你可以當呢篇係廣告，
但對我嚟講，係人生一大柒事！
呢件事發生喺前幾日，直到而家為止…
我都諗唔明點解會做出啲咁柒嘅行為。
是咁的，當日客戶約咗我去咗尖沙咀本陣燒肉，一邊食飯一邊開會。由於我係毒L出城，蕩失路咗好耐，最後終於都喺厚福街最顯眼嗰棟大廈搵到。
我一坐低，客戶就畀咗杯Highball我飲，我咁專業，工作時係唔會飲酒，但客戶盛意拳拳，當日天氣又熱，我又口喝，眼前擺住一杯冰涼透心嘅Highball，實在好難抗拒。
無錯，當初我唔應該飲，如果我唔飲，就唔會做錯事。
食到一半，客戶話希望我可以幫佢哋寫一個溫馨嘅故事。
「可以啊，阿公都好溫馨，仲好鍾意食燒肉…」我。
「呃，畢竟我哋係餐廳，會唔會唔係咁好？」
「我可以寫一隻好鍾意食燒肉嘅鬼，為咗食燒肉唔肯投胎！」我對呢個故事自信滿滿。
「唔係呢個問題…」客戶。
「我明我明！你想隻鬼係日本鬼？因為日本燒肉！哈哈哈！」我夾起一舊燒好嘅和牛放入口，入口即溶，齒頰留香。
「我哋唔想餐廳有鬼。」客戶。
（Deadair咗十秒，我默默燒肉）
「不如寫外星人聞到燒肉香味所以侵略地球？」我。
「我哋想要溫馨故事，例如一家人親情嗰類…」客戶。
「一家外星人侵略地球？！」我開始強詞奪理。
呢個時候，服務員又捧咗一碟肉過嚟向我介紹，話因為好容易燒焦，會幫客人燒埋。
「嗱～燒好喇先生！」
我唔知係咪酒精嘅關係，滿腦子都係燒肉同外星人，我竟然衝口而同侍應出講：
「唔該媽咪！」
我靜咗，客戶靜咗，服務員都靜埋…整個空間淨係得返燒肉發出嘅滋滋聲。
其實細細個，我都試過同樣情況，例如喺學校上緊堂，我舉手想問問題，口快快講咗「媽咪，我想問…」
又試過搭小巴瞓著咗，一起身見到就嚟過站，情急之下大嗌：「媽咪有落。」
原因係我以前係一個好麻煩，又好黐身嘅小朋友，亦即係而家俗稱嘅「港童」。由我懂事開始，遇到任何難題，只需要大聲唸一句咒語，問題就會迎刃而解。
呢句咒語就係「媽咪～～」
搵唔到玩具，大叫媽咪。件衫污糟咗，又叫媽咪。
有任何問題都以為媽咪可以幫我解決，漸漸形成咗一個依賴嘅壞習慣。
當時亦因為喺學校發生咗一件事，我就知道要學識獨立，決定戒甩咗依賴阿媽。
嗰時我間小學好巴閉，有𨋢可以畀學生使用，但規定一定要喺地面上最高層先可以用，去其他樓層唔畀用，要行樓梯。
當時小息時間完咗要返課室，我喺操場見到啱啱有𨋢，我急步衝前，喺𨋢門閂埋之前，一個側身衝到入𨋢，但估唔到…
原來班主任喺我後面，喺𨋢門嘅隙縫，我見到佢目露兇光咁望住我…
之後，老師捉咗我去教員室，仲罰我第二日小息要企喺𨋢門，叫我留意吓其他同學。
小息之後，班主任問我：「你有冇留意到，有部分同學會幫其他人開住𨋢門，亦有部分同學好似你咁行入𨋢就唔理其他人？」
我點頭。
「你知唔知點解？」班主任又話：「當一個人有依賴習慣，下意識覺得任何事都有其他人幫佢，相對地亦唔會諗住幫其他人。
「相反，如果一個人獨立，習慣咗做任何難題都自己解決，自然就會知道其他人亦會遇到同樣難題，主動去幫其他人。」
我唔係話依賴嘅都係自私嘅人，只係當你習慣依賴，就會覺得所有人都有義務幫你。但當你學識獨立，自然就會去幫其他人。
我諗返起呢個細個發生嘅故事，不如就寫呢個故事啦～正當我想同客戶講返呢個故事時，我發現服務員突然眼泛淚光咁望住我…
「你叫我媽咪，令我諗返起我個仔…」
（待續）
唔好意思…咁柒都要上下集
希望大家鼓勵我繼續講故事，畀個Like & Share
本陣燒肉 Honjin
希望你同姐姐講聲…唔好意思嚇親佢
尖沙咀飲酒食飯 在 【尖沙咀】酒吧竟然有好嘢食！6000呎靚裝～歎串燒＋鋸扒 的推薦與評價
未必每間酒吧都會大花心思於食物上，呢間位置諾士佛臺的，真係就算唔多 飲酒 ，特登去 食飯 都OK！串燒主廚曾在名店「南亭」工作，真係有水準， ... ... <看更多>