【龔成問答信箱】(Q22441-Q22460)
Q22441:
龔sir你好,本人係聾人,最近對於聾人遇到很多不公平的事,例如社會上健全人在最上層,盲人、其他殘疾人士比健全人地位低,佢哋可說話,可溝通。
可是聾人呢,卻是更低,在最最低層。我們手腳都沒問題,但不能溝通,不能聽電話,只能被壓到社會的最低層。其實政府對殘疾人士,完全零支緩。但我沒有自卑,從來沒有,我總希望自己可以堅強一點。
本人很想向你學習下,為買股票想財富增值。
從未睇你FB前第一次買咗[email protected](二手)跌咗蝕得甘慘,咁難升番上0.64,打算想賣出後轉到有質素的股票。有咩意見?
今年3月頭,一向都有留意你分享,日日都有睇你的Q&A, 覺得有用,得益不少。如你開班我第一時間會報名,可惜我不能因聽不到(聾不代表啞)
你教的課堂內容,變相會跟不上進度,就係我遇上很大的學習困難,so sad, 唯一方法是購入你的作品,
最近睇咗你三本“80後千萬富翁“,“50後穩健收息股“,“股票勝經“,睇呢本書有d未必一定可以理解,想請教你,有個問題我唔明白又唔懂点計算,
例如建立咗一個長期的「平穩增長組合」,佢哋收入都增長,盈利都保持向上,加上股本回報高,有機會回報高10倍or可能未必成為10倍股 ,所以要睇佢哋之後的業務發展,
請問呢個点計算法?可以舉個簡單例子?可簡單解釋嗎 謝謝
我35歲,月入19k, 每月約有10000作儲蓄,給家用9000元,希望在10年可資產增至200~400萬, 目標:50歲前提早退休,想做財務自由。
現時持貨如下:
平穩增長股
1928 $28.25(1手)
0012 $35.9(1手)
2318$68.85(1手)
0270 $10.6(1手)
潛力股
1810$21.65(1手)
收息股
939$6.13(1手)
我自覺賺的幅度不大,打算將邊投資(平穩股70% 潛力股30%)邊儲蓄的策略,等跌下會大力掃貨。請問有沒邊啲股票係有機會做到5年或10年後有200~400萬?
不好意思我講到甘多,期望得到你的回覆,謝謝
呢本書你講句“現金不斷會貶值,不是財富“ 你講得好好講得有道理
買咗你本80後,希望睇完增加了一些投資嘅知識,努力
voo定期定額好?月供好?謝謝
龔成老師︰
這個世界,有好多客觀條件,未必到我地控制。唯一可以做的,就是唔好比這些因素,去限死自己。盡力去打破這些限制,為自己創造出更多空間。
只要你有夢想,內心夠強大,其實無野可以難到你。
我當然不能夠明白你的情況,但現時利用文字,在網上或其他平台,都可以作出溝通、發聲、工作,你要加油!
現金,由於可以無限量發行,因此長線必然會造成貶值。所以,我地財富增值,就係將只會貶值的現金,換成優質資產的過程。
令我地財富不被貶值影響之餘,可以有一定增長能力。
你所講的歐科雲鏈(1499),我本身無特別研究,佢屬較高風險類,要睇下你博唔博。過往持續虧損,見佢股價上落好大。只可以話,唔建議大注,自己衡量風險。
計算企業的價值方面,過程其實比較複雜,好難三言兩語就講到,就算在我的股票班,都要講5小時,裡面會講3種估值方法,有難有易,但同學都用到的。
簡單來說,你要考慮企業的生意、盈利、現金流、資產、負債等財務數據,同時要比較行業,考慮這企業的經營情況,之後的環境又會如何。這都是計算的基礎。
例如,我地會考慮佢有多少生意,有多少盈利、現金流,有多少資產,從而計算該業務值多少錢,同時會推算將來的盈利情況,去推算這企業長遠的價值。
如果要深入計算,基本上要好仔細的研究企業,要分析好多財務數據用比率,先至有較完整的答案。
所以,我好難係而度解釋,或者用例子去講解估算方法。
雖然你未懂估值,但唔代表你唔可以進行投資增值。但方法上,要進行調整,例如用月供或者分注模式,去減少你買貴貨風險。
以你35歲計,現時持股係可以。以你年紀和投資經驗計,平穏增長股和潛力股比重都正確。
你現時應以增值為主,建議你用「平穏增長股」 + 「潛力股」作組合,去創造一個增值平台。
正如你先前計劃所講,你現時將每月5成儲蓄,即$5000做月供。其餘先儲起,用一邊月供一邊儲蓄的策略。
但如果你對這些股票認識不深,可以全供指數基金。如果你都有認識,就可以用你平穩增長股70% 潛力股30%的分配策略,去選股。
至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。
我假設投資回報有10%(連股息再投資),你每月投資$10000 + 現有持股約10萬,10年後大約會增值至200萬。
至於你能否50歲提早財務自由,就要睇這筆資金,是否足以滿足你期望的退休生活水平。我假設你退休後,預期每月需要用2萬開支。以股息率6%計,你就需要本金400萬。
你可以用這個計算結果,作為參考,再去調整你投資計劃。
至於Vanguard標普500指數ETF〈VOO〉,是追蹤標普500指數的ETF,算係平穏增長股類別,都適合你年紀。
其實你做月供或"定期定額"都可以,因為2者都可以做到平均價格效果。但重點係必須長線(建議最少供3年和持有5年)去進行。如果供下停下,或者成日轉變,就唔會有意義。
------------------------------------------------
Q22442:
想請教,阿里巴巴旗下菜鳥網絡牽頭投資一百二十億元,在香港國際機場南貨運區的過路灣興建智能物流中心,作為一帶一路的貨運設施布局,
將為本港出口商再增一個貨運出口選擇,亦便利消費者經由淘寶購物收貨。阿里巴巴這個ai 物流倉是否未來企業關鍵?
帶來豐富收入,9988現價合理?
阿里巴巴這個ai 物流倉是否未來企業關鍵?
好似Amazon AI物流中心,之後股價一直上升
龔成老師︰
阿里巴巴(9988)宣布投入1000億人民幣,於香港機場打造高端物流中心,預期在2023年投入營運。此營運中心,將會是該地區同類設施中規模最大,技術最先進之一。
中心由菜鳥網絡帶頭開發,中航、圓通快遞都係當中投資者。
此個新營運中心,配有全自動化倉庫、溫度空調、空運處理中心、訂單處理中心等。
集團過往一直收入核心,都係來自內地零售商業部份﹐佔收入近75%。集團在內地發展,其實已相對成熟,相信集團預期該部份增長,會開始有機會放緩。
因此,集團開始著力開發更多其他市場,在香港機場打造高端物流中心這個布局,可以睇到佢這方面野心唔細。
這個物流中心,係一個利好因素。但這只是一個資本性投資,到底到集團有多大幫助和效益,現在言之尚早。但長線計,一定係對集團有利。
但估計方面,我暫時唔會有調整,宜再觀察,才再決定。
------------------------------------------------
Q22443:
老師你好,我是之前曾經向你請教過一些問題的讀者。亦都購買了老師的著作
其實我在今年12月便會前住加拿大工作。我現在存有12萬現金。13萬保險基金和12萬股票總值。
1. 0068 (15.3入)2000股
2. 00823 (67.25入)500股
3. 00939 (5.84入)10000股
4. 03918 (7.940入)2000股
想請問在移民的前提下如何分配現有的資產?謝謝老師
龔成老師︰
首先,你要先清楚,移民時是否所有在港資產,都係會變現。
如是,由於你12月就要走,多於1手的股票,你現在就要慢慢分段沽出股票,唔好等到走先一次過沽。
如否,以你剛畢業年紀,應先做好增值部份。建行(0939)只係收息股,增長力欠奉,不宜持有太多。
利興發展(0068)無投資價值,但由於佢停左牌,你現時無野可以做,等佢復牌就沽出。
其餘2隻都有質素,可以照持有。但金界(3918)由於疫情關係,中短期一定會較弱,但長線持有係可以。
12萬現金就先留起,等大跌市機會。
另外,緊記要開始月供計劃,因為我地長遠組合,唔可以只係得1,2隻股票,應該係有不同行業優質股,才算平衡。
------------------------------------------------
Q22444:
1) 明白老師,咁買入一隻股票之後預算要擺幾耐左右先至係最理想?即係要擺幾耐之後先至等收成?去睇吓佢有冇升?
2) 同埋老師我之前睇過你啲書, 如果你話價值投資係一定要買入優質企業然後長線擺好耐,咁樣係咪唔使理個價位高低月供股票都可以?
只要我知道呢個公司好有價值,例如好似中電煤氣咁, 咁咪就算幾貴都好都應該買?
咁樣嘅話月供股票都唔使煩㗎喎?淨係買呢兩隻都乜都得喇?用成副身家買晒佢哋? 總之有錢剩就擺晒落去咁係咪一定賺㗎?
3) 同埋老師想請教你, 我好似你咁講試吓買吓啲月供股票, 但我發覺裏面個倉可能有幾隻上升,同時間有幾隻又會下跌, 情況就好似啲資金只係搬龍門,擺嚟擺去,
咁其實我哋嘅策略應唔應該逢親嗰啲股票上升就賣咗佢, 然之後將同一舊錢入返啲一齊下跌左嘅股份?如果唔係好似每次嘅上升浪同跌浪都好似唔關自己事咁?
其實舊大錢都冇乜點變?定抑或應該全部都長線投資?只要等嘅時間夠耐,長時間全部整體都會升?因為我擔心就算我擺咗好長時間如果佢都係只係搬龍門,有啲上升又有啲跌,
咁最終就算我擺咗好長時間舊錢都唔會多咗好多個喎?謝謝老師
4) 唔好意思老師, 同埋想請教你, 最近睇你寫嘅嘢,你都話要我哋趁後生嘅時候掘多啲井, 儲多啲錢, 準備充足,
咁我想請問如果我每一個月將我全份人工扣除晒開支使費比屋企人同埋信用卡,有政嘅錢如果全部都擺晒落股票有冇問題?
因為我做緊月供股票, 同埋買嗰啲股票都係喺低位先買,逢親低位先至月供個一隻股票,因為我嘅概念就係銀紙係會貶值,咁我每個月將啲錢擺落去一啲穩陣同收利息嘅股票,
就算我將所有剩餘嘅積蓄擺落去,唔知會唔會都冇問題呢?
PS: 我都有啲流動資金可以應急, 有一舊錢可以靈活運用冇問題, 但係每個月出糧嘅人工可唔可以用晒嚟買股票?
