早前囡囡要升小一 , 老婆諗緊讀邊間好, 因為小學好影響中學既選擇, 我地個時既對話係咁
我自己係何傳耀讀書 , 回望自己 , 中學呢個階段對個人成長係好重要 . 出黎社會做事後, 社會會改變你 , 但有D核心既基石係唔會動搖 , 而呢D基石就會係中學既時候打好基礎 . 雖然話何傳耀呢十年成績各樣野都大不如前 , 呢樣我控制唔到 , 但都只係道聽途說. 何記係坐落屋村入邊 , 夠地氣 , 又有社區生活 , 學校係成長既地方 , 最低限度我讀書個幾年 , 好開心 . 小學同中學無一條龍關係 , 但唔係垃圾既次選.
老婆問 , 何傳耀既環境係點 ?
校內環境就細D , 但後面就有籃球場,又有足球場 , 仲有運動場 , 山腳就有大公園 . 我自己浦籃球場多 , 校內提供到既設施唔多(我講我既年代) , 但有朋友有校友, 就唔怕去附近玩 . 老實講 , 屋村實有惡霸 , 但而家應該唔興啦下話 ? 四隻字 , 人傑地靈 .
老婆再問 , 咁讀書既情況呢 ?
我既年代 , 校內校外既額外項目選擇係無咁講究 , 運動科既支援就更加少 , 可能我唔係精英班 , 無提供選擇比我 . 而我最記得既係 , 年少唔懂事(而家都唔太懂,所以做乜都無埋堆) , 班上班下都有討論過師資同校長/校風既情況 , 學長有學弟都有 , 都係講點解人地學校有 , 我地學校無 , 係咪佢地又唔做野 , 又唔讀書呀~~呀~~~~等等等等. 而家諗返先覺得好神奇 , 個時我地既學生風氣係會關心自己學到乜 , 缺乏D乜 , 老師可唔可以幫幫手搞搞佢咁.
老婆然後講 , 所以個囡讀何傳耀你會覺得OK?
當然OK , 我無乜留意區內排名 , 唔知而家係咪BAND1 , 老婆你望望. 「心存善念 , 盡力而為」都係我而家做事既原則 , 當然老豆老母都有教我做人 . 教育唔係淨係學校 , 我同你都有關係嫁老婆 , 搵個開心既地方比仔仔囡囡成長係最重要 , 更重要既學校要點樣教好一個學生. 我到而家 , 人地問我係邊度讀中學 , 我都會大大聲同人講我係何傳耀出黎 . 好成績個班無我份 , 但只少我唔係壞人 , 好人黎嫁我 ! (老婆恥笑左一下) 「止於至善」係校訓 , 講既係德,智,體,群,美
簡單D黎講就係 , 「一係唔做 , 一做就最好佢」
我地既校歌係咁 :
城門山谷，黌宇堂皇，藏修息遊樂融融
荃草芬芳，灣水淵深，發揚光大校譽隆
進德修業，五育並重，身心健全智愚同
自強不息，陶冶成器，前程萬里乘長風
今日 , 返到去母校 , 睇左,聽左我地而家既校長連同代表學校既人仕 , 解釋學校立場同佢自己個人睇法既時候 , 我就明白 , 當日既老師教得幾咁好 . 當日老師既風骨影響左幾人 ? 至少 , 竟然可以將我呢個咁劣質既人教識如何明辨是非 .
我明白我了解 , 佢地己經好大壓力 , 開校以來都未試過咁 , 但良心幾錢斤 ? 有人千金不換 , 有人一文不值.
- 何傳耀舊生 - 史坦
#何傳耀中學
#史坦
#師弟頂住
