《零零後們，介紹返，哥哥》
四月一，曾經係一個歡樂既日子，愚人節盡情去整蠱求開心，直到零三年，張國榮係文華東方酒店離開大家，呢十八年既四月一，無形添上一層灰暗。
今日無意中聽到有個零零後講起今日又播哥哥，佢地唔明點解年年四月一都會有佢存在，的確，每年都有人離開，但只有哥哥佢係四月一有人會紀念，作為八十後，成長係哥哥晚年，個陣只係傳佢有情緒病，而傳媒亦好集中報導佢情史，佢一頭長髮造型今日都無人可以carry到。
比起左右手，家有喜事，當你愈了解哥哥，就愈會明白佢既魅力，得罪講句，今日好多人追姜濤，我都幾欣賞佢，但比起哥哥，真係仲有一大段距離。
講音樂，佢既歌真係今日聽都好有味道，《追》今日聽你會檢視自己人生，《玻璃之情》你可以體會到人脆弱時既心情，《有心人》中個種若即若離既情愫，同梅姐既《芳華絕代》簡直係兩人互不相讓既巔峰表演。
曾經我覺得佢既唱腔好奇怪，佢既歌唔似依家咁直接，咁多高潮，但佢咬字同聲線好似講緊個故事你聽咁，有種令你久唔久聽返都唔會厭既感覺。
講電影，第一部我睇佢既戲係《胭脂扣》當年我仲係得幾歲，係我媽帶我入場睇，當年我覺得好悶好無聊，但懂事之後睇返佢演繹既十二少，真係有種糜爛而令人難以割捨既感覺；《霸王別姬》係亂世中為一個人一件事燒光一切，唔需要講，只係表情都可以令你感受到佢想講既野；《阿飛正傳》《東邪西毒》《春光乍洩》演活一個前無古人既感覺……
獲獎無數既佢，唔單止係歌手同演員，講人品，講專業都係無可挑剔，更重要既係佢忠於自己，但無傷害過任何人，留係我地心目中既都係美好，以及佢離開既惋惜……
我唔算係佢既粉絲，相信好多人比我更了解佢，我只可以將我所知既同零零後分享，呢一段日子，都會有唔少哥哥既歌同戲，或者你地可以認識一下佢，認識一下你地未出世時既巨星，感受一下今時今日甚少見到既星味。
四月一，唔講笑，唔整蠱，今日，聽下歌，靜靜地過，原來已經十八年了。
張國榮 《玻璃之情 在 張國榮Leslie Cheung - 玻璃之情 - YouTube 的推薦與評價
基於版權關係， 玻璃之情 無法在手機上播放，請見諒永遠愛您....Leslie 張國榮 - 玻璃之情 作曲： 張國榮 填詞：林夕編曲：D. Ling 監製：A. Leong 從前我會 ... ... <看更多>