［第十三餐］Campus Café
1. 咪就係，Campus Café．好似香港都興過一輪呢類Campus Café
2. 型格，而呢間就真係叫Campus Café，在台北都唔少分店，以前食過都不錯。今次又係叫外賣。大件夾抵食。
3. 首先係右邊呢個，「奶油明太子總匯海鮮燉飯」，即係「忌廉/白汁海鮮risotto」。盛惠300，抵玩。味道很好，雖然就冇明太子味。啲「海鮮」亦冇乜特別，只係食個飯都夠。
4. 左邊呢個呢，Buffalo Wing，水牛城雞翼。210。嘩，咁多嘅。結果唯有夜晚食少啲。
5. 想講一講呢個水牛城雞翼，同我想像中係有啲距離。我心目中以為係唔落粉炸，用個辣汁。亦都有啲係落粉炸，但都有辣汁。而家呢個就普通炸雞翼，只係畀個水牛城汁你點。咁當然冇話正唔正宗，好食就得。咁還算好食的。不過總係覺得爭啲，「雞翼還雞翼」「汁還汁」
6. 然後講下，中文名是譯啱的，不化爐，係水牛城，唔係水牛。Name after個地名，唔係隻嘢。同「星洲炒米」「葡國雞」等等唔同，水牛城，就真係有水牛城雞翼。不過聽聞在水牛城，啲友就咁叫雞翼，default就係呢隻嘢。其他地方先要講明係水牛城雞翼。
7. 然後呢，其實我以前都研究過下，「到底鬼佬食唔食雞翼」。咁美國人當然係食的，你去KFB 哈迪斯（已死，嗚）都見到，仲有呢個水牛城當然都係美國嘢。但英國鬼呢？歐洲鬼呢？都冇話唔食，但就真係唔係十分多食。同華人肯定好唔同。
8. 因為廿年前我在英國讀書時，窮學生嘛，梗係自己煮。固然都係劣食但總算係手作仔。咁在超級市場買嘢啦，見到啲鬼佬鬼婆就鍾意雞胸肉，三四鎊一細舊（廿年前喎），都幾係嘢。但反而啲雞槌雞翼就大特價的，兩鎊一大盒。所以嗰時成日都食。亦令我覺得鬼佬應該唔多食雞槌雞翼。
9. 咁但，當然，呢個「乜乜人唔食XXX」句嘢都有啲含糊，都係多得全球化。「即係上一代都講中國人唔食生冷嘢」，但而家莫講話香港台灣，你在大陸都人人食日本刺身啦。同樣地，世界都係會變嘅，幾十年已可以變好多，上次篇文都寫過，「台灣人唔食牛肉唔食麵添」，「老鬼日本人亦真係冇三文魚刺身」，但時代會變的。同呢個「韓國菜冇羊肉」一樣，而家你去韓國菜館都係唔會見到有羊肉，但一樣有四川打邊爐有西餐咁解，雖然我識有唔少韓仔韓妹都唔多會食羊。
10. 講返呢個水牛城雞翼，又係歷史唔係好長嘅嘢。根據我嘅研究（即係，上維基），話半世紀左右。之前亦真係「美國人唔食雞翼」，一係拎去掉，一係拎去煲湯（美國人，真係恐倫布）。
11. 結果我都係一個人食晒（唔係畀邊個食？），咁所以夜晚嗰餐就食少啲了—「以我嘅標準」。
12. 又，照計14日唔重覆，完全冇難度吧。我估叫外賣一個月唔重覆都得，even我都有啲麻煩唔係乜都肯食。但出關之後7日我估會重覆，因為有啲好嘢都係堂食好。
13. 又，真係多得外賣平台。都話之前冇用，但而家一用就好有用。亦證明我唔揀酒店餐係正確。我保證我去訂W Hotel（好似係隔離酒店）都冇咁好伙食，你在香港住置地文華（有份做隔離酒店）都冇咁正。始終團餐，日日煮，仲要同一間供應你14日。「即係妻不如妾，妾不如婢，婢不如妓，妓不如偷，偷不如偷不到」，人總係貪新鮮。雖然在食嘢方面，我已經係出名可以同一個早餐食一年嘅人。但講到尾，頂，為你地有文睇咋！我就真係重覆OK的。
14. 同樣地，訂呢間酒店係貴啲的，但好在佢唔限你幾時訂餐。有啲酒店就算畀你自己叫外賣，都只係指定時間。咁埃汾呢啲半夜三點叫嘢食嘅就唔掂。而酒店又真係要多啲工作多啲人手幫你拎上拎落，所以都係錢解決到問題
15. 但又，埃汾呢排工作效率極低，其中一個原因亦係外賣app．真的，團餐嘅好就係你唔使用腦，有外賣app就江湖從此多事 ，好似皇帝選妃咁，花多眼亂，有時諗食乜都搞半個鐘。都幾大鑊。但又怕揀咗啲難食嘅會後悔。你諗下以前？咪只係食屋企樓下嗰幾間嘢，再難食你都要食架啦，頂多揀佢冇咁難食嘅嘢。而家太多選擇有時都帶嚟煩惱。叫外賣後，求偶係，做人都係
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已800人訂！（https://bityl.co/4Y0h）
想買葡國樓 在 精選葡萄牙置業｜投資｜移民Invest in Portugal - Facebook 的推薦與評價
葡國 特色物業歡迎查詢！ 本公司多年來直接跟葡萄牙伙伴緊密合作～ 我們公司主要負責移民，投資，創業有意了解可找我們聯繫： whatapps: +853 6218 1573 ... <看更多>