談談《挑戰者1號》與《屍營旅舍》的會通
[唔好再拍變型噹噹123456789喇!]
—
睇《挑戰者1號》，我好難唔去聯想另一套我好喜歡嘅電影《屍營旅舍》。
—
《屍》神嘅地方在於對於世界恐怖驚慄片嘅戲謔，直接指出呢個片種嘅公式，例如一定有班「明知山有虎，偏向虎山行」嘅傻仔傻女，人哋明明比曬警告，你偏要唔理；又或者係主角們公式化嘅設定：要有一個處女，要有毒撚，要有大隻佬，又要有金髮索女；情節上要有扮嚇你嘅劇情，要有啲啲嘅鹽花吸引觀眾，電影入面故意噴催情噴霧要男女主角搞嘢，唔係金毛偏要染髮討好觀眾，搞到變《恐怖蠟像館》咁，就係對恐怖片最大嘅諷刺。
—
《屍》最令影迷震撼嘅，當然係入面比"cube＂裝住無數驚慄電影嘅彩蛋，各式各樣嘅怪物兇群而出，殺得性起，屠殺果班視恐怖電影為公式嘅工作人員，爽快絕倫。而其實最後恐怖片種行唔行到落去，係睇觀眾會唔會接納創意，巨人破屋而出，主宰一切，大家究竟甘唔甘心不斷去接收呢啲公式化嘅電影？工作人員對於怪物嘅「抽籤」，場景嘅選擇，其實一切「換湯不換藥」，點解佢哋可以大受歡迎？成也觀眾，敗也觀眾。
—
而觀乎《挑戰者1號》，無數嘅彩蛋好似走馬燈咁喺觀眾眼前閃過，甚至將某啲作品嘅致敬演化為故事嘅主線，《閃靈》真係文化界一大嘅經典。
—
《挑》嘅故事好簡單，就係未來進入咗一個VR虛擬嘅年代，喺現實世界除咗食同飲，基本上已經無咩作用，戴個眼鏡就可以穿梭喺幻想嘅世界當中，但呢個「綠洲」開始咗一場爭奪「彩蛋」嘅遊戲，邊個搶到，邊個就可以控制「綠洲」。而主線故事就係講五個年輕人同大財團鬥爭寶物嘅故事。
—
後生仔係忠，大財團係奸，因而產生戲劇衝突，但點解大財團要係「奸」嘅呢？佢哋財雄勢大，做嘢最多係不擇手段，聘用咗大量嘅體育同學術精英去幫手破關，勝出幾無懸念。
—
但，《挑戰者1號》係一首對流行文化嘅頌歌，所以大集團必須係奸。文化之所以會出現，最重要嘅元素就係「創造」，電影入面出現嘅電影、電玩等等嘅角色，雖然每隻造型特色都唔同，但係又各擅勝場，各自有自己嘅忠實粉絲。但如果綠洲落入大財團手上，究竟會發生咩事？
—
情況將會逆轉，流行文化將會為財團賺錢而服務，而唔係創造自己心愛嘅文化再賺錢。就好似大財團嘅卒仔們喺世界內世界外一式一樣嘅制服，令文化陷入公式，窒礙世界嘅創造力。
—
今時今日，抄襲當道，REBOOT成風，荷里活等領頭大佬如是，為了確保利潤而宥於創新，寧願繼續拍《變型金剛123456789》，一如幾年前《屍營旅舍》的警世鐘，並將論述推而廣之至所有流行文化，唔係有嘢成功咗之後就用到佢爛，而係整啲好嘢出嚟開闊世人嘅眼界，創作人們，究竟肯醒未？
