取消愛情（下）
上集：https://bit.ly/3dPlom4
就好似我咁，作為琳琳追求者中最好條件嘅一個，我就順理成章地做到琳琳嘅男朋友。
但係，我個心始終有啲奇怪嘅感覺，又講唔出點樣奇怪法。
其實呢個星期裡面，我都有搵過琳琳㗎，但我同佢講任何嘢，佢都會問：「有咩可以幫到你？」搞到我唔知點答我。
終於，琳琳主動搵我，帶住完整嘅結婚計劃。
計劃中寫晒婚禮嘅細節，仲畀埋選擇我，每個選擇都列明Pros and cons，如果琳琳係我嘅下屬，我應該讚佢。
但佢係我嘅女朋友……其實都無咩唔好丫，我以前成日都怨，女人好麻煩，要估嚟估去；
依加所有嘢一目了然，咩都可以理性商討，我應該好滿足至啱。
我就抱住呢種「好滿足」嘅心態，同琳琳結咗婚。
無錯，咁快就結咗婚。
自從取消愛情之後，結婚率高咗好多，大家都用最理性嘅態度，去尋找最適合嘅伴侶，就好似招聘一樣。
我同夢寐以求嘅琳琳結咗婚，但我唔開心，我又講唔出有咩唔開心。
有一日，琳琳問我：「你呢排好似有情緒問題，我有咩幫到你？」
我望住琳琳對眼，忽然覺得好陌生。
一句說話衝口而出：「我點解要娶你？」
講完之後，我有啲後悔，但又有幾分快意。
無錯，我點解要娶琳琳呢？論條件，我可以娶到更優秀嘅女人。
我會娶佢，只係因為我之前被愛情沖昏頭腦，啱啱取消愛情後，我都未反應過嚟，以為自己仲好渴望娶佢。
依加我慢慢思考，愈諗愈唔抵。
琳琳沉默咗一陣，然後話：「我明白你嘅意思，你嘅條件的確比我優秀，為咗彌補你嘅損失，你有無諗過出軌？」
「吓？」我呆一呆。
琳琳好認真咁講：「我無辦法喺短時間內提高我嘅條件，只可以降低我嘅待遇，嚟達至平衡。
夫妻關係嘅默認設定，係對彼此忠誠，我可以放棄你對我嘅忠誠。」
我忍唔住問：「你唔會唔開心咩？」
琳琳答：「就好似揀婚紗咁，你可以用一千幾百，買一條質量唔高嘅婚紗，獨自擁有。
你要更靚更好嘅婚紗，又唔夠錢買，就只可以租用，難免要同其他人分享。」
琳琳冷靜嘅神情，就好似同上司討論緊，公司要唔要請多個人。
我好不忿，我當晚就去咗酒吧，搭上咗一個陌生女人，影咗幾張頭貼頭嘅親密合照，展示畀琳琳睇。
估唔到，琳琳好冷靜咁掃咗一眼，過兩日，就擬定咗一份協議。
協議嘅大意，既然我已經開始出軌，我可以給予出軌對象幾多資源，要將幾多資源留喺家庭中，以保障琳琳嘅權利。
我頓時無晒癮，我無再搵酒吧個女人，亦無同琳琳分開。
因為我終於認命，我意識到，無論我同邊個一齊，我都唔會獲得太多嘅快樂。
愛情有甜有苦，有喜有悲，喜同悲相輔相成。
當你唔再感受到愛情中嘅不快，當你唔再介意對方嘅一舉一動，同時就意味住，愛情無法再為你帶來快樂。
痛苦終將過去，哪怕眼前人唔珍惜你，
你都要珍惜，仲可以感受愛情嘅自己。
－完－
將專頁設定為「搶先看」/ "See first"，最新故仔馬上睇！
如果時光可以倒流：https://goo.gl/Fx2CUJ
我係外星公主：http://bit.do/eUwgU
#短故 #短篇 #小說 #陳美濤 #廣東話 #粵語 #tomatochan #取消愛情
