《入元朗食型格超高質的酒吧餐廳。凡直友理》
又係元朗食好西嘅時間，今次我搵元朗地膽介紹好嘢食，朋友話之前試過這一間唔錯，推薦我去試😁咁我就奉陪去試吓😝咁聽個名我以為係食日本野，點知我朋友話俾我知係食西餐😂
佢嘅位置算易搵，喺又新街行入去少少，B仔附近就見到。就咁從外邊去睇是一間普通嘅西餐，唔算話好大，但當入到去嘅時候係會見到入面好似尖沙咀諾士佛台嗰啲食水煙酒吧餐廳咁走型格路線，牆上嘅畫抵死又搞笑，侍應話會定期轉換，仲有個好大嘅巴枱，有勁多不同款的酒，可惜我不飲酒，只可好好地品嚐它的美食😋
我哋超肚餓見到份Menu好多嘢都想食，於是我哋點左兩個主餐，其中一個係晚餐我們揀咗烤美國特級西冷牛扒配薯菜（$178）可以加前菜同埋upgrade，我哋加$30要法式龍蝦湯，加$18換伊比利亞火腿配蜜瓜，又加$48香煎鵝肝，另外我哋再單點一個輕煎北海道帶子黃金意大利飯（$148），另外叫多個焗黑松露大啡菇伴芝士薯蓉（$88），另外叫多兩杯飲品。
佢先上咗特濃龍蝦湯，因為朋友麻麻哋濃湯嘅關係我飲晒，龍蝦肉雖然只得一舊，但係重點係佢嘅湯，真心味濃好似用一噸龍蝦熬製嘅湯一樣😍好鮮好香濃！我覺得理想中嘅龍蝦湯應該係咁樣！👍
佢陸續上埋伊比利亞火腿配蜜瓜，雖然我唔識得分佢同巴馬火腿有咩分別，不過好似冇咁鹹作為前菜都唔錯！
跟住就係朋友至愛嘅香煎鵝肝，雖然加$48唔算好多，但就咁睇真係好似法國餐嗰啲高級餐點，鵝肝外圍煎到微焦，切落去好嫩，入口即溶有一種甘香🤭我唔係成日食鵝肝，不過呢種甘香真係令人齒頰留香，而且煎得啱啱好！
好快輪到焗黑松露大啡菇伴芝士薯蓉上場，，見到佢啡菇中間釀滿芝士薯蓉，非常飽滿！上面的黑松露絕對唔係人地芝麻咁細，都算幾多離遠已經聞到黑松露嗰浸煤氣味！個味道和口感我真係比滿分💯，首先我好鍾意食大啡菇，佢烤焗嘅過程保留左啡菇嘅水份，佢嘅清新加上芝士薯蓉味濃唔會太寡，嗰啲嘅黑松露香味簡直就係畫龍點睛！好夾呀！👍👍👍呢個我可以食10粒！😍😋
好快佢嘅西冷牛扒上場，我地點左六成熟，牛扒都算幾厚切，煎得都幾靚，擺款亦都好有誠意好靚，不過可能煎耐左少少大概上枱有七成熟，不過仍然無阻佢的鮮牛味！😉
最後就係嗰個輕煎北海道帶子黃金意大利飯！佢一上枱顏色好鮮艷，係鮮黃色，因為佢入面有魷魚，南瓜，粟米，豆類等，原來佢叫黃金唔係因為南瓜而係佢入面加咗一種食材，係我哋萬萬估唔到！原來就係鹹蛋！！！😱😱😱😱真係一個好大膽嘅嘗試中西合璧！不過出奇地夾好好食呀！本身佢有咁多材料口感已經好豐富，仲要加埋鹹蛋嘅鹹香！果然鹹蛋配乜嘢都係咁正！完全搶晒嗰幾粒帶子嘅光彩😂雖然嗰幾粒帶子都好正，不過鹹蛋真係無得輸，呢個飯真心高分！😋😋😋👍
呢度咁適合飲嘢我同朋友又點可以唔點啲特色飲品？我點左一杯冇酒精嘅Peach Sour, 有少少桃味清清地，幾fresh~ 朋友就點左有少少酒精嘅White Sangria Gls, 出奇地好飲完全唔覺好勁酒味！好易入口早知我又嗌啦😂😂
值得一讚係呢度嘅侍應非常之親切同埋醒目，其實呢度真係好適合朋友嚟飲嘢食飯，但係估唔到呢度好似以賣酒為主嘅食品係咁高質， 我同朋友覺得樣樣野都好好食，當時食完真係好想講一句: 幫我叫大廚出嚟, 我要讚下佢！😂😂😂不過真係好開心元朗越來越多高質嘅餐廳！以後唔單止淨係入去食B仔了！😋
—————————————————
店名：凡直友里
環境🏝：8.5/10
服務💁🏼♀️：8.5/10
價錢💰：8/10
食物質素🍝：9.2/10
整體🙆🏻♂️：9/10
地址:
元朗又新街53-59號滿利大廈地下
#吃貨玩樂在元朗
#吃貨玩樂
#凡直友理