龔成老師︰
1) 一般我建議持有最少5年,當然優質股永遠都係長線持有,增值效果才會最好。中短期股價會有波動,會有起有落。但長線股價,必然會將企業質素反映出來。
2) 其實我地買股票,除了要有長線投資價外,"股價平貴水平"和"組合平衡性",都係好重要。
月供雖然有平衡價格波動能力,但太貴時候,我地都會考慮減供款,甚至停供。但如果你係初學者,對企業估值無太大信心。
我就比較建議你不理價格平貴,一直去供,反而會更好。因為你自行調整,若果判斷錯誤,有好大機會拖低左長線回報。反而不理價格,對你會更有利。
另外,我地唔好成個組合,只集中係1,2隻股票身上。
最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能高於組合30%,同一股不能高於組合15%。要平衡,建立後長期持有,不是買賣賺差價,而是成為你財富組合一部分。
3) 你唔好依然停係賺差價模式,我地現在投資增值,係將長線只會貶值的現金,轉換成資產的過程。而優質股,係資產的一種。
但再優質股票,中短期都會有波動,你係唔洗太在意。只要你長線持有,佢都就自然會有唔錯增長。
4) 現時大市只係合理水平,未到平宜區,每月儲蓄你預用一半左右,去做月供好了。餘下一半,我地先儲起,去等大跌市機會。
你現時才33歲,係選股時,應選擇一些較有增長力股票,先去為自已累積一筆資產。到近退休之年,才慢慢換回收息資產,支援退休生活。
所以,你應先集中增長,而唔係收利息。
你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
到你有一定投資經驗﹐潛力股比重可以相應調高,佔組合約3-5成,視乎你當時投資經驗多寡和了解這些股票程度而定。
------------------------------------------------
Q22445:
你好龔成老師,想請教下: (我45+歲) 現持有組合:
長和 500 股
香港中華煤氣 600 股
匯豐控股 1,091股
恒生銀行 111 股
港鐵公司 1,100股
香港交易所240股
陽光房地產投資信託基金 2000股
領展房產基金 900 股
建設銀行 4,280股
長江基建集團 500股
華潤置地 260 股
工商銀行 4,180股
平安好醫生 100股
金沙中國有限公司 580 股
中銀香港 1,570股
盈富基金 1,090股
交通銀行 930股
中國銀行 2,200股
阿里 100股
這樣既組合是否可以。
請問你是否贊成賣出交通銀行買入復星醫藥 (2196)?
想供月供股,每月$3,000,領展(823)-$1500 & 比亞迪(1211)$1500? Or 領展(823)- $3000, 不知道可以適合我 ? 請問你會建議我買哪些股票呢? 盼回覆~謝謝!
請問你陽光房地產 or 越秀房產信託基金 or 領展比較適合我?
龔成老師︰
你現時持股,雖然都係有質素,但數量實在係太多,好難定期檢視管理。長線計,你最好集中翻係10隻左右。
另外,個別企業和行業,不要佔組合15%和30%以上,銀行業更加不要高於組合20%,否則會有過度集中性風險。你組合中,銀行股佔左唔少,你要審視翻個比重,以避免出現過度集中的情況。
唔建議賣出交通銀行買入復星醫藥 (2196),復星現價略貴,要回多少少才算合理。
以你年紀,我建議集中在平穏增長股類。領展(0823)係可以,但我地投資唔可以只集中係單一股票,我建議你都加入指數基金,指數基金供$2000 / 領展供$1000。
陽光房地產(0435)和越秀房產信託基金(0405)都可以考慮,但佢地主要係收下息,增長力無領展咁高,以你年紀,領展(0823)會係比較適合。
------------------------------------------------
Q22446:
想問多一問你意見,假設我而家買入一個單位450萬,俾首期兩成,呢個單位會放租,但有機會未必一定請時間可以放租,有機會預算自己都要供樓,
用以上呢個方法就係擔心樓價不斷上升, 而萬一幾年之後股票增長不太理想,可以自住。但假設股票增長理想 呢個單位會賣出 而買入反一個600-700萬單位自住。
問題係,咁會現金用左100萬 俾首期,剩返180萬投資
1) 是否唔應該現在買入一個單位先? 因為自己租樓住唔想追唔切樓價上升,所以諗緊要唔先買一個單位,同埋有機會五年之後賣出呢個單位,會比起集中只投資效果冇咁理想?
另外擔心一買一賣 都需要印花稅 等費用
2)以我諗法希望5年後有500萬以上 當然希望回報可以再大,可以50%潛力股 50% 平隱增長嗎?
3) 如果用五年時間投資,預留一半現金等大市大跌再埽貨,但冇人知道大跌市係咩時候,咁應該點樣去衡量?
所以例如如果兩至三年仍未大跌市,佢應該keep住月供,或者分注見低就入?
謝謝老師
好希望盡早投資 生活會較理想,多謝你成日比正能量人
4) 老師, 現在平衡股票如下 會長線投資。請問一問 以下組合如何,可給一點意見嗎?
用180 萬 先分注入
再留100 等機會
大約
60%潛力股 :
1177 12%
1810 17%
3067 17%
9988 12%
40% 增長
2388 14%
1972 14%
0548 14%
月供 $2000 2800
月供 $2000 2845
龔成老師︰
1) 這個問題,無一個100%答案。正如之前所講,現時樓市租金回報率不高,正常用優質股增值,個效果會較好。
但無人知5年後,樓市升快D,定優質股升快D。我地只能用現有水平,去得知值博率係而一刻,係優質股較好。但唔代表最終,樓市唔可以跑嬴翻優質股。
所以,"用投資優質股換大屋",定係"細屋換大屋",你要自己衡量。從現時值博率計,會係前者。
但若你相穏陣D,其實先買細屋,再換大屋都未嘗不可。但你要確保細屋升值能力,最少能跟大市同步。
另外,你可能會用來自住,即係佢都要滿足你長線生活需要。而且,間屋唔好太細,最少要有300呎以上(一個家庭基本需要大細),才有基本投資價值。
2) 可以,但留意如果要直接入貨,現時只有安碩恒生科技(3067)、GX中國電車基金(2845)、騰訊(0700)、阿里(9988)、中生製藥(1177)、福壽園(1448)算在合理區中上至頂部,可分注入貨,其餘都略貴,想買就要等一等。
但如果係月供,我之前推介你的股票,現價都可以開始。
3) 的確係無人知,但我地投資係唔會"估"走勢,只會用平貴去定策略。現時市況係合理水平,我地應預留3-5成現金,去等大跌機會。
因為我地唔會知幾時大跌市出現,但如果你無現金係手,真係出現時,你會錯失良機。
4) 你計劃係可以,但小米(1810)都仲係有D貴,最好回多1成才入。
你緊記180萬係分多注咁,慢慢入貨,唔係一次過買晒。
另外,深圳高速公路(0548)只係收息股,增長力好弱,唔係咁適合。我建議你將佢換成指數基金,去增值組合平衡性。
------------------------------------------------
Q22447:
龔成老師,這個失敗的組合(0003, 0012, 0778, 1299, 2388,3067, 3383, 9988) …應該怎麼辦…? 除了aia , 有很多股票由2017,18年坐到現在… 到了3067,我不停加註,怎知愈來愈跌
很灰
龔成老師︰
你整體的持貨不是劣質,不少都是有質素的,但部分你可能在較貴的價位買,以及市況波動,令股價向下,建議你日後多用平均入市法,又或提高計算企業估值的能力。
另外,你提及3067不停加注,記住,投資要有策略,買入前寫低具體的進行方法,投資後要長線,持股5年以上。
只要長線質素無變,中短期波動我地唔需要理會,長線持有就可以。
另外,我地決定加注與否,要睇幾個因素,記住,並不是「拉低平均買入價」為目的。
第一,要分析這股的質素,如果無質素,就再跌都唔加。
第二,這股的類別,如潛力或增長或收息類等,是否與你的財富組合匹配,比例是否適合。
第三,你要先計算加注後,這股佔你股票組合的比例會否太多,因為同一行業,同一股票。不能佔股票組合的比例太多。
第四,現價是否有投資價值率,要平,或起碼合理,不能貴。
第五,你要在加注後,仍有現金剩。
記住,重點不是「拉低平均價」,而是組合比例與配置。
你現時持有股票,都係有質素,可長線持有。但當中雅居樂集團(3383)負債水平較高,不宜佔太高比重。
我見你安碩恒生科技(3067)都加注左唔少次數,你要留意此股和阿里(9988)都係潛力股類,雖然有長線投資價值,但風險會比較大。如果你年紀較大,或者投資經驗不高,這類股票不宜持有過多。
------------------------------------------------
Q22448:
龔成sir, 你好,多謝你用心的分享,增加咗我唔少投資方面的知識。一直以來都無去做過咩投資,特別是股票,了解不太多。
最近數月,我開始透過youtube及朋友了解到股票投資。
想透過穩建的投資組合去增值資產,而非將錢放銀行貶值。增值資產主要目的在放:
1. 短:5年內換2房半或3房單位($900萬以下)
2. 中:(10-20年內)孩子將來有到外國留學需要時用
3. 長:(20年)將來退休生活費
現時我(33歲)與老公(39歲)有穩定工作和收入,每月收入扣MPF約$68000。每月家庭開支約$56000,可儲約$12000。育有1個幼兒,有計劃1-2年內生多一個小朋友。
資產:
1. 現金$30萬
2. 物業:市值約$620萬,每月供約$14000(仍欠銀行$296萬),出租每月$13000(自己租樓住$16500)
3. Ibond: $30000
已買基本醫療保險
現在有些投資想法:用一半現金儲備投資股票(用一半在黎緊尼次股市下落中分注買入一些平價位優質潛力股(0700、9988、2845,各100股);
一半投資穩健收息增值股和EFT(0823/VOO/HD/0303/0006/6823)作儲蓄增值之用;另外,計劃每月供$6000股票(0823/VOO/HD/0303/0006)
Q1. 以上這個投資計劃會否太進取?分佈是否平衡?
Q2. 月供股票主要想放在有穩定收息增長及分散風險的股票,想問我較適合先投資哪些我計劃內的股票?
Q3. 美股我計劃待下跌後再供,VOO & HD咩價位為之適合入市?
Q4. 以上三個潛力股到何價為平(以作參考入市價位)?會否有另一些更合適我投資的優質潛力股?
Q5. 我也有想過入0388,咩價位才適合入市?
謝謝你。
龔成老師︰
其實你3個目標,我地都可以透過用優質股增值,去達成。
1) 潛力股部份,係可以。但另一半,以你們年紀和計劃作考量,我較建議集中在平穏增長股,而非一些收息股。
領展(0823)、VOO、HD係可以,但其餘3隻都係收息類股票,增長力唔高,唔建議用。你可以用以下股票,去取代這3隻。
平穏增長股︰指數基金、金沙(1928)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)
現時大市只係合理水平,現金佔比重大約3-5成。餘下資金,就等大跌市出現,才加大力度掃貨。
2) 由於你3個目標,都係需要財富增值才可做到,因此選擇方面,應以增長股為主。
你月供計劃,同樣有少少保守,建議你將偉易達(0303)和電能(0006)這2隻收息股,換成潛力股,去增升組合增長力。若你相保守少少,換成平穏增長股,都係可以。
每月餘下$6000就先儲起,等大跌市機會。
潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學(2382)、阿里(9988)、騰訊(0700)、GX中國電車基金(2845)、三星FANG ETF(2814)。
3) 現時佢地價格在合理區,你照保持月供,咁就可以。我地月供只會係去到好貴,才會考慮下調供款額,甚至停供。
如果你本身定平貴能力不高,我建議你不理價格,一直月供會較好。因為你自己調整出錯,就好大機會影響你長線回報。反而一直供,會對你更有利。
4) 上述的潛力股,都適合你。你可以睇翻自已對邊個行業或企業更看好,本身對隻股票,又有一定認知,去決定投資目標。
部份潛力股已有輕微過熱情況。只有安碩恒生科技(3067)、GX中國電車基金(2845)、 騰訊(0700)、阿里(9988)、中生製藥(1177)、福壽園(1448)勉強算在合理區頂部,可分注入貨,其餘要等等。
5) 港交所(0388)都係一隻可選擇的潛力股,但現價略貴,回多1,2成才入,值博率會較高。
另外,你持有的IBOND只係定息產品,無增長力,唔適合你。建議沽出,用來投資優質股會較好。
------------------------------------------------
Q22449:
成哥,想問下以下組合係米仍然繼續特有適合?
