我嘅職業係：NPC（上）
一個滿臉橫肉，形容猥瑣嘅大漢，一手攬住我條腰，正要錫落我度。
我應該驚慌，但我一啲唔驚慌。
或者，無論邊個女人，第一千次俾同一個人「劫色」，佢都冇辦法再驚慌。
我知道，下一秒，就會有一個熱血嘅少俠出現，將猥瑣大漢打倒，救出小月姑娘—即係我。
然後少俠會去城主度領取獎勵，城主會畀下一個任務「殺死山賊頭領」。
果然，下一秒，身穿新手布袍嘅少俠出現。
「姑娘，請問你同佢係咩關係？」少俠細細聲問。
吓，我同拍檔大漢都呆咗。
玩家嘅任務指引度，明明有寫「逍遙酒館中，一個猥瑣的大漢正在調戲小月，快把大漢打倒，救出小月」。
我反問：「『任務指引』唔係有寫咩？呢度係逍遙酒館，佢係猥瑣……」
少俠一本正經咁答：「酒館內可以有其他人啊。佢個樣係有少少猥瑣，不過『人不可以貌相，人有時會撞樣』，我唔想傷及無辜，咪先問吓姑娘，同佢係咩關係。」
我望望少俠頭上嘅ID，佢叫「正義之劍」。
呢種ID我見得多，但真係咁「正義」嘅，我都係第一次見。
大漢平時都係俾啲少俠一招打倒，冇機會發言，所以佢嘅語言能力都唔多發達。
遇到咁突然嘅情況，大漢手足無措，下意識用求助嘅眼神望住我。
「你哋咁有默契，肯定係情侶啦。好彩我啱啱冇出手，否則就誤傷好人。」
正義之劍鬆一口氣，跟住問：「咁小月呢？我接咗任務要救佢。」
「我就係小月。」我翻咗個白眼，將自己隻手鐲遞畀佢：「唉，拎畀村長啦。」
「吓？」正義之劍唔明白。
我唯有解釋：「按照任務設定，你『救』咗我之後，我會畀呢隻手鐲你，作為任務物品。你就拎畀城主睇，佢就會畀下一個任務你。」
正義之劍好認真咁講：「我都冇救到你。」
「我哋係NPC嚟㗎，玩家嘅生活有無限可能，而我哋嘅生活只有一種可能。無論你救唔救我，都改變唔到任何嘢。」我努力同佢解釋。
「改變唔到咩？」正義之劍咧嘴一笑，露出又白又閃嘅牙齒：「至少，呢位兄弟今日冇畀人打。」
大漢望向正義之劍嘅眼神，有幾分感激：「少俠真係識體恤人，雖然我身為『怪物NPC』，去醫館係免費嘅，但俾人打都係會痛㗎。」
我嘆氣：「夠啦，你咁心慈手軟，點樣玩武俠Game啊？」
「俠之大者，為國為民。行俠仗義，要先搞清楚事情嘅始末，好似呢位兄弟咁，佢都冇調戲婦女，就唔應該俾人打。」正義之劍答得理所當然。
「唉……」我又嘆一口氣。
自此之後，呢個傻更更嘅少俠，就成日嚟搵我傾計。
我成日笑佢傻，但又忍唔住掛住佢。
可能係因為，佢係唯一一個冇當我係NPC嘅人。
有一次，我問：「你點解咁耐都著住件布袍嘅？做完第一章主線任務，明明會送一套裝備㗎。」
「第一章最後一個任務，係『殺死山賊頭領』，任務指引話，山賊頭領殺人放火，無惡不作，於是我去跟蹤佢…….」正義之劍愈講愈唔開心。
我幫佢講埋落去：「你發現，山賊頭領唔止冇殺人放火，仲日日都俾人殺，死咗再刷新。」
正義之劍好認真講：「如果要濫殺無辜先做到大俠，我寧願唔做。」
我望住窗外嘅月亮，問：「咁你有咩夢想啊？」
「咪同你留喺酒館度，睇吓月亮囉。」正義之劍笑一笑。
嗰一刻，我個心跳得好快。
一個NPC，動咗情。
下集：https://bit.ly/37vZWSc
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我嘅職業係NPC
小月亮小說 在 小月亮, 小月亮小說全文在線閱讀 - 半夏小說 的相關結果
小月亮 最新章節由芋圓拌飯七分飽創作，《小月亮》情節跌宕起伏、扣人心弦，是一本情節與文筆俱佳的耽美同人小說，半夏小說（BanXia.co）免費提供小 ... ... <看更多>