《元朗我最愛嘅燒味鋪。忠輝燒臘店》
.
因為相熟中醫在元朗，所以基本一至兩個星期我就會到元朗一次，果度附近有間叫忠輝燒臘店，每次上去睇中醫我都會特登去買返盒燒味飯作晚餐，真心好正㗎！朋友同我講原來我早響五六年前同佢已經結緣響天水圍！嗰陣時我響天水圍一間中學工作，lunch成日去天耀商場隔離嘅街市買燒味飯，嗰陣時已經超愛呢間燒味舖！估唔到原來嗰間就係忠輝！！！😱😱😱以為走咗之後冇乜機會食，原來佢搬咗嚟元朗，仲發光發亮！我知道佢仲生意好到開咗間分店響又新街！果然好嘢係多人欣賞！咁多年之後再同佢重遇，佢嘅燒味一樣係咁好味咁吸引到我！
.
雖然每次去到都見到大排長龍，不過好嘢真心值得等。我最鍾意食佢嘅叉燒，佢啲叉燒燒得够夠林身，如果係肥差仲正，格肥格瘦，中間嘅脂肪肥而不膩，好似食啫喱咁，就算瘦叉都好林，唔似出面啲叉燒勁柴同埋癡牙，如果食到外面其他好柴嘅叉燒一定black list嗰間燒臘舖! .
另外佢嘅其他燒味好似燒肉切雞油雞燒鴨，我都覺得響水準之上！單拼$26，雙拼$28， 鹹蛋都係$4一隻，我通常會叫雙拚加隻鹹蛋$32，價錢抵分量仲要勁足，師傅手起刀落大大舊，我已經幫襯左N次，所以都有少少心得，建議唔好嗌四寶飯，因為四寶飯都成$40入面得紅腸，咸蛋，雞翼和燒鴨，冇得食叉燒之餘份量又唔多，仲要係紅腸嗰啲下欄嘢，所以都幾失望，我通常係叫雙拼$28叉雞飯加多隻鹹蛋加$4三寶先$32已勁豐富！😆
.
基本上佢響元朗已經打出咗名堂，好多元朗人都識佢，我好開心宜家可以成日食到佢，因為佢的燒臘真係不錯👍👍如果經過見到大排長龍都值得去排一排！
.
—————————————————
店名：忠輝潮州鹵水燒臘店
環境🏝：6/10
服務💁🏼♀️：7/10
價錢💰：8.5/10
食物質素🍝： 9/10
整體🙆🏻♂️：8/10
地址：元朗泰衡街5號地下
#吃貨玩樂在元朗
#吃貨玩樂
#忠輝燒臘店
