睡公主的詛咒（下）
上集：http://bit.do/e6DFj
經歷咗呢件事，我唔敢再畀睡公主留喺度，我決定將佢運番去我嘅皇宮。
如果睡公主醒番，見到自己喺陌生嘅地方，可能會驚，但安全起見，無辦法啦。
出乎意料嘅係，路上，我遇到我父王。
父王講：「我收到士兵帶番嚟嘅消息，即刻趕過嚟。」
我問：「唔駛父王親自趕過嚟嘅，侍女同女醫生呢？」
父王遣散侍從，一臉嚴肅咁指住睡公主：「你唔可以娶呢個女人。」
我好迷茫，明明係父王叫我娶睡公主，話係祖宗遺訓。
「你遲咗去城堡，咁多人去城堡姦淫擄掠，件事揚晒啦。」
父王好堅定咁講：「如果你娶咗佢，所有人都知，你無力保護自己嘅老婆，你根本唔係男人！」
我忍唔住講：「但係你話過，守信先係真男人。」
父王意味深長咁講：「睡公主醒咗，你唔娶佢，就係唔守信，但如果佢唔醒呢？」
我下意識答：「佢依加未醒，係因為無人吻醒佢，我一吻......」
父王打斷我嘅說話：「巫婆欺騙咗所有人，睡公主根本唔會醒，只要一吻，睡公主就會死。」
我呆咗，我終於明白父王嘅意思，佢要殺死睡公主！
我仲想掙扎：「但係公主無做錯......」
「你第日要做國王，睡公主做王后，呢個污點就會跟你一世。」
父王話鋒一轉：「如果你堅持要娶佢，你仲有個細佬，可以繼承王位。」
我揀睡公主，就會失去王位，而我同睡公主......其實唔熟。
我支支吾吾咁講：「我唔會殺佢㗎。」
但我亦遠遠無正義到，放棄王位，去阻止其他人殺佢。
所以，我哋將睡公主運番皇宮後，無幾耐，我就收到睡公主嘅死訊。
父王為佢舉辦隆重嘅葬禮，並強烈譴責「呃人」嘅巫婆。
無幾耐，父王就安排咗一個鄰國公主畀我做老婆。
反正都係政治婚姻，娶邊個都分別。
但結婚後，恐怖嘅事開始發生。
先係我父王，跟住係我老婆、我細佬......所有王族成員，都患上怪病而死。
摯親陸續死去，我傷心之餘，仲要面對蠢蠢欲動嘅大臣。
我焦頭爛額，無幾耐，我都患埋怪病。
臨死前，我見到睡公主嘅身影，喺半空中飄浮，笑得猙獰。
睡公主問我：「眾叛親離嘅感覺係點啊？」
「你唔係死咗咩？」我渾渾噩噩咁問。
睡公主咬牙切齒咁講咗一大輪，佢話，一百年期滿後，佢嘅靈魂已經甦醒咗，只係身體無被喚醒。
佢一心等王子嚟拯救佢，但只係得到一次又一次嘅凌辱同傷害。
直至三個月後，我出現喺佢面前。
「你畀衫我著，你保護我......我以為你會係我嘅真命天子！結果，你畀咗希望我，之後殺咗我。」睡公主聲音陰冷。
我強調：「我無殺你。」
「有咩分別？你默許你父王殺我。」
睡公主冷笑：「我本來最憎嘅人係巫婆，但依加我有啲感激佢。」
原來，睡公主被殺後，巫婆有部份法力留咗喺佢體內。
睡公主變成冤魂，詛咒害過佢嘅每一個人，令王族成員逐個死去。
我都好嬲：「我同父王係對你唔住，但其他王族成員呢？佢哋係無辜㗎。」
睡公主反問：「我呢？我唔係無辜咩？」
我一時語塞，睡公主係無辜，但佢慘死後，就變成劊子手。
我曾經一心想幫睡公主，但面對王位嘅誘惑，我寧願佢死。
或者，城堡附近嘅村民，都曾經好淳樸，但見到值錢嘅珍寶、沉睡嘅公主......總有人化身強盜。
點解呢個世界有咁多壞人，而大部份人都唔覺得自己係壞人？
因為善同惡嘅距離實在太近，人總係寬於律己，嚴於律人。
一個人做咗壞事，喺自己眼中，佢只係一個「偶爾做咗一件壞事」嘅好人；
但喺其他人眼中，佢已經係壞人。
－完－
將專頁設定為「搶先看」/ "See first"，最新故仔馬上睇！
新書《寓言地府動物園》已經出版了，現正發售中，
詳情可點擊這裡：http://bit.do/e37JG
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #睡公主的詛咒