700 ,556買入
799,10.94買入
3383,10.94買入
3690,281買入
1810,28.61買入
939,6.2買入
龔成老師︰
騰訊(0700)、小米(1810)、美團(3690)和IGG(0799)有質素,可長線持有。但美團(3690)和IGG(0799)不確定性較高,不宜持有太多。
上述4隻都係潛力股,如果你年青,持有係可以。但若你年紀較大,就只宜好小注。
雅居樂(3383)業務上是有質素的,但中國經濟有少少風險,加上佢本身負債較高,相信會對佢有影響。
這股都有長線投資價值,但負債高始終是風險,唔建議太大注。
而建行(0939)都有長線投資價值,但佢增長力不高,只係收息股類。如果你係較年輕,這類創造穏定現金流的股票,就唔適合你。
------------------------------------------------
Q22450:
龔sir,請問2158 $35.5入 1044 $50.9入現價可溝嗎?可以長期持有嗎?
龔成老師︰
醫渡科技(2158)有潛力的。可長線。
提供基於大數據和人工智能(AI)技術的醫療解決方案。集團主要向醫療行業的主要參與者(如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者)提供服務和合作。
根據大行報告,於2019年,集團收入在中國所有醫療大數據解決方案提供商中排名第一,在中國醫療大數據解決方案市場中的市場份額為5.0%。
睇翻大行對佢2020-23年預測,收入和毛利增長分別為73%和83%,增長力唔錯。
佢平台有一定擴張性,長遠受惠更多醫療保健客戶使用平台。不過公司客戶過度集中,以及依賴公共部門。
但佢依然係在燒銀紙狀態,係一個扣分架地方。整體算係有質素,但要注意風險,投資時唔建議大注。
之前貴,現價依然係略貴,唔建議加注。而且,此股不確定性較大,只宜小注投資。
恆安國際(1044)主要業務為在中國生產,分銷及銷售個人衛生用品,零食產品及護膚產品。
恆安擁有多個品牌,如「心相印」、「安而康」、「品諾」、「安爾樂」等,而業務大致可分為紙巾產品、衛生巾產品、一次性紙尿褲產品、零食產品。
恆安具有品牌,又處於增長中的市場,前景不俗,故此企業為不錯的優質股。不過,市場競可能令毛利略為受壓,但相信隨著此企業發展更多較高毛利產品,影響不算大。
長遠來說,恆安仍有一定的前景,故有投資價值的。成本上升,令佢略有風險。整體而言,有長線投資價值,現時大約在合理區中間。
若你本身計劃分多注投資恆安的話,現價加1注係可以。如果你資金不多,等佢再回多1成左右,值博率會較高。
------------------------------------------------
Q22451:
龔sir, 你好!想請教你,我現在月供
$5000港交所
$6000騰訊
$6000 阿里巴巴
$5000中國平安
中國政府現時加強監管科技、教育、物管和外賣股,我應唔應該繼續供?還是有其它股票可以平衡風險?請龔sir 指教!
另外,美股科技ETF 值得買嗎?
龔成老師︰
中國政府在不同行業拖加新政策,都造成不同程度的風險。但我地要分析翻,這些政策係唔係明顯會對企業長線發展,造成核心性影響。
就你所月供4隻股票而言,影響係有,就暫時唔算係一些核心性問題,這些股票依然有投資價值。
但你而家月供組合,太偏重左係潛力股(0388, 0700, 9988),佢地雖然有增長潛力,同時風險都較高,不宜持有過多。
若你算年青,潛力股可佔約5成,餘下應用以下平穏增長股。若你投資經驗較淺,潛力股比重,要再調至3成以下。到你學到一定投資知識,才慢慢調高。
未來時間,你就要加大翻平穏增長股部份,令組合更平衡。
同時間,每月儲蓄唔好盡用,要留有3-5成現金,等大跌市時去入平貨。
美國科技ETF,都有投資價值。
你可以考慮三星FANG ETF(2814),佢係追蹤NYSE FANG+指數的表現。是一個美股潛力股基金。
首先,FANG+係代表美國上市多隻領先既科技股票,即係代表Facebook、Amazon、Netflix、Google,而該指數會再加上其他科技股,如Twitter、Tesla、百度等,即是全球處最前列的科技類公司。
這基金是一個潛力基金,長遠正面,但要留意價格會較為波動,加上近年科技類公司上升左唔少,因此現價唔算平,建議以月供的模式投資,買入後長遠持有。
但你要留意一點,你現時港股有內地的阿里(9988)和騰訊(0700),再加上這美國科技基金,你就會成個組合,非常集中係科技相關股份。
由於佢地係同業,最好維持不多於組合3成,以免出現過度集中性風險。
------------------------------------------------
Q22452:
想問一問愛康
點解 我買入既一手 都咁差
龔成老師:
投資要不斷學習的,如果投資因為自己分析不夠完整,下次就分析得更好。我15年前開始,一年平均睇50隻股,每隻要花6小時分析,然後一年只買1、2隻股票。
其實愛康醫療(1789)不算差,以長遠業務分析,正面的。
佢以「愛康」品牌從事設計、開發、生產及銷售骨科植入物,並專注於髖關節及膝關節置換植入物。
睇翻佢的資料,佢的產品包括用於初次手術的骨關節植入物,以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。
這股業務不差,有增長潛力,盈利增長,這反映企業有實際的價值提升。
不過,投資時要考慮價格風險。現價合理區頂,另外,佢業務是有潛力有風險類,因此要明白較為波動。
------------------------------------------------
Q22453:
成哥,我上年先開始學投資,果陣見到d科技股 升極都仲有得升, 有幾隻股等左好耐想入,之後早排回落左都算多 就入左 d,發現原來仲有得繼續跌
例如阿里 果陣300,跌到落 230 我無貨 ,果陣都見你話仲係略貴 但都係入左1手 ,依家落到191 ,其實都有信心呢隻股係無問題
但覺得買貴左好多, 如果當拒上返 大約23x度 我放一放,再耐心d等拒跌 比較平既價位再入 如唔會比較好?因為初初開始投資 唔知道原來耐性好重要
龔成老師:
阿里(9988)有質素,中短期一般,但長遠仍有增長力,之前貴,現價去翻合理區。
係業務層面,擁有相當的優勢,不少業務處於壟斷狀態,同時增長理想。加上正不斷發展延伸業務,這都會成為企業增長的潛力,預期增長會持續,這是阿里最大的賣點。
以企業的長期發展計,這股的確優質,但股價都有一定的波動,現價算是合理翻D,但都不是大手時候。
始終將面對內地監管可能收緊,因此風險度增加左,不過,我相信佢的整體優質度仍在,內地不是不想佢賺錢,只是想規管佢。佢已建立好完善的業務,因此本身是無得輸,只是賺多賺少問題,現時監管多左,點都會影響賺錢能力。
對於這類優質、有發展,但現價未算特別平的股票。
你有貨,可持有,上到230,其實未算貴,如果你賣出,無人知能否買得翻。
你這種想法,就是一種估走勢的做法,而巴菲特等投資大師,都不會這樣做(因為佢地認為無人能做到),你現時的想法,同一般散戶一樣。而我希望你能進步,加強知識,不要停留在一般散戶層次。
------------------------------------------------
Q22454:
龔Sir 你好
對於股票最近真係跌到懷疑人生
股票長期持有,其實應該點處理
有些股票原先有賺,但諗住長期持有,近期一直下跌,已經跌至虧損。
其實對於長期持有,應該係賣出?一直持有不理?還是依然要睇圖下跌時離場?
係咪就唔使理止蝕,只要長期持有就得?
應該點操作才對
龔成老師:
我記得2003年,香港樓跌到好勁,港股都是,我已有投資港股,當時好多朋友都講「港股玩完」「樓市玩完」。
98%的投資者,都會以短期股價做分析點(樓市都是一樣),這是一般散戶的思維,而投資大師,則能平常心面對股價,著重企業的長遠發展。
到樓市、股市升翻,散戶又話「如果比多一次沙士價我就好了」。
這種思維,就是散戶。
你現時,要睇翻該企業,有那些核心因素改變,分析佢3年仍的業務情況,推算佢盈利是否有明顯下跌,唔好好似一般散戶,只著重短期股價。
我希望你能進步,能學知識,而不是停在一般散戶的思維!
------------------------------------------------
Q22455:
阿sir ,企業質素有冇核心性轉差點樣睇?
龔成老師:
你要分析佢的長遠財務數據,分析3年後,財務數據會否明顯減弱,市場佔有率有否明顯下跌,產品的賺錢能力有否明顯減少。
------------------------------------------------
Q22456:
老師,除淨日會自行調整股價,即派$1息股價會減$1, 咁對於買股收息這件事,仲有咩用?反正收幾多息,股價都跌返個數
龔成老師:
對短期投資者,無用。但長線投資者,就是一種現金流的概念,你要以一盤生意去思考,你買入一盤生意,佢會分派股息,分派股息的當刻,市場價值會減,但只要不是短期去出,長遠生意又會慢慢增值,以及不斷分派股息。
------------------------------------------------
Q22457:
龔sir 你好,突然有10萬,我可以點樣漲大呢10萬價值呢?
我指的是買有咩股票好
龔成老師︰
你可以利用這10萬蚊,去投資一些優質股,進行財富增值。
我地投資會運用「先增值,後現金流」作方法,初期應投資較多增值類資產,較後期則應投資較多保守類項目。所以係分配投資項目時,會因應番你的人生階段。
如果你年青,可以「平穩增值股」+「潛力股」。中年人士,可以較集中翻係"平穏增長股"。當你已近退休之年,就應集中在「收息股」,去創造平穏現金流。你可以睇翻自已年紀,去作出配置。
潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里(9988)、騰訊(0700)、舜宇光學(2382)、小米(1810)、GX中國電車基金(2845)、三星FANG ETF(2814)。
平穏增值股︰盈富(2800)、港鐵(0066)、金沙(1928)、煤氣(0003)、恆基(0012)、中銀香港(2388)、長建(1038)、粵海(0270)、領展(0823)、希慎(0014)、太古地產(1972)。如有投資美股,可考慮:VOO。
收息股︰港燈(2638)、香港電訊(6823)、工行(1398)、恆生(0011)、置富(0778)、陽光(0435)、深高速(0548)。收息基金(3110),都可以。
大市現處於合理水平,那10萬資金,你可以先用一半,以"分注"形式慢慢入貨。餘下一半和每月儲蓄,就等大跌市機會出現,才大力度掃貨,並長線投資。
另外,收息股和平穏增長股,現處於合理水平,可分注入市。但潛力股,部份係略貴。
現時只有安碩恒生科技(3067)、GX中國電車基金(2845)、騰訊(0700)、阿里(9988)、中生製藥(1177)、福壽園(1448)勉強算在合理區中上至頂部,可分注入貨,其餘都略貴,想買就要等一等。
------------------------------------------------
Q22458:
龔sir ,我依家18歲仲讀緊書,啱啱出嚟做嘢試吓一兩個月,返緊地產行業,眼見好多人都好成功搵到錢,我自己都想成功,遲吓都會想玩下股票請問新手有冇啲咩要注意,
同埋想知道點樣先可以變到有錢,理財很重要嗎?
