【參選宣言】黃浩華正式宣布參選2020立法會選舉資訊科技界選舉
我係邊個？
2003年反廿三條立法， 七一有50萬人遊行， 隊伍入面有好多中學生。我係其中一個。
2012年反國教運動，當時我已經大學畢業，十萬市民為守護香港下一代， 行出黎抵抗洗腦教育。我係其中一個。
2014年雨傘運動，見到香港公民社會被打壓，果排唔少外地工作嘅人決心要返香港，一齊撐起雨傘。我係其中一個。
雨傘運動之後，一班堅持爭取民主嘅前線IT人， 創立議政組織「前線科技人員」。我係其中一個。
2015年之後好多政策議題，由政改反對「袋住先」，「創科局成立」，去到「網路廿三條」， 有班IT人用專業知識，一齊監察政府。我係其中一個。
2016年特首選委選舉， 30個支持真普選嘅民主派的IT人，組成IT Vision團隊參選，促成民主300+，我係其中一個。
同樣係2016年， 一班擅長用行動實踐理念嘅IT人， 創立g0vhk 香港零時政府 推動開放數據同埋公民參與。我係其中一個。
呢班人由當初得「小貓三四隻」，到今日超過700人嘅社群，身體力行以我地IT人嘅技術和專業，同公民社會合作，開發一個又一個開放數據和開放源碼嘅項目令政府的資訊更加透明，等市民更加容易監察政府，知道真相。
由舉辦hackathon、開發立法會議員考勤同預算案質詢嘅搜尋器、2019 區議會選舉資料平台到今年民間防疫資訊平台 以及五月嘅『香港開放數據指數』研究等等，呢啲例子都好實在咁比香港市民睇到點解開放數據對公共利益咁重要。
而家，開放數據已經係政府嘅政策嘅一部份。
咁黃浩華到底係邊個？
講出黎嘅答案，其實都唔係最重要。最重要係，我只知道『生於亂世，有種責任』 我嘅責任就係用IT人嘅技術同能力 去實踐我嘅理念。
我點解出黎？今次出選來自一個選擇： 暴政之下，我選擇同香港人同行。
國安法實施後，中國的防火長城已經殺到。內容審查、網絡封鎖呢啲以前唔會响香港發生嘅事 而家通通都隨時會發生。如果有一日，我地連Facebook, Google, Youtube, Twitter 都冇得用，香港會變成點？
講求資訊自由和求真，係IT人的基因， 但政府就用種種手段逼IT人就範，做網絡審查和打壓人權的幫兇。
我一路堅信自由民主、開放政府、公民參與。我曾經去咗北京一年半工作，親身體驗到大陸的網絡審查、講句嘢都要小心，令到我更加掛住同珍重過往開放同自由嘅香港。我曾在大學、香港嘅IT公司、跨國IT公司同科學園startup返工， 了解唔同嘅企業文化同工作環境。有一樣嘢好清楚： 如果我哋今次唔一齊頂住，香港冇咗網絡自由，變到同大陸防火牆裡面一樣，公司、投資者同IT人才都可能被逼撤離香港。
結果？ IT公司嘅前景同本地人才嘅就業都會受到打擊同威脅 到時講科研、創新，仲有咩意思呢？
IT人最擅長逆境變通， 但我堅信，IT人亦同時係擇善固執。呢個香港，呢個IT界 - 係我哋大家都有份。
我係屋邨成長，得香港呢個屋企。 我決定企出黎，參選2020年立法會IT界 因為我真係好__鍾意香港。
我係黃浩華，我係科大畢業，我係一個Made in Hong Kong嘅真IT人。
===
發表參選宣言片段：https://www.facebook.com/howawong.hww/videos/718686042309968/?t=177
===
#黃浩華 #WongHoWa #HOWA2020 #2020年立法會選舉 #資訊科技界 #IT #IT人 #真香港IT人
實踐大學網路學園 在 實踐大學高雄校區學生會 - Facebook 的推薦與評價
[學生會問卷調查] 學生証結合悠遊卡或一卡通（高捷卡）意願現在只要到網路學園就可以投票! # 問卷內附有悠遊卡及一卡通（高捷卡）比較表可供同學參考[路徑] 實踐大學 ... ... <看更多>