《導盲犬小D》陳心遙
《信報》2017年3月8日《視線所及》專欄
上個禮拜搭港鐵喺車廂見到一隻狗伏咗喺地，下意識望一望主人，並唔係一位視障人士；原來隻狗狗係「訓練中嘅導盲犬」，英文名D字開頭，我暫且叫佢「小D」啦。一時好奇向嗰位拖住狗狗嘅義工姐姐攀談，知多咗唔少關於導盲犬嘅事。
以為嗰隻訓練中嘅導盲犬之後好快會為視障人士服務啦，又唔係喎。嗰隻係「種犬」，來自英國，係專為生產「土生土長」嘅導盲犬而遠渡而來香港嘅。佢之前已經生咗5胎，算係第一代「土生土長」嘅導盲犬。土生土長嘅好處係可以更早適應香港嘅生活習慣，令佢哋可以陪視障人士更長嘅時間。義工話我知，香港大部分導盲犬都係「拉布拉多」，貪佢性格溫馴、脾氣穩定、冇攻擊性。一般嚟講，狗仔由2歲零3個月大，就會被送往志願訓練導盲犬嘅「寄養家庭」中受訓，為期九個月左右。訓練包括要熟習乘坐各種交通工具、各條主要街道。因為將來要喺生活上陪住睇唔到嘢嘅朋友，所以一定唔可以因為好奇心而輕易雀躍，唔可以喺唔適當地方大小二便，唔可以隨時喺街喺屋企，見到咩都衝埋去食。呢個原本應該都係狗主監控嘅事，狗狗全部要自己學識，先有資格成為一隻及格嘅導盲犬。
導盲犬受訓完畢，先會做Body Check同性格評估，然後先會同特定一位視障人士配對，再稍作適應訓練就可以投入服務，成為視障朋友第二對眼睛，遊走呢個城市嘅每一個角落喇。
義工姐姐話，據統計，撇除晒對狗敏感、唔鍾意狗、唔想、唔需要狗狗引路嘅視障人士，香港而家都有至少1700位朋友想要導盲犬，而香港目前就只有唔夠一百隻，由於訓練一隻導盲犬費時費心機，仲要有願意照顧嘅寄養家庭，所以距離呢個目標真係仲有一大段距離。以前，好多人對於導盲犬有誤解同歧視，特別喺交通工具同埋食肆尤其嚴重。不過近年愈嚟愈多朋友幫手宣傳同教育，情況已經改善咗好多喇。
就用小D嚟做例子，佢好靜，眼神甚至有啲冷漠，對周圍都漠不關心咁樣。義工姐姐話佢同其他導盲犬一樣，着住件「制服」就會自動變乖，一除咗就知道自己「放工」，就會變得同其他狗仔一樣活潑，蹦蹦跳跳，着番制服又會恢復工作狀態，比起好多人都仲要有紀律呀。
義工姐姐話，做寄養家庭屋企都唔使好大，只要有一張氈嘅空間都足夠。如果你都有興趣做寄養家庭，可以上網搵「香港導盲犬服務中心」同「香港導盲犬協會」查詢。
#導盲犬小D #導盲犬 #拉布拉多 #香港導盲犬服務中心 #香港導盲犬協會 #信報 #陳心遙
導盲犬英文 在 Gavin職場英文- 導盲犬的英文怎麼說呢？ 答案是：guide dog 的推薦與評價
導盲犬 的英文怎麼說呢？ 答案是：guide dog -- guide 就是指導、領路的意思. ... <看更多>