制度暴力
喺分析年輕人衝擊立法會大樓，視死如歸，判輸嚟打，甘冒法律制裁，賠上個人前途人身安全之前，唔該睇睇大石砸死蟹、霸王硬上弓、愈演愈烈嘅十級制度暴力如下：
2003：基本法二十三條。制度暴力一
2007：皇后碼頭事件。制度暴力二
2012：國民教育。制度暴力三
2013：HKTV攞唔到牌。制度暴力四
2014：版權修訂條例（網絡23條）。制度暴力五
2014：袋住先篩選方案，落閘放狗。制度暴力六
2014：新界東北前期工程335億。制度暴力七
2015：鉛水事件，無人問責。制度暴力八
2015：三跑1415億，財務安排打茅波。制度暴力九
2016：DQ議員及參選人。制度暴力十
2017：國歌法。制度暴力十一
2018：港珠澳大橋1201億，超支至少166億。制度暴力十二
2018：高鐵854億，超支至少194億。制度暴力十三
2018：割地兩檢。制度暴力十四
2018：沙中線剪短鋼根，無人問責。制度暴力十五
2019：送中條例，無人問責。制度暴力十六
仲未計八萬五、喜帖街、普教中、廣東話「方言」、故宮撥款先斬後奏、銅鑼灣書店虜人事件、五度釋法、修改議事規則、東嶼填海造地等等，罄竹難書，數極都數唔晒，點叫平民百姓唔氣憤，唔咬牙切齒，慨嘆不可一世嘅庸官害死香港。
廿二年嚟，合情合理合法嘅抗議活動，香港人仲做得少咩？港府愛理不理，左耳入右耳出，對上兩年連扮嘢都慳番，數夠票就去馬，予取予攜，關人嘅關，你吹得佢脹乎？呢次大爆發，係日積月累嘅因果，因果者也，有因就有果，有惡因必然有惡果。
一片譴責聲中，慷慨激昂有之，痛心疾首亦有之，但你係咪譴責睇得到嘅「暴力」，扮睇唔到殺人不見血嘅制度暴力。如果捉晒啲「暴民」，係咪香港從此一天光晒？定係將會永無寧日？邏輯上，實務上，係咪本末倒置呀？
後記：
清單建基於網上資料，撮要改寫如上，唔清楚出處，在此一併謝過。
後後記：
再講一次，點解年輕人咁厭惡一國兩制，爭做香港人，唔信政府「高官」尤其林鄭，不齒啲所謂「社會賢達」，又咁憎警察，其來有自，當務之急，盡快成立獨立調查委員會，追蹤來龍去脈，查過水落石出，事後報告可以告訴香港人，未來將會何去何從，呢個重要過林鄭下臺，雖然大家好想。
廣東話方言 在 粵語唔係方言！ - Facebook 的推薦與評價
香港漢族人的母語是漢語，粵語只屬『地域變體』，只是漢語方言之一. ... 唔認中國人嗰啲東西又話廣東話係自己母語，祟洋的香蕉又話英文才是母語，本土怪話廣東話粗口先 ... ... <看更多>