龔成老師︰
非常好,把握假期時間去工作,吸收工作經驗之餘,可以門開闊視野,對你將來選擇人生路係有幫助。
理財係十分重要,而且範疇好廣泛,由你打工儲錢,到投資增值。若你想成為一個有錢人,你就需要好好學習。
現時你要做三樣野︰
第一,增加知識,你要學理財及投資的知識,記住,投資並不是坊間的炒炒賣賣,你要從書本或課堂上認真學習。《股票勝經》適合初階者的。
第二,了解銀行及證券行,去開一個證券戶口,並準備做月供股票。
其實兩者都可以,銀行就較方便,但手續費就較貴,證券行收費就較平,香港的監管不差的,風險不大。你可以先了解下不同的收費。
第三,將每月的部分資金,去做月供股票,供指數基金。對初階投資者來說,月供股票是一個很好的累積財富方法,因為可避免你一次過在高位買入的風險。
原理如同儲錢,不過就不是儲現金,而是儲股票。計劃要長期進行。
另外,指數基金是一個組合,適合絕大部分人投資,風險不高,長期儲貨可助你財富平穩增值,記住要長線持有。
當你在做上述三件事的同時,開始學下股票,了解下那些股票適合你自己。上述只同你簡單供盈富,當你過幾個月,有知識及少少經驗後,就可以利用你手上的資金,其中一部分,去投資股票。
------------------------------------------------
Q22459:
龔老師。本人睇左好多你講關於月供股票、投資心態的文章和影片,真的獲益良多。本人30歲,工作繁忙,心感難以日日留意市場捕捉買賣價,
所以希望走向月供之路。以下是我的一些想法,希望老師指教。
每月可儲錢$25000︰
1. 5000 現金儲蓄
2. 5000 月供JPM 美國科技
3. 5000 月供JPM 美國企業成長基金 / 美國巴郡B ETF
4. 5000 月供建行
5. 5000 月供長建
如果可以,打算無限供,未知老師可否指教指教,謝謝
龔成老師︰
我地投資股票,其實等同投資一間企業。希望透過其自然增長,以達至財富增值的目的。所以,我地投資一定係長線,而唔係短期炒賣,去賺差價。因此,你係無成日睇住個市的必要。
而月供,係一個長線計劃,月供最少維持3年,並持有這些股票5年以上,才會有較理想效果。當然,如果企業質素一直無變,最好一直持有。因為,優質股持有時間越長,財富增值效果就會越理想。
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
以你30歲年紀,應以增值為主。你現時月供股票,大致係可以。但建行(0939)只係收息股,增長力唔高,唔建議你用來月供。
你可以用以下股票,去代替。
平穏增長股︰VOO、盈富(2800)、金沙(1928)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)
另外,現時大市只在合理區,現在你每月先用5成儲蓄,即$12500做月供。其餘先儲起,用一邊月供一邊儲蓄的策略。餘下一半資金,等大跌市出現,才去動用會較好。
------------------------------------------------
Q22460:
老師你好,我今年29歲,與家人同住,無男友,無投資經驗,無保險,每月可儲大約萬三,另有現金40萬。
最近有諗緊需唔需要買保險,另外因為同屋企人(妹妹)基本上喺屋企互當透明唔會講野,有打算搬出去住,但如果買保險同搬出去住,洗費就會大增,
可儲嘅錢就會變少,所以有所卻步,老師可以比少少意見嗎?
三個月前開始月供$7,000股票,分別為
港燈(2638)$500
長江基建(1038)$500
盈富(2800)$4,000
粵海(270)$1,000
安碩恒生科技(3067)$1,000
請問老師我現在嘅月供股票組合有問題嗎?有何需要調整嘅地方?麻煩老師了
龔成老師︰
如果無實際必要,我唔建議你搬出去住,因為會產生額外開支,拖慢了你增值計劃。
我地理財,要做到「攻守兼備」,保險、備用現金等是防守,但防守部分不用太多,餘下資金就應進攻。保險最大的作用是「保險部分」,反而投資作用一般不大。
即是買保險,最大作用是醫療、人壽、財產等的風險轉移,將你不想承受的醫療費用等不可預測支出,轉嫁比保險公司。但儲蓄保險這類產品,但不宜持有太多。
而我地投資增值,係會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你29歲,應以增值為主,你可以用有增長力的股票,去創造一個增值平台。
現在你每月用$7000做月供,其餘先儲起的策略,係正確。但港燈(2638)只係收息股,增長力欠奉,唔適合你。
現時大市只是合理區,你現有40萬資金可以先投入10-15萬,用"分注"形式,慢慢買貨。餘下資金和每月所儲倒的資金,就等大市出現一定程度的下跌,才大力度掃貨,然後長線投資。
同時間,你要去多讀投資相關書本、年報,新聞和課程。
書本上,你可以睇我寫架"80後百萬富翁"、"財務自由行"和"股票勝經",都適合初學者。
另外,本人的【投資倍升股課程】適合初學者的,每一課後都會有指引比你,要你在一星期內找那些資料,溫那些內容,只要你跟著去完成,到你讀完整個課程後,你已能自己選股、投資、評估平貴,在投資上已掌握了一定的知識。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
「寶可夢卡牌家庭組合價格」的推薦目錄:
- 關於寶可夢卡牌家庭組合價格 在 龔成 Facebook 的最讚貼文
- 關於寶可夢卡牌家庭組合價格 在 龔成 Facebook 的最讚貼文
- 關於寶可夢卡牌家庭組合價格 在 龔成 Facebook 的最佳解答
- 關於寶可夢卡牌家庭組合價格 在 [問題] 請問寶可夢卡牌現在還是很火熱嗎? - 看板C_Chat 的評價
- 關於寶可夢卡牌家庭組合價格 在 寶可夢卡牌家庭組合7-11的推薦與評價,FACEBOOK、PTT 的評價
- 關於寶可夢卡牌家庭組合價格 在 寶可夢卡牌家庭組合7-11的推薦與評價,FACEBOOK、PTT 的評價
- 關於寶可夢卡牌家庭組合價格 在 寶可夢卡牌家庭組合價格在PTT/mobile01評價與討論 - 母嬰生產 的評價
- 關於寶可夢卡牌家庭組合價格 在 寶可夢卡牌家庭組合價格在PTT/mobile01評價與討論 - 母嬰生產 的評價
- 關於寶可夢卡牌家庭組合價格 在 寶可夢集換式卡牌遊戲台灣 - Facebook 的評價
- 關於寶可夢卡牌家庭組合價格 在 寶可夢卡牌家庭組合價格 - 全台民宿& 旅館情報網 的評價
- 關於寶可夢卡牌家庭組合價格 在 寶可夢卡牌家庭組合在Youtube上受歡迎的影片介紹|2022年04月 的評價
寶可夢卡牌家庭組合價格 在 龔成 Facebook 的最讚貼文
【龔成問答信箱】(Q20201-Q20220)
Q20201:
你好,龔SIR。我係之前上過你基礎班既學生。我用左市盈率去估值02382 舜宇光學科技。
市盈率,我用左2016至2020 既每股盈利既平均數去做合理每股盈利,之後再去你比的價網揀左2016至2020既市盈率,因為我見2010-2015個市盈率好低,有少少吾夠代表性。
所以就用左2016-2020再排大至細,抽中間3個。 就用左32.12 同37.06。再乘番每股盈利$2.28。 之後計出黎再加減10%。
計到出黎就係65同92,我想問我係咪應該調高番少少個市盈率,定我計錯左?
係咪可以參考番02018 瑞聲科技既市盈率去做市盈率參考?
龔成老師:
其實你計算無錯,我地估值無絕對的方法,不同角度會有不同的結果,有時我會同時同幾個角度去估值。
而「2010-2015個市盈率好低,有少少吾夠代表性」,你正確的。
你計算的方法,是一個較為保守的方法,而我認為保守是無問題的。但好多時我會同時用另一情景去估值,就是假設佢有較高的增長。
雖然瑞聲(2018)同舜宇(2382)是同行,但增長力及技術發展好唔同,因此,強行比較未必適合。
舜宇以佢最新的增長力及長遠發展,同30倍市盈率是可以的,只是運用EPS時,可以有較多的預期因素,根據不少大行分析,佢2021年的每股盈利,平均預測去到$5。
當我地為高增長股進行估值時,過往的數據參考價值會低左,反而同將來數據會多D。如果以$5及30倍市盈率作基礎,$150都是合理價。
------------------------------------------------
Q20202:
一直留意,你所揀嘅每隻都好有抗跌力,而且總係倍升!
最近個市回咗好多,個個都想從中尋寶,但點先可以做到你咁百發百中,百分百準確呢???
龔成老師:
大量分析,小心出手。
我平均一年分析50間公司,這些公司都是經過選股過程後,確認了是基本的優質股,然後再每個星期,花6-8小時去睇一間,以了解佢的優質度、平貴。
雖然一年分析50間公司,但我會好耐心,等佢地跌到平,或接近平的水平,先會出手。買入後就長線持有。
而一般的散戶,實在太心急,第一,唔做功課,第二,好心急就下決定,唔會耐心等靚價先買,第三,無耐性持有,升少少就賣。
------------------------------------------------
Q20203:
老師你好,我在172入了(6618)京東健康現跌了,你認為應該放長線還是早走早著呢 前景如何?
另外也想入1610 中糧家佳康 如果中短線的話現價可以嗎。謝謝老師
龔成老師:
京東健康(6618)由京東(9618)分折出來京東健康,將會來港上市。這股可長線。
其業務主要提供線上線下的醫藥出售和健康管理服務,業務布局包括醫藥電商、互聯網醫療、智慧醫療解決方案、健康服務等4個大板塊。
京東健康旗下京東大藥房,更是內地線上線下收入規模最大的零售藥房。其互聯網醫院,日接診量超過10萬次。
質素上,京東健康是有的,我相信前景是正面的。但由於估值難,不確定性大,同時暫時略貴。如果你持貨不過多,持有就得,有得守,但就預股價上落較大,因為現時股價始終唔平。
中糧家佳康(1610)主要從事飼料生產及生豬養殖、生產及銷售生鮮豬肉及肉製品(以「家佳康」和「萬威客」品牌出售)等。
佢亦於家佳康專賣店及透過大型電商營運商銷售部分產品。
整體質素中等,唔算差,但又唔算好好,佢會受肉價的上落影響,影響左盈利,令佢盈利上落大,有試過出現虧損。因此,佢會比較被動。
現價算是合理,但質素未算好高。長遠發展都有,但預佢中短期波動,這類股又唔太值得持有好多。
------------------------------------------------
Q20204:
老師想問多樣問題, 謝謝老師
我而家持有2013, 6186, 175, 6690請問可以長線持有嗎?
龔成老師:
可以,但部分股要留意風險。
微盟集團(2013)業務的確是將來發展的大趨勢,從業務潛力上,的確是有的,見佢財務數據的增長都強勁。但在估值上都略貴,股價可以好波動,不建議太大注。
至於另外3隻,都有質素,但現價都唔算平,都要注意風險,可長線的。
------------------------------------------------
Q20205:
龔成老師,請問你熟悉台灣股票市場嗎?台灣股票市場有如香港市場般月供股票嗎?
如果有,台灣有沒有月供股票如你常推介的盈富基金呢?
因如冇意外,將於5-6年後移居台灣,想趁在香港能揾多個錢既時候,可以係台灣投資一下,制造生活費💪🏻
感謝你的寶貴時間解答
龔成老師:
我不熟識台灣股市,但我相信都有這類月供服務的,你可以去銀行問下,但唔清楚台灣有無得月供盈富(2800)。
其實,你可以供其他指數基金,我相信台灣是有的。又或你可以供美股指數基金,例如VOO,都是可以長期月供,長線投資的。
------------------------------------------------
Q20206:
龔成老師,想請問一些理財疑惑?
