#廣告人誌：有一種愛，叫放手－－專訪Aptamil 微電影幕後創作團隊
德國奶粉品牌 Aptamil ，上周推出微電影《有一種愛，叫放手》（ http://goo.gl/u9dbBn )。單睇牌面，冇天王天后主演，冇喺擁有過百萬粉絲嘅強勢媒體發佈或share（100 毛、蘋果日報都冇share），冇報紙teaser 廣告提醒大家上網睇片，純喺品牌專頁（有三萬幾fans）發佈，竟然獲得逾二百萬view 、三萬八Like、三萬六share、過千comment，成績可謂相當驚人。
微電影由女兒嘅角度出發，帶出媽咪栽培佢長大嘅經過－－佢有一個好特別嘅媽咪，佢跌低，媽咪唔會扶佢，要佢自己起返身；佢演話劇，媽咪支持佢做佈景板；佢出國留學，媽咪臨別都唔會同佢Goodbye Hug。媽咪嗰種刻意同女兒保持距離嘅情節安排，喺奶粉廣告嚟講確實少見。本版特地專訪創作呢條微電影嘅Aptamil 同 Havas Worldwide團隊，細問廣告幕後故事。
「今次呢條微電影，創作歷時超過半年，係建基於品牌定位－－ 『 One Step Ahead 領先一步』誕生嘅。」創作團隊代表說，「究竟點先係真正嘅領先一步呢？係唔係一早叫啲細路上好多興趣班，幫佢哋決定好晒就叫贏在起跑線呢？」
「片中有一段女兒嘅獨白，好代表到我哋嘅想法：『培育我成長，唔在於為我決定幾多，而係要我面對幾多。』媽咪懂得適時放手，由子女自行選擇，再畀佢哋面對、承擔返相應嘅後果同挫折，反而可以令子女領先一步成長起來，識得面對各式挑戰。」
「有一種愛，叫放手」係引發共鳴嘅內容，target 一班One Step Ahead媽咪，先係品牌嘅目的。「我哋嘅產品，建基於領先一步科學研發；品牌深信早期優質營養，對嬰幼兒嘅發展有長遠影響。所以片中嘅女兒，係由細細個講到佢變大人，藉此突出『領先一步』奠下基礎，對子女發展係影響深遠嘅。」
短片出街，適值選舉新聞洗版嘅日子，有冇諗過可以獲得咁好成績？「其實成績遠超我哋預期，條片出街，連facebook ad 都未生效，view 數已經meet 咗target 。」團隊代表說，「我哋相信成條片最中嘅，就係媽咪放手同唔放手之間嘅掙扎，好似機場嗰幕，媽咪目送女兒離開身邊，禁不住流淚咁。講真，媽咪都係人，即使想放手畀女兒獨自面對困難，點都會有心痛同不捨。又有邊個咪媽無經歷過呢種STRUGGLE？」
「即使未為人父母，我哋相信片中女兒回望過去媽咪栽培嗰段，亦能引起一眾仔女共鳴，到第日自己有兒女，亦識得去放手。所以今次條片唔止target 到爹哋媽咪，亦中到大部份觀眾。」
廣告公司仲同本版分享左一則創作花絮：「其實廣告公司團隊，除咗阿公（CC Tang）之外，冇一個係已婚同有小朋友。所以喺創作過程中，我哋訪問咗公司入面嘅媽咪，而客戶方面亦畀咗好多insight我哋－－佢哋Line Up咗好多媽咪顧客，為我哋補上好多新諗法。喺多方通力合作之下，由未婚人士組成嘅團隊，先可以創作出呢次Campaign！各位媽咪，多謝晒！」
睇返條片嘅留言，好多媽咪同子女都紛紛Share個人經歷同想法，其中一則，令人感動：「我同仔仔一齊看到（條片）一半後决定尊重仔仔的選擇：星期一放棄英文話劇班返小童軍，仔仔聽了我的决定後好感動，摟住我大哭：多謝媽咪支持我，給我做選擇⋯⋯」做到一個叫好叫座嘅campaign幫助品牌，更可以走多一步促進關係、影響生命，相信係任何客戶、廣告公司都想解鎖嘅成就。
Client: Danone Nutricia Early Life Nutrition
Creative Agency: Havas Worldwide Hong Kong
Digital Media Agency: XSocial
Director: Frank Shek of Haus Production
#有一種愛叫放手
Nutricia ENP Women
==========
請支持本版其他文章：
廣告觀點：五十年不變，可以嗎？ http://bit.ly/2cvudTp
廣告壹句：如何選廣告代理？ http://bit.ly/2c1TROp
不想錯過本版文章，可以click本版like掣 --> edit notifications --> 剔選所有Post嘅類型 ( Photos、Videos、Links、Status Updates）
加入廣告狂人吹水谷：http://bit.ly/29LTjjf
follow 廣告狂人instagram：http://bit.ly/29vqyIk
