple & Cats 貝多芬. ... <看更多>