現在我有一個車位,一次過買的,價值約100萬,我希望再攞去貸款,但銀行只可以我係佢哋銀行買投資產品才可以貸(例如基金),貸款利息現在約為2.2,可貸10年,最多20年,本人現時40歲,有穩定收入。
現在懷問是我應該憑月薪月供股票(都是老師建議那些其中一隻),或貸款用一大筆錢買銀行建議的基金,佢話三個月有一次息,回報大約7%,主要大陸的內銷,當然仲有多基金選擇,這個只是其一推薦的。
龔成老師:
最重要是睇「質素」,不要為借而借,不要為買而買。
你要睇翻銀行的產品,當中是否有真正的質素,長遠有無增長力。你要睇翻佢的投資策略,過往回報,風險度,如果你認為不差,就可以進行。
------------------------------------------------
Q20207:
龔sir你好,我有嘢想請教你,因為我老公太衝動買咗掃管笏一房310呎低層,呎價大概$169xx。同區隔離一年樓呎價都係萬一至萬三,我好貪心蝕多。我同佢講好唔好撻訂,冇咗廿幾萬就算。
第一次買樓,佢成日聽身邊朋友樓市一定向上。
但掃管笏太隔涉,同埋青山公路樓價水平都係低,萬一至萬二,但佢而家買咗萬六七一呎,仲要不是會自住的,風險好似好大吖?
我知你係股票專家,不過我都希望你俾少少意見,我心好煩,成日訓得差
龔成老師:
我先從香港樓市分析,在長遠計,我仍相信樓市在長遠計,因供求關係,仍是向上多。因為現時香港買樓的需求仍大,而長期供應不足,加上政府往後施政只會更加困難,好多所謂的大計劃都未必能夠實行,又或最後規模細左。
另一方面,需求大,我見唔少適婚年齡的朋友,都正等機會買樓,但未買樓,這些是「潛在需求」,過往每年不斷累積,只要樓市跌少少,就會有需求走出來,這令樓市不能大跌。
另外,樓市另一作用是「投資」,現時的租金無大跌情況,以投資回報率的角度分析,樓價都不會大跌,因此樓市平穩。
長遠計,租金及樓價會平穩,有少少向上,但不是倍升,不會好似過往般倍升,而是平穩向上。
至於你的樓,你要比較同區同類單位,大家的呎價,以及預期租金回報率情況,如果你的單位明顯貴,就要小心。如果差不多,就問題就不大。而我見你的的呎價比同區較貴,的確有點煩。(不過新樓有少少呎價高是正常的)
另外,買樓最大的原則,就是「供得起」,只要這方面你地無問題,其實是有得守的,如果你在供得起方面無問題,就勉強可以照進行,但你預一開始,你地已經用了較高價格買了該物業。
其實現時,撻訂與否已經是兩難,如果供得起可照供。最大問題不是樓市,是該樓盤你地買貴左。
------------------------------------------------
Q20208:
您好!
新手你那本比較好
因為太遲才明白您教的真理(資產vs現金)工作多年只有儲現金,今年7月開始(51高齡失業)才開始整理公積金及買股票
但今天一手都是蟹貨如下:
(9988有20手@285,
002有4手@73,
001有1手@58,
1810有1手@30,
2158有2手@60,
1055有7手@4.3。
請問如何是好
龔成老師:
你可首先睇:
《80後百萬富翁》
《股票勝經》
《財務自由行》
之後再睇其他。
書本在三聯、商務、誠品都有得賣。由於部分書在一些書店已斷,所以若你見唔到,問下職員就得(又或向職員訂都可以)。
以下是我的12本書:
《80後百萬富翁》(第8版)
《80後2百萬富翁》(第4版)
《80後3百萬富翁》(第2版)
《財務自由行》(第6版)
《大富翁致富藍圖》(第4版)
《50優質潛力股》(第3版)
《50穩健收息股》(第3版)
《50值博倍升股》(第1版)
《股票勝經》(第3版)
《選股勝經》(第2版)
《年報勝經》(第2版)
《5年買樓4部曲》(第1版)
至於你現時的組合,以你的年齡,可投資一些平穩增長型的股票,例始盈富(2800)、港鐵(0066)等。
至於你現時的持股,阿里(9988)可守,但就不要加注。
醫渡科技(2158)可守,但不宜持有太多。
中國南方航空股份(1055)質素都有D,但不算強,不宜持有太多。
------------------------------------------------
Q20209:
龔Sir,您好,我有一個財務需要個案,想聽取您的寶貴意見,想在現在的財務狀況底下達致每月額外享有被動收入HKD10-15萬。
一家五口財務狀況如下:
>>>>家庭balance sheet
Assets: 1) 現金、定期存款、保險產品、基金: 約HKD25,000,000
2) 自置物業1單位市值: 約HKD20,000,000
Liabilities: 1) 按揭貸款結餘: -約HKD7 百萬 (負債)
>>>>>>5 人家庭,3 未成年在學子女,幼子患長期病每月需付7-8 萬醫藥費,只有夫(46歲)工作每月總收入約HKD18萬
現為公司高管人員,但行業是傳統行業,正在受新經濟模式衝擊,恐式微,未來10年內有失業危機,到時一家經濟必定相當困難
而妻(44歲)是家庭煮婦照顧屋企。夫月入即家庭總月入HKD18萬已是剛好滿足家庭每月總開支包括保險供款、按揭還款。
>>>>>>目標: 想達致每月額外享有被動收入HKD10-15萬,令家庭開支可以鬆動些,應付開支之餘也不需要支取備用現金
定期存款,這些本來預備幼子突發醫療額外開支、子女出國升學開支與及兩夫婦日後年老的生活費。謝謝!
龔成老師︰
你每月已無資金可用作投資,故只可在你資產中,抽出部份來做投資增值。
若你預期你先生,大約十年後收入會有大變動。我地就好好把握這十年,去為未來架風浪做好準備。
如果你希望每月有10萬蚊現金流,以股息率5%計,你需要本金2400萬。你可以動用你現金和定期去增值,至於基金,你可以睇翻佢本身回報如何。你可以用盈富(2800)年平均8-10%去做比較,決定是否值得投資。
但由於你家庭未來收入有不確定性,投資前必需預留最少半年開支(包括日常支出和小朋友醫藥費,你可因應自己情況調整。),才開始投資。
現時大市在合理區,你可以將扣除應急錢後的一半資金,用分注形式,慢慢投入以下優質股。餘下一半,就等大跌市,才大力入貨。
平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、領展(0823)、粵海(0270)。
當你財富累積到2400萬,你就將佢慢慢轉換成一些優質收息股(目標係有5-6%股息率),咁就可以創造每月額外10萬現金流,來支持生活開銷。
------------------------------------------------
Q20210:
你好!首先真係好多謝你!你是我在投資方面的啟蒙老師!仲記得兩年前我剛剛開始投資時的得一兩萬,然後在你的指導下,開始開源節流!不斷睇書學習!
直到上年3月疫情大跌,就不斷入貨買入優質股,賬面獲利不少,財富終於有6位數,雖然只是一個小數目,但係意義重大,我深信我會在4年後 我畢業時會賺到人生第一個100萬!真係好多謝你!
另外有幾個關於投資問題想問下老師
1.小米。因為公司已有淨利,可以用市盈率推算合理價,根據Q3 每股盈利0.57,預測全年盈利0.8,過去平均市盈率30,推算合理價24,這樣對嗎?
2.以peg推算合理價,現在小米市盈率為47,peg等於1為合理,小米要做到盈利增長率47%,應該比較困難,所以當市盈率為30時,股價會較為合理?
3.關於指數基金,我認為是一個對新手非常好的投資產品,一直不明白為什麼有人會批評啊sir,另外如果想買追蹤中國股票市場的指數基金,3188還是2822好,3188好似更分散,2822比更集中金融行業?
4.由於市場越來越有效率,要找到價值比價格嚴重低估的股票越來越困難,如果遇上非常優質的股票是不是值得以高於合理價的價位買入?
問題有點多,麻煩龔sir了,再一次多謝老師一直以來的指導!!!
龔成老師:
太好了,累積財富是一個過程,你只要保持儲蓄,投資優質股,長線持有,財富就能保持增值,我相信你一定能累積到$100萬!
1)當我地分析時,會考慮企業現時的盈利去得出市盈率,以及預測下年度的盈利,去進行推算。
如果推算的全年盈利為$0.8,假設股價$30,預測市盈率就是38倍。
2)你都可以咁講。
但PEG只是一個輔助工具,只是參考下,不能成為估值的核心。
3)因為我已收到風,有行家請左打手攻擊我,我搶左人生意。
其實我無所謂,我唔會用這些手法,我地做好自己就得。
連巴菲特都叫,如果無選股能力的投資者,應該投資指數基金。
你可以考慮3188。
4)如果是有增長力的優質股,就算略貴,都可以小注買入,之後先等跌到合理區正式入。因為如果一直等跌,有機會等唔到。
------------------------------------------------
Q20211:
龔sir, 多謝你之前的指點。近排大市都幾熾熱,你認為應該在現時的股票加碼好,定係買多隻唔同的股票好?
個人睇好舜宇(136入得1手),AIA(1手ipo). 3033就5手@7.79
定係入吉利汽車?
我覺得瑞聲增長慢,好似唔太郁,都返唔到53水平。移卡我就覺得貴,唔捨得加注
龔成老師:
我地最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能太多,同一股不能太多。要平衡,建立後長期持有,不是買賣賺差價,而是成為你財富組合一部分。
你上述持有的都是有質素的股票,可持有,如果你想加,可加吉利(0175)。瑞聲(2018)增長力唔算強。如果你想加潛力股,就3033,但要慢慢分注入,因為現價唔平。
------------------------------------------------
Q20212:
我想問下組合-需加?
有01833 06993 0788 3088
以下不定時入
3067 1810
09988 0006 0823
2800 太高.我應該入嗎?什麼價位好?
2802/2809/2826-現價位是否太高? 小米仲應該入?
2802/2809/2826-是否可以只選一個?
龔成老師:
你現時持有的,都是有質素的股票,你持有就得。
至於你不定時加入的,都可以,都是有質素的,只要你不要太急一次過入,慢慢分注同時留現金就得。
至於盈富(2800),仍是處於合理價,可分注。
至於上述3隻ETF,你同時投資都可以,都有潛力的,如果3選1就2826。
------------------------------------------------
Q20213:
Hello 龔sir真係好開心呀!雖然我哋大家彼此未見過面,但我真係當你係我嘅老師 !
你可以睇睇我哋上次嘅對話係七月 果次我講要喺30歲前上車 但結果26嘅我同先生喺上年九月買左我地人生第一層樓 今個月仲收埋樓添!係難以掩飾嘅興奮同埋喜悅
睇左你嘅書 睇你Facebook ,人生、財富、投資思維大大改變 發夢都諗唔到竟然可以喺咁短時間之內上到車,全部都係靠我哋自己!
真係非常非常非常多謝感謝你!我當左你係我嘅人生教練 ,都希望可以同你分享呢一份喜悅 。
我們的暫時現況:
先生工作非常穩定 但我受於疫情關係 已經足足一年 收入超級不穩 只有8、9千蚊每月 我們暫時可以話係負債累累(因為要供樓同應付裝修費還有日常) 我哋嘅積蓄淨剩返幾萬蚊
我哋仲有計劃遲下生小朋友 所以我哋想好好建立返我哋嘅儲蓄組合/計劃 睇咗你好多書 所學到嘅
我哋而家應該由月供股票開始儲起 這樣做正確嗎你認為
最後
祝你新年快樂 新一年搵多啲
盡快達成你嘅目標 無論事業愛情家庭都好好好!
萬分感激!一切盡在不言中
龔成老師:
太好了!恭喜!
這是你努力的成果!繼續加油!
你都要記住,「供得起」原則是最重要的,你要預留資金去供樓。特別你話收入不穩。
我建議你儲多D現金先,唔好太心急投資,做好防守,先做進攻。不要急。
到你有一定的現金,就開始月供或分注投資優質股,以「先增值,後現金流」的模式進行。
加油!保持進步!
------------------------------------------------
Q20214:
老師,我今年三十二歲,乜嘢都無既女人仔一個,假設我以後無男人無仔女養,有八十歲命,做野做到五十幾歲生產力下降
咁我仲要交租食飯醫療到底要用幾多錢?我估計最起碼要四百萬。
意思即係我呢二十八年每個月都要儲萬二蚊呢個計法有冇問題?
