［心裡面鳴謝你一再令我長進 白日夢刺激我自信］唔使轉彎抹角，盧永仁博士喎，真係細細個聽過。真係我未做分析員已經知佢威水史。我地亦唔使迴避，提起佢你諗起乜？咪執笠KOL，做邊間死邊間，股價必然唔掂，中環劏豬凳。一個佢，一個張震遠，令大家都恥笑啲收費天價，豬同羊都未識分就對你間邊爐舖指指點點嘅企管顧問，例如麥肯錫
真係唔使客氣，你以為佢本人唔知其他人背後點講佢？梗係知啦，記者試過當面問佢添。但盧博士只係淡淡言一句：「如果真係覺得我冇料，唔會有人搵我做嘢，市場最公道。」（http://bit.ly/2uHM6Zh）
但首先，埃汾嘅名句係乜？咩係淫亂咩係傷風敗德？人地做到你想做但做唔到或唔敢做嘅嘢，咪淫亂。所以陳冠希淫亂。同一道理，咩係呃飯食？人地搵到你搵唔到／唔敢搵嘅錢，咪呃飯食。我舊文寫過（http://bit.ly/2uLUd7a）「如果我是盧永仁，這句話太吸引」，其實三分抽水，七分真心。有得揀，你估我唔想做佢？你估你唔想做佢？即係有得揀你做唔做陳冠希丫？
盧博士講得好啱喎。你諗真啲話人冇料到呃飯食嘅係miss the point的。我畀你一單呃到飯食唔難。但正如盧博士講，喂，一路有人搵佢喎，一個傻仔兩個傻仔就話，全部都係傻仔？同佢有親？佢又唔係靚女有得畀人潛規則。
其實好簡單分析到。佢做啲公司股價潛水，係事實丫。但佢長做長有，又係事實。兩樣嘢夾埋，好簡單嘅結論啫：大把老細根撚本就唔介意股價潛水，甚至越潛越好（向下炒是也）。就係咁簡單。
根本咩股價好老細開心，係讀CFA嘅嘢之嘛。唔係錯，但肯定唔係間間係咁。你以為股價唔得代表佢辦事不力老細唔鍾意，你在夢中啦
有人請佢就已經係最大肯定。存在即合理。你見街邊靚仔拖住個醜女，可能醜女身材好好功夫好好呢？可能靚仔好變態呢？你唔係佢你點知？但冇人拎支槍迫佢，即係隔離嗰個有過人之處，你睇唔到啫
