今期am730專欄：
《瑞典神秘小屋》
大家估唔估到圖入面呢間咁得意嘅小屋用途係咩呢？電影道具？小朋友嘅玩具屋？畀啲時間大家諗諗先，答案喺文末同大家揭曉。
畀少少貼士大家：都係嚟到瑞典先知，原來我哋日常可以做嘅資源回收絕對唔止藍廢紙、黃鋁罐、啡膠樽咁簡單。例如廢紙類入面，紙皮、信封、報紙雜誌都可以再細分好，因為通通都會有唔同嘅處理。玻璃樽都唔係話回收就回收㗎，要將有色同無色嘅樽分好。瑞典全民對資源回收同環保嘅意識一啲都唔弱，平時用完嘅電池、電線、電器、燈膽絕對唔會當普通垃圾咁處理，家家戶戶都會將呢類型嘅資源儲起，再一次過送去大型嘅資源回收站。食唔晒嘅藥品唔可以直接掉落垃圾筒，而要交回藥房處理。近年開始一啲地區規定連廚餘都要分好，喺各個屋苑同超市都會派發專用嚟收集廚餘嘅紙袋。
收集好嘅廚餘經處理後所產生嘅能源會用作推動公共交通工具，而一般嘅嘅「廢物」會經梵化處理，大量嘅水會被所產生嘅能源加熱，再經由水管連接到唔同社區為各類大廈提供暖氣。喺瑞典，任何回收物資都能夠再次成為資源，每件看似廢物嘅都總有佢嘅用途，所以基本上不存在「垃圾」呢個概念。圖中呢間小屋其實係個位於森林公園嘅垃圾筒，應該話係資源回收筒先啱。
剛剛過咗嘅六月尾，斯德哥爾摩罕有地熱足一個星期，家中嘅廚餘分類未到半日已經臭到阿媽都唔認得。以上分類對環境有莫大好處，但空間同氣候都的確係好重要嘅因素。只能夠講，做到嘅就盡做吧，心安理得就好。
---
《為何斯德哥爾摩沒有譚仔三哥》專欄，逢星期二刊登於am730。