如果依家首先朝住一個目標去買三百萬以下既新界村屋當養老,暫時唔係自住既,係呢二十八年入面實現咗先,放租又好放係度都好,去到以後既生活係咪過得輕鬆啲?我唔識計劃可唔可以教下我?
龔成老師:
你32歲,醒覺到有這問題,有些人到50歲先醒覺,你現時仍有時間準備,可以以$400萬為目標。
你只要利用儲蓄、投資,其實是可以做到的,不用太過擔心。
而你考慮投資物業,都可以的,因為物業是資產項,長遠有租金,就能提供現金流比你。
我會建議你唔好只考慮單一資產,而是建立一個財富組合。
第一步,你要儲蓄。
第二步,要學投資,利用一些穩健工具,例如穩健股票,月供模式去滾大財富。
第三步,利用增值後的財富去投資物業。
第四步,如果有閒錢,同時投資股票,進入「股樓並行」狀態。
第五步,到年齡大時,再進行財富配置,集中在現金流類別資產。
另外,我建議你睇《5年買樓4部曲》這書,幫到你的。
------------------------------------------------
Q20215:
龔成老師,我呢幾日諗唔通想請教你心態問題。由2020年8月開始我投資幾隻平穩增長股:領展、粵海、阿里巴巴、小米等,平均都有8%增長,賺了一萬左右;美股方面就只夠膽買了幾隻加埋都唔夠50股。
這兩天朋友炒2隻美股,容易賺了2萬蚊。知道你叫人唔好炒股,我自問也沒有膽量和時間去炒。但我用了半年時間也比她只用數日賺得少...很難不去比較。
1. 因為我本金不多加上港股升幅不及美股,看見朋友也沒有甚麼投資知識,只看股票app討論區資訊,心思思令我都想玩幾隻短線的美股是否未嘗不可?很需要加快在幾年內儲夠首期...
2. 說回港股方面,我每隻股現只敢最多投資3萬...有興趣的股又實在很多,零願找一隻新的投資也沒有加注在現有的。想問你應該如何決定何時加注?
3. 還有不論美股還是港股,等了一段時間都總覺得是高位難以入場,QQQ/VOO/ARKK等也是,即使回少少都係唔敢入得多,等又好像浪費時間的...亦有很多評論至2021年將會大跌。我應該繼續耐心等,還是不要理這些預測繼續分注入場?
很想加快賺錢儲錢...不想再無了期交租
龔成老師:
1)有時,短炒你會見到有較好的回報,有時,長線會較好回報,我只能夠用大數去同你講,在我過往做10年銀行與證券行,短炒者,大多輸多贏少,當然,有人贏的。
人很喜歡以短期、當刻的或績作為指標,但你可睇下巴菲特,70年經驗,久唔久都有人話佢的方法不及短炒,但時間證明,佢的方法是最好的。
你的方向其實正確,但你都要明白,你投資的,大部分都是平穩增長股,你財富平衡增長,是正常的。
如果你學你朋友,有可能財富有較快增長,但背後就承受了較高風險,你要理性問自己,自己的風險承受程度如何?
你唔好睇表面,要睇核心,睇長期。
你見人賺錢多過你,但要同時想想,佢承受的風險比你多,這點你一定要明白!如果投資只想回報,不想風險,好大獲!
2)我地最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能太多,同一股不能太多。要平衡,建立後長期持有,不是買賣賺差價,而是成為你財富組合一部分。
如果你想組合有較好增長,可考慮月供3067。
3)唔好信「預測」,我投資20年,見預測都是一半半準,即是同買大細無乜分別。
建議你分注投資,同時留現金就得。
------------------------------------------------
Q20216:
老師,想告訴你一個好消息!我媽媽之前成日炒炒賣賣,之前我不斷叫佢跟你既方法。佢終於在幾個月前建立左收息,同平穩組合。佢今日同我講,佢好多謝你
佢個portfolio 都因為夠平衡,所以呢幾日升左好多
龔成老師:
太好了!
記住,我地是「配置」,同時這是長期過程,唔好太在意短期股價。方向已正確,集中收息就得。
------------------------------------------------
Q20217:
現時有45萬現金,阿里巴巴229入左兩手,上個月開始月供2000(2800),每月人工扣除供樓等其他開支另外可儲3000,想每月買一手3067做投資可5可行
定係有其他更好既儲錢方法?
想2年內儲到100萬
龔成老師:
財不入急門,我地最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
你可以照上述方向進行,現時$45萬,部分可投資舊經濟股,而新經濟股如3067,慢慢買入就得。
總之,要留有一定的現金,如果大市有較大的下跌,你就可以把握機會入市,能有效提高你回報的。因此,平衡組合都很重要。
------------------------------------------------
Q20218:
老師,以下係我之前買入嘅股票,輸多過贏,依家我應該點做,如果要重新部署,應該要點?
求指導
5、455、745、755、1469、1776、2389
龔成老師:
記住,你最重要不是睇「賺蝕」,不是睇「買入價」,而是睇質素。
你要分析「之後的組合情況」,不是過去,是將來。應該持有那些優質股,比例如何,能為你帶來怎樣的長期財富。
你要分析你的投資目標,你想潛力股的比例多少?平穩股的比例多少?組合風險程度如果?
即是你想設計一個怎樣的投資組合?長期、優質、平衡、適合你。
天大藥業(0455)、中國國家文化產業(0745)、結好金融 (1469),質素不佳,建議賣出。
至於其他,質素都不是最高,不過就未算差,可以持有。但如果日後有資金,應該投資其他更優質的股。
------------------------------------------------
Q20219:
老師,你時常叫人月供2800,或買入,長揸3至5年,但佢 估價唔係成日上上落落,咁 淨係賺去息口, 咁我要買好多錢先可以, 因為我屋企有個準備退休嘅長者, 請指教
龔成老師:
我地永遠要睇「風險與回報」。
盈富(2800)並不是高回報類,是收息加基本增長,而好處是風險不高,有「穩中求勝」的作用,因此適合大部分投資者。
如果你想有較高回報,你可考慮安碩恒生科技(3067),當然,風險度會高左,你要自己衡量投資多少。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。所以有長線持有價值。由於基金有30隻股票,比起單一股票,風險能減低。
不過,現價都唔平,大約在合理區頂至略貴,因此,這刻不能大注投資。最好的策略,就是月供,或自行分注小注慢慢收貨(例如每月買一次、或2個月買可次),總之慢慢入,不能用盡現金,原理如同不斷儲貨,這樣就能平均買入價,減少風險。然後就長線持有。
記住,我地要「先想風險,後想回報」,如果是退休用,就要保守D,可能投資一些收息股更好。
------------------------------------------------
Q20220:
龔sir, 我睇咗你幾本書。我好同意你講將幾章節要將冇升值能力既股票沽出。我手頭上有30000股[email protected]平均入,而家賬面已經-50%
其實應該由佢放喺度定應該放棄,可以指教一下嗎?
龔成老師:
最重要不是睇「賺蝕」,不是睇「買入價」,而是睇質素。
你要分析「之後的組合情況」,不是過去,是將來。應該持有那些優質股,比例如何,能為你帶來怎樣的長期財富。
你要分析你的投資目標,你想潛力股的比例多少?平穩股的比例多少?組合風險程度如果?
即是你想設計一個怎樣的投資組合?長期、優質、平衡、適合你。
創維集團(0751)從事電機、智能系統技術業務、智能電器業務等,中國及海外都有市場。
近年增長力唔算強,生意未見有擴展力,盈利有點波動,整體的品牌價值及銷售網絡,未算好強。長遠發展力只是一般。
現價合理,但你預佢增長力唔算強,長遠算是不過不失。
所以,如果你想組合提高增長力,可以賣出。或賣出部分轉其他。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
寶可夢卡牌家庭組合價格 在 龔成 Facebook 的最佳解答
【龔成問答信箱】(Q19201-Q19220)
Q19201:
阿Sir, 我係買股新手,學人高追短炒諗住可以賺少少啦,入左就係咁跌
當日睇大行報告目標價會升,其實某d大行借有利消息氹人入貨,抬高曬個價之後佢地就沽空,散戶就落搭...係咪咁樣?
我真係後知後覺,未見識股票世面阿sir, 我最近有開始睇你d書同fb page, 多謝你無私分享你既知識,其實我都知唔應該高追炒消息,但貪心想賺少少,不過自己未衰過都未知死...
另外你可以講多啲關於大行造價呢方面既野嗎?或者你有冇邊本書有提到?
謝謝龔Sir!另外請教阿Sir
龔成老師:
第一,之後唔好再短炒,無著數的。
第二,大行報告好多目的,唔知的,因此參考下好,唔好盡信。
其實你著重了解大行的目的,根本無意思,你應該花時間集中研究「企業業務」,你買股票就是買入企業,你應該著重這企業的基本面。
第三,買股票要有好強的心理質素,股價上落好正常,要平常心。
第四,你要以「長線投資」為方向,建立一個平衡的組合。
------------------------------------------------
Q19202:
龔成老師,您好!小弟自從睇咗老師您嘅Facebook page同書(買咗4本,睇咗3本:1. 股票勝經 2. 財務自由行 3. 選股勝經)之後都獲益匪淺,絕大多數問題都解答到,仲plan緊未來疫情好轉後參加您嘅股票班,所以多謝您先!
但喺目前有一個疑問我喺未諗得通,好frustrated,想請教一下老師您,希望您可以俾一啲意見,指點迷津。
我喺2019年頭嘅時候入咗2000股電能(0006),當時$53.5/股。然後疫情爆發,0006一直都徘徊喺$40左右,反而手上其他股都升晒。
我知道老師嘅概念喺優質嘅股票不妨長期持有,但當時買入嘅時候未認識老師您,當時買入嘅目的希望喺收息,但而家功力又未深厚到可以評估到佢價值如何。
所以我嘅問題喺,我應該點處置呢隻股票呢?應該繼續持有等佢返鄉下?賣出轉買其他優質股?還是其他做法?
多謝老師嘅時間同意見!
龔成老師:
其實,我地最重要是「配置」,建立一個長期的投資組合,要優質,要平衡,買入價、賺錢,並不是重點。
電能(0006)雖然有質素,但只是收息股,你要衡量自己的投資目標及風險承受程度。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
因此,你要睇翻這股是否長期持有,又或收息股應該佔你組合的比例。
這股本質無問題,但你預佢增長力不強。
------------------------------------------------
Q19203:
你好,想問點睇佳兆業美好2168
龔成老師:
佳兆業美好(2168)由佳兆業集團(1638)分拆上市,整體都有質素的,有長線投資的價值。不過規模不大,母公司不算強,因此估值不會太高。
佢主要於中國提供以下四項服務:
(1)物業管理服務:提供秩序維護、清潔及園藝、維修及維護,以及客戶服務等,物業管理組合涵蓋住宅物
業、商用物業、寫字樓等。
(2)交付前及顧問服務:於物業交付前向物業開發商提供建築工地管理以及示範單位及物業銷售場地管理服
務;亦向其他物業管理公司提供物業管理顧問服務。
(3)社區增值服務:提供停車位租賃、公共空間租賃、家居生活及物業交易等增值服務。
(4)智能解決方案服務;與第三方承包商合作向物業開發商提供自動化及其他硬件設備安裝服務。
睇翻佢的財務數據,正面,生意與盈利有不差的增長,現金流強,有長線投資。
現價合理,不過行業股價上落較大,要注意風險,同時這股規模唔算大,因此唔值得太大注。
------------------------------------------------
Q19204:
Sir,我睇翻上年成績,股票➕股息回報率14%,對我來說也是不錯的回報率。自從2018睇到80後百萬富翁後,資產增值係好事,但最重要的是我在您身上得到啟發,真心多想您。
新的一年我都必須更加努力,完成自己的夢想。
「財務自由係每個人最基本的權利」
謝謝龔sir!
