【#士佳說 】張士佳：減倉後雖忍手，拒絕左側交易
跟住點做，先睇前因後果。
回帶先睇返星期一，我寫比大家的原文：「星期五港股反常下跌，之後傳出滴滴打車壞消息後，除此之外，大市唔算有咩壞消息，就跌咗四百幾點，四百幾點唔係世界末日，但係唔少股都要跌，包括最近先前升得好好嘅板塊，我自己面對呢啲市況，通常會咁睇，一日半日可以唔理佢，當係偶然，但係兩三日係咁就要對應對，或者彈一彈再跌，就唔可以遲疑，星期五晚美股升帶動夜期反彈係一個好的試驗，今日開市後一路跟升，當然最好，但如果今日都唔彈再度下跌，甚至收市失守27909，咁就唔知背後發生咗乜事，市場走勢就點都要尊重，發生左都要減倉。雖然半日市嗰日減左D倉，但如果再下跌，都係減得唔夠，無論我哋點樣睇，唔重要，市場上嘅落注的資金先至係最重要，睇法可以錯，做法一定要執行，值博率唔夠就唔博，既然入市前已定下左止蝕位，到就要嚴守，以退為進。」
星期一當日跌穿左27909，但係收唔穿，都可以側側膊當假跌破，我嗰晚有教書，我同學生講，如果星期二都唔升，就要避星期二再陰燭跌穿，就預示個市唔多掂，今次監管風波，相信事前內地冇乜走漏風聲，都幾突如其來。未發生前，我原本以為可以反覆再上，但一見落到27800，兩日前我就咁寫:「香港大市，人升佢跌，似乎下一個浪好快就到，27,800呢啲水平，好難停留，唔會再在此反覆。」結果昨日加速下跌，絕無反覆，如果冇早作準備，應該都幾傷。
失驚無神嘅下跌，大家如猝不及防，大戶散戶就會有損傷，昨日估唔到咁快又跌返落去250天線，有些同學早幾日有減左倉，變相手上多左子彈，內心不斷諗機會買貨，加上大市已落返250天線，感覺係調整完一個新升浪嘅開始，咁樣諗無可厚非，而家破曬位，我唔否認係關鍵時候，但係吼低買無非貪便宜（相對高位計），實在個股嘅估值未叫便宜，本星期突然嘅下跌，市場點都有批蟹貨，跌成咁間中出現反彈少少唔出奇，正常黎計，好難咁快真升，反正呢啲咁嘅市，彈完，都會試吓個底係咪真係堅，倒不如等彈完再試底嘅時候先至再博，現在都係忍下，切忌左側交易，感覺平的確係好難忍，加上彈完再彈底，隨時10幾日，叫散戶10幾日睇住唔買嘢，應該好難，就算好有心水，都係最好小注短炒為主，到首目標都Take profit。
總之，無論你估升估跌都好，市場現時明顯值博率不夠，止蝕位唔易set，咁就應該忍手唔賭。一般散戶不易忍的，你忍到，就真正可以脫離散戶行列。
↓↓↓↓點擊下圖，詳文講述↓↓↓
#SKYSIR #張士佳 9.7.2021
