《不論男女，都愛批鬥港女》
港台最近有個港女選男神嘅環節，節目請來兩個男人，一個係游學修，一個係劉嗚煒，另外有十幾廿個女人。兩個男人坐喺布幕後，班女人喺唔知呢兩個男人嘅樣，背景同職業嘅情況下，要選出佢地心目中嘅男神。
未睇完已經大概知道個結果，游學修就係代表「有夢想但無錢嘅人」，劉嗚煒就係代表「無腦無夢想嘅有錢人」。個節目搵兩個咁極端嘅男人叫班女人二選一，好明顯就想個結果係「嗱，你睇大多數港女都係揀個有錢架」。觀眾見到班女人問兩個男人有關錢嘅問題，最後轉軚揀個有錢佬，大家就好開心，好似估中左「幾肉酸呀班港女，現實到暈」。
※※※※※※※※※※※※※※※※※※※※※※※
在我角度睇，本身個節目就有「港女點都會揀個有錢佬」嘅假定，班女人揀個有錢嘅，就和應返社會對「港女」拜金嘅假設同批評。
而家二選一，一個係「有夢想但無錢嘅游學修」，一個係「無腦無夢想嘅劉嗚煒」，呢個係太極端嘅選擇。事實上，夢想同金錢唔一定對立，亦唔一定有前者無後者。呢個選擇就等於問男人要高海寧定小儀，一旦個男人揀高海寧，大家就指摘個男人「都話男人鐘意有樣有身材又後生啦」。而今次，班女人一揀劉嗚煒，就會指摘佢地拜金現實。
現實中，無論男女，都會傾向揀個中位數，女嘅會搵個有夢想得來唔好太窮嘅，男嘅會搵個有智慧得來個樣唔好太抽象嘅。最重要係，男女配對，邊有咁好彩同時出現兩個畀你選擇先？游學修有夢想，劉嗚煒有錢，兩個個優點都好明顯，現實中，大部份人遇到嘅都係平平無奇嘅凡人。男女配對好多時唔係A OR B嘅選擇，而係YES OR NO嘅選擇。
個節目想做到嘅根本唔係選擇，而係透個一個選擇遊戲，去突顯「港女點都會揀個有錢佬」嘅假定，再批鬥班港女呢個拜金選擇。呢個係一個電視節目，愈dramatic愈好睇，唔會安排平平無奇嘅男人畀班女人揀。游學修代表嘅係夢想，劉嗚煒代表嘅係金錢，呢兩個選擇，夢想喺道德上就比拜金更正面同高尚，所以只要班女人唔揀游學修，佢地就即時被批鬥。如果個極端選擇係靚仔同有錢仔，貪靚仔同貪錢兩者都係負面嘅，一個係金城武外表但拎綜援，一個係八兩金外表但有李嘉誠身家，呢個極端選擇嘅結果先更合理同更有觀看性。
感覺上，經剪接後，班女人問嘅問題剩返金錢有關嘅問題，個節目就係想用呢點，去和應返「港女就是拜金」呢個假定。大家都樂見最後嘅結果係證實到女人係貪錢，大家都樂見班女人轉軚。一班平庸嘅女人，「居然」仲咁挑剔同拜金，仲唔批鬥佢地？
睇完只係覺得，大眾對港女依舊嚴苛，不論男女，都愛批鬥港女眼角高，拜金。其實個節目叫班女人喺錢同夢之間二選其一，佢地最後揀咩都唔值得大家批鬥。最重要係，我根本覺得大部份嘅港女都係好野，佢地都唔拜金，點解要利用呢一小班女人嘅選擇，去概括大部份港女嘅特性呢？
PS. 咁老實講，游學修的確係有夢想得來唔夠靚仔，劉嗚煒的確係有錢得來比印象中嘅有錢人好樣，咁我又明點解佢地會轉軚嘅。如果代表夢想嘅男人係金城武，個轉軚率相信會化為零。
小儀身家 在 航運太子爺李思捷半億身家曝光(詳盡版) - 東周刊eastweek.com ... 的推薦與評價
小儀 生活多姿多彩，使你理？ 2 wks Report. Fafa Wing Yau Twy, profile picture. Fafa Wing Yau Twy. 香港人就係喜歡睇啲食花生不知所謂既報導 ... <看更多>