龔成老師:
太好了!
我好相信累積財富是有方法的,只要不斷增加知識,財富自然保持增長,繼續努力!
------------------------------------------------
Q19205:
龔成老師,最近有d問題想請教下阿sir你,因為怕等唔切股票班先問。
2013年喺深圳福田區買咗樓,呢層樓係同我家姐夾份買嘅,因為最近樓價升得好勁,而我同家姐各有家庭所以決定賣咗層樓分返開d錢。所以我將會有大概$2,500,000港幣現金。
講一講我背景先,我36歲,有一子,我同太太加埋月入$33,000,喺香港有一層樓自住 (係我同太太聯名買,剛住滿1年,要住滿3年先可以提早還款), 每月供樓大概$13,000,我同太太都唔大駛嘅,冇車,公司有手提電話費,交通,午飯錢津貼,所以基本駛費主要都係保險錢+雙方父母家用+日常生活開支,大概每月$15,000, 每月可儲蓄$5000。
我本身有一半係泰國人,擁有泰國身份,打算2023年移居泰國,我打算到時將我現居所嘅貸款還1半,再將間屋租出去
估計到時每月會有港幣$6000收入,到時去到泰國都係想以投資股票嚟過活,因為暫時未知喺嗰度可以做d乜,喺泰國我有一層樓,所以冇住屋嘅壓力,我諗主要駛費都係小朋友讀書嘅開支。
好嘞,問題嚟嘞。我想知道我呢$2,500,000應該點部署?
我自已暫時個計劃如下,想請教老師你覺得我有冇諗得唔啱嘅地方或可以更好嘅建議。
- 2年後 會用1,400,000用嚟還現自住樓的貸款(連租金收入有$6000收入),所以呢2年可以用呢筆錢嚟投資。
- 400,000投資股票 (暫定),上完阿sir嘅股票班後再作調整。
- 施政報告將非自住物業撤辣,令我想投資一下車位,我想買入沙田區1或2個車位嚟到收租,因為我見暫時重有80-90萬嘅車位可選擇,月租$2000-$2200,打算一炮過買入1個或2個,你覺得可行嗎?
唔好意思,文字有d長,多謝你嘅耐心同埋時間!
祝身體健康!感謝龔sir!報左你堂,上堂見!
龔成老師:
$250萬,建議有$100萬留現金,無論是備用,加上等你之後償還現時部分按揭,當中的$100萬,都建議只留現金。
因此,可動用的資金大約為$150萬。
至於車位,唔建議投資,第一,現價唔算平,租金回報率低。第二,你長遠已會將香港物業放租,因此唔需要太集中在香港的固定資產類別。
加上你日後過泰國,現時唔應該投資太多固定資產,應該持有一些流動性較強的資產,這樣會比較彈性。
$150萬現金,可以部分投資股票,部分就等機會投資。你這年齡,財富仍有增長力,可投資平穩增長股,而具體的方案,我會建議你上完堂先開始進行,唔好急。
至於現時股票,就上完堂先變,同樣不用急。上堂見!
------------------------------------------------
Q19206:
成哥、你好!想請問現在有百多萬mpf.本人三十八歲、一半係Manulife 自2010開始供康健護理
其如一半在Aia。之前放咗喺中華基金、三月因為疫情放咗喺stable bond fund.想請教應該點樣可以提高回報。謝謝你
龔成老師:
強積金的配置其實唔複雜,你只要按你的年齡階段,去進行分配就得,年輕時較進取,中年平穩,退休前就保守,你按年齡,慢慢跟這樣比調整就得。
而選擇方面,我建議你買追蹤恆指基金。因為恆指當中已包括很多中港有質素股票,絕對適合長線持有。
我自踏出社會工作後,強積金都100%恆指的,我當時公司選的強積金公司,有隻基金好簡單,就咁完全追蹤恆指,所以我就選左果隻。
以你的年齡,財富仍有增長力。相信仍可承受風險。
Manulife保持進行。
Aia則選一些追蹤指數的基金,如睇好美國,就選指標普500指數的基金,如睇好中國及香港,就追恆指。之後唔需要轉來轉去。
------------------------------------------------
Q19207:
龔SIR,您好呀
唔知我可唔可以問少少野
(呢幾個月開始留意開龔SIR你,同埋我都有買到<<80後百萬富翁>>睇緊學習緊知識)
我係澳門人,手頭上有現金10萬左右
基金大約9萬左右
安聯增長及收益 7萬(供左三年左右,依家收緊息)
霸菱環球高級抵押債券基金 2萬(供緊3千一個月)
咁股票就係3萬左右
中通 50股(218)
圓通 4000股(6.67)
想問下龔SIR你呢
我應該點樣去部署我GE投資組合會好D?
因為我見6123個價係咁跌....唔知守住先定係放晒佢
多謝龔SIR~~
希望唔會煩到龔SIR你~~
龔成老師:
基金要睇翻當中的投資策略、質素,你可以比過往佢的回報以及大市的回報,睇下佢的表現如何。
你唔好太心急去增加股票,$10萬暫時只動用$5萬,要慢慢睇機會,要時機先出手。同時,唔好再買入同一行業的股票。
你可以考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
至於你的持股,中通快遞(2057)有質素。
睇翻佢的資料,佢係中國較領先的快遞公司,於2002年成立,按總包裹量計是中國領先的快遞服務供應商,市佔率約2成,佢通過全國性網絡提供送件服務,以及其他增值物流服務。
佢的網絡基礎設施,由90個分揀中心與282條自動化分揀線,由約9,050輛自營幹線車輛服務超過3,400條幹線線路組成,網絡覆蓋全中國。
至於財務數據方面,生意與盈利都不差,不過,始終新上市數據未必好準,要慢慢先見真章。現價平就唔平貴,不過有發展的,如果小注無問題的,這股值得長線。
圓通速遞(6123)本身係一家以香港作為總部的國際貨運代理服務供應商,業務已擴展至多個國家,並在亞洲、荷蘭及北美設立了幾十個辦事處。
佢主要經營以下四項業務:空運及海運貨運代理服務、總銷售代理、配套及合約物流服務。
早前阿里巴巴(9988)入股增持,令股價大上大落,這的確會令企業有更多發展,前景正面,不過,估值方面已難。
因為這刻根本無法計算佢,之能賺多少錢,企業發展情況如果,只可以話好多不確定性,但股價就反映大部分利好因素。
因此,這股雖然有發展,但同樣股價上是有風險,相信之後的股價仍會波動。只可以話,這類股小注持有不是不可,但要明白風險因素。
要留意,唔好太集中在同一行業。
------------------------------------------------
Q19208:
龔成老師 我想問2018瑞聲依家依個位算唔算值得長線吸納 我見佢啱啱份業績雖然聲學唔係太好
但係光學業務開始有增長 我見同業2382舜宇做光學 但升到依個高位
相對之下2018如果光學業務繼續有穩定增長咁咪變相現價咪平左
同埋出面市場D人好似唱到好衰好似放棄佢咁
龔成老師:
瑞聲科技(2018)不差的,本身有一定的規模與技術,長遠發展正面,不過,佢增長力不是好強,只能視為平穩增長類別。
現價合理,可以分注投資,長線持有。
佢在聲學方面的技術較強,雖然都有發展光學業務,但未能稱為強的狀態,反而舜宇光學(2382)在光學方面較優質。
由於長遠來說,光學的發展會比聲學較好,因此瑞聲科技的增長未能稱為強。但整體上,都有質素的。
------------------------------------------------
Q19209:
龔sir, 上完你最後一課,我由對股票咩都吾識,怕股票,到完左課程後覺得自已有好大進步
我成日諗,跑馬拉松,都要跟跑會學,網上學,睇片學跑姿,更何況是投資,我好興幸可以遇到你而位師傅
我個人其實無咩目標,四十歲人,好平庸,無大學學位,亦吾敢諗自已有一日可以過上等人架生活,但其實我內心是好渴望能成為上等人
可以由將軍澳居屋搬去港島區住,可以優雅地老去,老來不缺錢用,以前我吾知有咩方法,到有一日facebook遇上你
我馬上去加按自住層居屋,去買左個車位(sir你指的真正資產),買你啲書睇,再報埋你架課程,我知這個只是起步
我而家知道世上是有方法的成為上等人的,多謝阿sir, 最後一堂,好吾捨得你,多謝龔sir。
你講到你細個時望住XXXX,我坐最前排,見到阿sir你講到眼有小小紅,吾知系米我錯覺呢,我細個時也有類似經歷
我住藍田屋村,都系成日由窗門望住對面啲私傢樓,覺得好高級,好靚,我以前以為搬去將軍澳居屋已是我人生終極,但今日我知我仲有空間向上爬,多謝龔sir比左最寶貴架知識比我。
龔成老師:
我相信你過往的感受,正正是我的感受,大家都是草根,然後希望向上爬,憑自己努力,一步步完成目標。
可以啟發到你實在太好,我相信每個人都有想做的事,想完成的目標,每個人不同,但只要有信心,都可以達成的。
我相信,方法總會有,過程並不易,但一步步,可以做到的,大家都加油呀!相信自己可以完成好多大事情!
------------------------------------------------
Q19210:
老師,你好!現時持有港交所同金沙各一手,買入價分別係371同33.4
想問老師你覺得係咪高得濟入咗貨同應唔應該返家鄉就放定值得長線持有?謝謝!
龔成老師:
港交所(0388)有質素,只是買入價略貴,你可以持有。這股有得守,可長線的。
金沙(1928),有質素,買入價合理區中上部,持有無問題,長線可以。
------------------------------------------------
Q19211:
你好,我見你成日叫人買盈富,點解?
龔成老師:
其實最大的作用是「平衡組合」,對不少散戶來說,與其自己選股,我反而會建議佢地投資盈富,因為佢地選股通常選錯,而盈富是一個組合,風險相對較低。
同時有50隻股票,風險得以平衡,因此對大部分人來說是較好。同時,有平穩增長力,對整體財富不差。
------------------------------------------------
Q19212:
龔sir,我早排起交友app識左個男仔,跟住比佢呃左賣曬手上所有既股票,用曬所有錢跟佢玩數字貨幣。
本身賺左好多錢,但最後要拎錢既時候先話要交中國所得稅,我先如夢初醒發現係一個騙局。
而家所有錢無曬,好彩我突然醒左無比個騙子說服去借錢/用信用卡套現交稅,無欠任何債務,但呢幾年辛苦儲落既錢全部付諸東流。
報左警,但相信d錢都無咩機會拎得返。
我份工受到疫情影響,呢九個月基本上收入已經大不如前,每月大約萬五蚊左右。十二月保就業完左,人工只會得返一萬蚊左右。
我四月有幾份保險要交,總共年繳約五萬左右,而家會努力用之後果幾個月既人工儲起交保費既錢。
而家一切清零,我想問我之後點部署先最適合?
