港股12月或挑戰二萬八後回吐
11月30日，多雲，早上清涼及有一兩陣微雨，下午部份時間有陽光及乾燥，呢兩日忽然降咗幾度，大家注意著多件衫。美股上周五感恩節假期後只有半日市，三大指數以納指表現最好，升近1%，道指跟標指分別升37及8點。雖然喺肺炎疫情下，美國再無見到人潮去百貨公司瘋狂掃貨shopping，不過上周五傳統Black Friday網購破頂，民眾喺疫情下仍然樂意消費，只係購物方式有所不同。
值得留意係俗稱「恐慌指數」的VIX指數周五(27日)一度跌破20，為今年2月以來首見。疫苗消息頻現令市場避險需求驟降，現貨金上周跌至近5個月低位。紐約3月期金收報每安士1,788.1美元，跌1.2%，全周計累跌約4.5%，創近兩個月最大單周跌幅。由於投資交易風險加大，至少7家中大型中國商業銀行陸續發表公告，受疫情影響，國際貴金屬市場價格波動劇烈，上周六(28日)起暫停個人貴金屬交易業務新客戶開立交易帳戶。分析料加重金價沽售壓力。有意買金作長線投資，暫時都係忍忍手。
喺疫苗頻傳利好消息下，近期見有資金重返舊經濟股，不過仍未足以帶動恒指一舉升破二萬七關，睇嚟恒指要進一步突破，可能又要靠恒指成份股中嘅新經濟股帶動。恒指踏入12月，如能向上挑戰27300-400點，即係1月底所遺下嘅下跌裂口，今個月將恒指目標set去28000水平亦唔算太大想頭。不過由季初至今，恒指累計升咗13%，而過去10年恒指第四季表現八升兩跌，而平均升幅只有3%左右，若然根據過往軌跡，12月港股有機會先突破後回吐。恒指若然挑戰二萬八關後回吐，只要能穩守26200及26500點，即目前10日及20日線之所在，健康回吐反而對後市發展更有利。
拜登成為白宮新主人已無懸念，雖然美國對中國態度未必會嚟個180度大轉變，但至少唔會好似侵侵咁強硬，預料拜登上場後，上美關係或迎來蜜月期，而疫苖好消息不斷，市場憧憬明年經濟復甦，短期資金或由之前新舊經濟股之間輪動，改為齊齊炒上，支持港股更上一層樓。尤其係估值低殘的舊經濟股繼續追落後，令港股有條件收復部分失地，恒指年尾或以近兩萬八點水平「埋單」亦係合理推測。不過舊經濟股主要靠疫苗及經濟復甦消息拉動，長遠而言，盈利強勁嘅新經濟股會繼續係大市火車頭。
不過提醒大家，新一輪疫情喺全球各地持續爆發，若然聖誕至元日假後，全球疫情若持續惡化，市場對經濟復甦期望落空，唔排除熱錢將抽離市場，引嚟一輪較深嘅調整。無論如何，目前都係摸石過河，步步為營，就算睇好12月股市發展，呢個時候只宜小注怡情，埋年計數，呢個時候絕對唔係博殺期。
古天后
#300likes30shares #古天后 #古天后日誌 #頭條財經網
利益申報 :
筆者為證監會持牌人，於本文章刊登之時，筆者個人或/及其客戶可能隨時買入或賣出相關證券及衍生工具。
免責聲明 :
本網頁純屬個人網誌，一切言論並不構成任何要約、招攬、邀請、誘使或任何建議及推薦。讀者請獨立思考及自行作出投資決定，如因相關言論或文章招致任何損失，概與本網誌或本人無關。
依家我嘅聊天室已經停止免費試用, 直接課金入來聊天室啦：https://bit.ly/2BmeAhZ
立即下載秒投：https://link.stockviva.com/L9J41qUp01
對聊天室有任何疑問，可以直接聯絡秒投小編：電郵 cs@stockviva.com
注意：本人僅在 "秒投App" 及其網站內開設聊天室，本人並沒有與其他網站，或以外的平台，開設過任何通訊群組，亦沒有任何所謂的「私人whatsapp 群組」「Telegram 群組」等等，為保障大家利益，切勿加入任何類似群組。
