人生一條龍（上）
呢個世界，有人好平凡，一世都寂寂無名；有人好有影響力，改變咗成個世界。
但好有影響力嘅人，都曾經寂寂無名。
無人估到得到，自己嘅未來會點。
正如我，依加我只係一個新入行嘅地產經紀，想開多幾張單，賺多啲錢。
我今日好開心，因為有個客買咗層樓，呢個客好爽快，睇一次樓就拍板買樓。
我當然對佢好殷勤，希望之後仲有生意嘛。
個客突然問：「係呢，你哋有無幫人買傢俬㗎？」
「買傢俬？」我唔係好明。
個客皺一皺眉：「買傢俬好煩㗎，又要度位又要揀又要等送貨，我做嘢好忙，唔想搞呢啲嘢。你哋有無得幫我買？當然會畀中介費。」
地產舖無買傢俬服務，但既然有錢賺，我自己都可以幫手嘛，仲可以同個客打好關係。
我好爽快咁應承咗，問個客對傢俬有咩要求。
「正正常常，普普通通，住得人就得啦。」個客擺擺手，連鎖匙都畀埋我。
我幫佢打點好一切，連床單都鋪好埋。
個客好滿意，畀咗唔少中介費我，亦同我做咗朋友。
後來，個客嘅老婆有咗，佢想請陪月，都叫我幫佢搵。
我開始思考，其實唔少現代人都好忙，唔想處理啲瑣碎嘢。
如果有個Apps，係一條龍咁幫你揀晒所有嘢，應該會幾受歡迎？
我搵咗幾個識寫Apps嘅朋友，一齊商量呢件事。
我哋發現，其實已經有好多Apps，幫人揀唔同嘅嘢，揀學校、工人、美容院......
但呢啲Apps都係獨立嘅，即係話，你想幫個仔揀學校，你就要下載揀學校嘅Apps，輸入你嘅資料同要求，例如你住邊區；
聽日你想美容，又要下載另一個美容院Apps，重新輸入資料。
我哋要做嘅，就係整合呢啲Apps，做一條龍服務。
每個人嘅需要都大同小異，就好似你買咗樓，就要買傢俬，分別只在於你鍾意咩風格。
無幾耐，我哋就推出咗一個叫「人生一條龍」嘅Apps。
由你畢業開始，幫你搵工、買嘢、租樓、買傢俬、安排婚禮、產前檢查、產後陪月、買奶粉尿布，再幫你個仔搵托兒所、幼稚園......
我哋無向用戶收費，而係向商戶收廣告費。
營運咗一輪，我哋發現，「人生一條龍」最重要嘅，唔係廣告費，而係數據。
從用戶嘅選擇，Apps可以推測到佢嘅性格，從而影響佢未來嘅選擇。
例如有個客租劏房住，但偏偏揀咗一場豪華婚禮，佢好可能係一個無乜錢，但鍾意炫耀嘅人。
所以，佢好可能會鍾意廉價嘅奶粉尿布（炫耀唔到），但會希望個仔讀名牌幼稚園，自細就學琴學畫畫學奧數。
咁嘅性格，佢都好容易超支，仲可以計算佢嘅收入同支出，適當時候推薦借貸服務。
有咁精細嘅數據，我哋唔再需要硬生生咁植入廣告。
我哋可以等客戶需要嗰種服務，再推薦服務，客戶好可能會接受，甚至覺得好貼心。
而唔再係你明明想聽音樂，無啦啦有個借錢廣告彈出嚟。
改咗廣告系統後，「人生一條龍」嘅使用人數大幅提升。
有唔少新嘅商戶，都搵我哋合作，例如婚介公司，亦令一條龍服務更完善。
估唔到，用戶透過Apps中嘅婚介服務，好多人都搵到合適嘅伴侶，比例遠遠多過婚介公司本身做嘅生意。
可能係因為「人生一條龍」有「真」資料，即係你去搵婚介公司，大家都會將自己描寫得好正氣，愛好睇書、睇電影、行山。
婚介公司根據呢啲興趣，幫你介紹「同樣鍾意睇書、睇電影同行山」嘅對象，但你哋總係唔夾，因為你所謂「鍾意睇書」，可能只係睇八卦雜誌。
「人生一條龍」就知道你真正鍾意乜嘢，如果你成日買點數卡、睇遊戲攻略，就幫你配對鍾意打機嘅對象，甚至係玩同一隻Game。
三十年後，「人生一條龍」已經成為人人必備嘅Apps。
我亦發咗達，後來，另一間公司高價收購我手上嘅股份。
我有少少猶豫，我唔知道，一個對人民生活咁大影響力嘅Apps，應唔應該就咁賣畀人。
但我年紀都唔細，開始想退休，同老婆仔女去吓旅行。
所以，我都係賣咗股份，將公司轉手。
我環遊世界，幾年後先返嚟，有個當年同我一齊搞Apps嘅兄弟，同我講，「人生一條龍」有啲唔妥。
以前嘅「人生一條龍」，係畀你用最方便嘅方法，作出比較同選擇。
雖然個Apps會整理你以前嘅選擇，作出推薦，但你都仲可以揀其他。
例如你一向鍾意粉紅色衫，所以一撳買衫，Apps就會推薦你買粉紅色，但如果心血來潮想買紫色衫，都可以搵紫色衫。
但公司轉手後，「人生一條龍」提供嘅選擇愈嚟愈少。
你鍾意粉紅色衫，今日突然想買紫色衫，但就搵唔到紫色衫，可能要撳半個鐘，load好耐先搵到。
面對呢種情況，好多人會怕麻煩，買番粉紅色衫就算。
至於出街買衫？更加唔方便，因為大家已經習慣用「人生一條龍」買嘢，所以時裝店都少咗好多門市。
下集：https://bit.ly/39zHH05
將專頁設定為「搶先看」/ "See first"，最新故仔馬上睇！
我係秦始皇：https://goo.gl/1iHVty
真實狼人殺：http://bit.do/fjP68
#短故 #短篇 #小說 #陳美濤 #廣東話 #粵語 #tomatochan #人生一條龍