本身預左我五年後可以儲到六七十萬左右買樓,但而家咩都無曬,又要重新來過。
我諗我都可能要多額外三四年先真正上到樓。
好sad呀,只能怪自己蠢。
之前跟呀sir建議月供比亞迪,賺左既錢都比人呃埋,係一個好昂貴既教訓。
龔成老師:
報左警,就由相關方面處理。
事情已經發生,這都無辦法,只有當學習,令你之後投資等各方面都小心D。
雖然這刻由零開始,但你已經有知識、經驗,因此情況已經不同。
你由基本的儲蓄開始,到一定備用現金後,就開始投資股票,月供盈富(2800),如果想高增長,就月供安碩恒生科技(3067),可長線的。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。所以有長線持有價值。由於基金有30隻股票,比起單一股票,風險能減低。
不過,現價都唔平,大約在合理區頂,因此,這刻不能大注投資。最好的策略,就是月供,或自行分注小注慢慢收貨,原理如同不斷儲貨,這樣就能平均買入價,減少風險。然後就長線持有。
現時只有一步步做。
或者你可以想方法增加收入,例如做小生意,做佣金類工作,都是方法,要相信,方法總有的!
------------------------------------------------
Q19213:
成老師,可惜遲左接觸你嘅page,我原本係$198有買入港交所,但係$29X就放曬。如果早小小認識你個page我或者唔會放
我依家861嘅持股平均價大約$6.6,你覺得我應該賣出,還是等回本先?麻煩曬
龔成老師:
這都是學習的一部分,只要之後持有優質股,長線,就得。
我想教翻你少少概念問題,我地持有一隻股票與否,關鍵位是企業質素、前景,不要被買入價影響。買為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
因此,股票持有與否,重點不是買入價、賺蝕。
神州控股(0861)主要從事大數據運營、物聯網及人工智能業務,業務領域包括智慧城市、智慧產業鏈、金融科技、智能製造、智能農業、智能運維、量子通信等。
都是有前景的行業,長遠有發展,不過,業務就有較大的不確定性,始終行業結構不穩,變數大。
過往盈利增長不差,不過就有少少波動,這是企業的風險所在,股本回報率不高是扣分的地方。
整體來說,業務長遠仍有發展,不過現時估值唔算平,投資投資值博率只是中等。長線投資都可,但就唔值得佔組合比例太多。
------------------------------------------------
Q19214:
你好阿sir, 唔好意思又要打攪你,最近試用你上堂教的程式篩選優質股方法,搵到一隻初步睇唔差的股 海螺創業 (0586),想問下你意見。
我用企業分析表頭兩頁分析,5年財務數據合格,其中ROE同盈利近2年快速增長。但有個問題係,海螺創業主要盈利不是來自主業務,而係聯營公司海螺水泥
海螺創業的環保業務比較新,市場仲係初始階段,如果有海螺水泥呢啲發展成熟的企業支持,其實係咪可以視為一個優勢?
因為我都簡單分析過海螺水泥,絕對是一間不錯的優質企業,海螺水泥有規模、網絡、現金流強,負債不高,雖然預期增長力會減慢,但平穩增長相信仍然可以。
而海螺創業的主業務,近年發展出最賺錢的兩個項目為固廢處理和爐排爐垃圾處置,2項都在高速增長中,建設中及待建項目都唔少
日後營運收入會改善,年報中亦都指出以上兩項將會是未來核心發展項目。海螺創業有投資研發技術,現有垃圾處理、垃圾發電等技術水平亦不錯,相信可以提高行業競爭力。
我亦用光大國際 (0257)作比較,從年報中得知光大國際業務中有多項環保項目,而最賺錢的正正是垃圾焚化發電,海螺創業專注發展爐排爐垃圾處理可以更有力搶佔市場。網上資料顯示
中國垃圾焚化發電行業近年開始技術成熟及加快增長,成為最主要的垃圾處置方案,而行業可處理垃圾能力遠遠未達實際需求,反映行業仍處於增長期,加上近年中國愈來愈注重環保,國策大方向支持下有利行業發展。
綜合以上分析,海螺創業財務狀況、行業前境大致不錯,負債近2年增加較快,但應該係因為投資增加所致,暫時還是可接受。
由於行業始終較新,未來能否保持高增長,或者會否有新技術令行業改變是未知之數,而且行業的賺錢能力能否達預期亦是風險之一,可以講係有危有機。如果投資呢一刻唔會太大注,現價估算應該約處於合理區中上部,回返10-20%先分注入會更有吸引力。
唔知阿sir對此股點睇,有無潛力成為倍升股呢?有啲長編,先謝過阿sir!
(另附上企業評估表)
龔成老師:
你的分析不差,都講出了企業的重點,當你分析到海螺創業(0586)憑著海螺水泥(0914)而得到盈利貢獻,你就要同時分析海螺水泥,了解翻這公司的業務情況,是否本身的生意不差,是否對你現時分析的海螺創業有正面影響。
從本質未說,0914有質素,有增長力。佢主要從事生產和銷售熟料和水泥製品,業務地區包括中國東部、南部、西部、中部及海外。而安徽海螺是水泥行業中,全球最大的單一品牌供應商。
雖然增長力未必好強,但整體不差,所以,0586都會因此而利好。
我見你的分析及企業評估表都算做到分析,但就未夠深入,例如你要同時分析0914,以及從非財務數據方面,去了解這企業之後的發展。
評分大致正確,方向無問題。定出的投資策略都可以進行。
整體來講,海螺創業(0586)前景正面,佢整體的發展不差,生意與盈利都有理想增長,財務數據理想,負債不多。
佢係一家節能環保解決方案的綜合供應商,主要集中運用於水泥行業,並計劃提供具有節能環保特點的替代型綠色建材,雖然股價升左唔少,但由於盈利有實質上升,因此仍未算貴,只算合理區中上部。都有長線投資價值。長遠倍升都有機會的。
希望你可以更深入分析這股,等自己更了解後,才買入。
------------------------------------------------
Q19215:
龔sir,想問6988 ,1566點睇 ?
同打算入 9988 ,823,1810長 放 合理價可幾$入啊?
謝謝!!
龔成老師:
樂享互動(6988)是中國的效果類自媒體營銷服務提供商,利用商業智能技術為行業客戶及自媒體發佈者提供服務。
睇翻近年的財務數據,佢增長力是有的,但上市前的數據參考價值較低。
相信佢長遠,業務都有增長力的,公司話佢自己能盈利高增長。但就唔平,小注持有可以。
華夏文化科技(1566),投資價值則不高。
至於另外3隻,都是優質股,阿里(9988)$250以下較合理,小米(1810)$20以下較合理。領展(0823)現價在合理區,已經可以分注。
------------------------------------------------
Q19216:
點睇春立醫療?呢排回左好多
另外都想問埋愛康,成哥點睇呢兩隻股?現時是否兩隻股入市既好機會?
龔成老師:
春立醫療(1858)長遠有發展的。
佢主要從事以自有品牌「春立」研發及產銷植入性骨科醫療器械,產品包括:
(1)標準關節假體產品:主要包括髖關節假體產品及膝關節假體產品,用於治療骨關節炎、類風濕性關節炎
及其他疾病。
(2)定制關節假體產品:分為傳統定制關節假體產品及組配式定制關節假體產品,主要用於治療關節骨折及
其他原因所致的關節損傷或骨缺損。
(3)脊柱產品:包括頸椎前後路固定系統、胸椎固定系統及腰椎固定系統,產品適用於退化性疾病、脊柱疾病、畸形、骨折及其他病理原因所致的背痛。
佢係關節醫療器械技術有一定經驗,受惠於未來人口老化對醫療用品需求、醫療器械納入醫療保障等因素下,此股有佢架投資價值。
集團盈利由2015年4000萬,升至2019年2.4億,升近數倍。但主要升幅來自2019年,所以盈利增長唔算係平穏,同時間也推高了近期股價水平。
現時比之前合理翻D,但仍未算平,此股雖然有投資價值,但都有不確定性,不宜持有過多。不過近期有不利消息,醫療材料降價超預期,相信會影響佢一段時間,要觀察賺錢能力會否持續有影響。
愛康醫療(1789)本身不是無質素的,只是之前炒作太多。
這股經常處於少少貴的水平,這是最大風險,就算現時,都成30倍市盈率。
睇翻最近情況,自2018年「4+7帶量採購」開始後,令醫療材料開始降價,降幅基本在50%左右,甚至更高,預計未來3年帶量採購在醫用耗材領域會持續,會常態化,影響佢的賺錢能力。
從長遠發展,這股仍是正面,但就算現價仍唔平。
------------------------------------------------
Q19217:
睇你你的Post,我開始月供5000蚊盈富,明白應該要長線投資,但我想知道如果我月供5年盈富,平均成本5年後跟那時的價格沒有太大分別
那這5年資產就沒有增值(只是收左股息),如再過10年都沒有太大分別,那起不是做不到財務自由?
求解,謝謝你
龔成老師:
如果目標為財務自由,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
所以,你這刻可集中在「平穩增長類」的股票,著重「增值」,盈富(2800)你預每年的回報,升幅連股息約8%-10%,因此都能平穩增長。
當然,這仍是未足夠的,你最好月供盈富的同時,留翻基本的現金,而這刻現金就是給你自行選股,以及把握時機進行投資,這樣,你的財富先有更強的增值效果。
------------------------------------------------
Q19218:
Hello 唔好意思唔個有冇人問過,想問老師點睇機械人行業的發展?
龔成老師:
相信長遠行業正面的,就算我屋企,都有用掃地機械人,我相信機械人可以做到的事情會愈來愈多,這可以有效減省了一些人力及時間,絕對有市場需求。
長遠正面,技術應用會更加廣泛。
------------------------------------------------
Q19219:
想問下,23年會開始供樓,居屋150萬,手上有50萬現金,有無高息股幫補下供樓?謝謝你
龔成老師:
你可以投資收息股,建立一個組合,但不建議將全部資金都投資,因為一定要留有一定的現金作防守,以備不時之需,以及若大市下跌,可以買平貨之用。
你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
如果你能承受到風險,有些更有超過8%、10%的高息股,但股價就略有風險,要自己衡量,佐丹奴國際(0709)、中石化(0386)、互太紡織(1382)等(記住,股價略波動,只能小注)。
但要留意,現時股價只是合理,未到平宜,因此買入時宜分注,同時不能用盡現金。
------------------------------------------------
Q19220:
龔成老師,你好,想問下
我26歲,月入萬九,因為俾人呃所以借左屋企一百萬,同兩條銀行貸款 一條17萬 一條6萬,銀行個啲會係三年內清還
想問下我想還完銀行個啲之後五年內還埋屋企個一百萬,我應該點樣做好?謝謝
龔成老師:
你要一步步由基本開始,第一,儲蓄,要設定一個好的收支模式,每月都要有儲蓄。目的是累積「初期資金」。
第二,投資,這方面要睇你有幾大信心,如果你實力只是一般、投資經驗不多,就投資一些較穩健的股,如盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果較有實力,就可投資一些較高增長的股。
第三,你要盡力增加收入,你要開發不同的收入來源,兼職、小生意、做佣金收入工作等,要大膽試,可能會有突破。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
寶可夢卡牌家庭組合價格 在 寶可夢卡牌家庭組合價格在PTT/mobile01評價與討論 - 母嬰生產 的推薦與評價
在寶可夢卡牌家庭組合這個討論中,有超過5篇Ptt貼文,作者userkka也提到先上圖https://i.imgur.com/TM3Jo9X.jpg 比卡啾~~~~~~皮卡皮卡皮卡丘是不是超超級可愛(眼 ... ... <看更多>
寶可夢卡牌家庭組合價格 在 寶可夢卡牌家庭組合價格在PTT/mobile01評價與討論 - 母嬰生產 的推薦與評價
在寶可夢卡牌家庭組合這個討論中,有超過5篇Ptt貼文,作者userkka也提到先上圖https://i.imgur.com/TM3Jo9X.jpg 比卡啾~~~~~~皮卡皮卡皮卡丘是不是超超級可愛(眼 ... ... <看更多>
寶可夢卡牌家庭組合價格 在 [問題] 請問寶可夢卡牌現在還是很火熱嗎? - 看板C_Chat 的推薦與評價