【深夜特襲】【試讀版，會吊癮，不喜勿入】
K房侍應
N仔，係响oldway卡啦ok 做嘅，邊間分店就唔講喇，無謂大家去起佢底。
佢同我講，做夜更K房嘅同事，其實大家都好有共識架喇，事關K房間隔封閉，一啲陽光都射唔到入黎，長年累月不見天日，濕氣又重，而且通常污煙瘴氣，唔知咩人入黎，又唔知咩人出去，聚陰，都無可厚非。
N仔話，夜晚好幾次都見過有啲「生面口」同事晌走廊行過，著住公司制服，好正常嘅，但硬係好似未見過佢，到擰返轉頭嘅時候，嗰位同事已經唔見咗。
又試過有次執房，自己一個踎晌枱邊執緊地下啲垃圾，突然眼尾睄到有幾對腳排排晌梳化前面，即係好似平時有客坐緊咁，嘩表，明明自己一個執緊房架嘛，企返起身再望，乜都無。嗰下先堅識淆，喂，地下啲 nuts 我執唔執好？
嗰時佢新入行，唔知規矩，同師兄講，師兄先話佢：「乜你咁豬，執房第一件事梗係開猛晒啲燈先啦。」原來，佢唔識，啲客走咗，佢就擒擒青衝咗去執。師兄仲話，如果電視未熄，都盡量mute咗個聲，話試過有同事無熄聲，由個音樂晌房入面播，自己晌廁所執緊嘢，突然首歌由的士陳變咗做一首好舊嘅合唱情歌。至爆係真係有「人」晌到哼緊，你以為係首歌嘅和音黎？呢位專業嘅同事話，當時肯L定聽到係有人入咪哼住首歌啲音出黎。
佢戰戰兢兢由廁所慢慢轉返出黎，係咁大聲講住：「唔好意思，做嘢啫，打攪晒…」佢好驚，如果出到黎真係有兩個恐怖樣係度唱緊歌咁點算，一面諗，佢就一面更大聲講：「唔好意思，做嘢啫，打攪晒，打攪晒…」
一出黎…
「現實太少新意 但是遇上這女子 引發心思」
又變返的士陳……嚇得佢吖。
佢人生第一次覺得，見到的士陳係可以咁有歸屬感。
講返N仔，嗰晚可以話係佢最近距離嘅一次貼身經歷。
大約都差唔多凌晨三點，有枱細房客走人，N仔入去執房，一入去，突然見到有個人影攤咗晌梳化到。N仔起初嚇一嚇，即刻開燈望真啲，原來係女黎嘅，仲要索，即刻唔淆，仲有份正義感湧上黎。
「小姐，你啲朋友走晒喇喎。」N仔大聲行近講。
嗰位小姐好似濛濛鬆鬆咁坐咗起身，N仔初步相信佢啲朋友賴底咗佢晌度，就再話：「你啲朋友走晒喇。」而因為眼前呢位小姐其實幾索，所以N仔繼續：「乜佢地咁衰呀，使唔使幫你打畀佢地？」
N仔都覺得自己勁nice，畀著係扒，應該已經一九閂門開大暖氣焗熱塊豬扒算。
「你電話晌唔晌身呀？」N仔問。（其實想順手問人攞電話）
對於今時今日有咁嘅服務態度，顯然都係未夠架，因為個女仔無應過佢。點先至岩？N仔自發起身：「等我一陣。」就衝出咗房。
「吓！做咩呀？」聽緊佢講嘅我地急不及待就問。
「去攞杯水畀佢囉…」N仔答。
「表，你駛唔駛呀，前世未見個女咩，係咪男人黎架你？」我地其中一個大隻friend咁講。
然後，黎到呢度，我地即時stop一stop佢先，因為，有樣重要嘢要必須搞清楚，就係：「你講到條女咁得，形容一下似邊type先。」
N仔費煞思量，終於講咗一個名字出黎。「係要講嘅話…似TBB嗰個簡淑兒囉！」
呀表！衰仔吖。
「哦！」我地異口同聲表示明白。
佢繼續，咁隔咗一陣，N仔就真係拎咗杯水入去喇。
「睇下飲杯水會唔會好啲？」N 仔見佢迷迷糊糊，好似貓咗咁，就拎杯水遞畀個女仔。
「唔駛喇，唔該。」個女仔望一望N仔，答。
大隻friend即刻插咀：「你又係嘅，都唔醒目，係咪杯水太熱呀？熱辣辣點飲啫！」
個女仔之後問N仔可唔可以送佢出去，N仔就緊係話得啦，個心仲諗緊係咪要即刻同阿頭請個sick leave直落下場。
於是乎兩個人就企起身，N仔躊躇係咪要扶佢，攬腰呢又無理由，扶住隻手呢又難開口，個flow亦唔係咁順。
終於佢都係懶好笑咁講：「駛唔駛扶你出去吖。」
個女仔微笑：「嗯。」
然後一下搭住咗N仔個膊頭。不過，個搭法就有啲奇怪，我當初聽到嗰陣，仲以為類似「好兄弟」肩並肩嗰隻搭法。唔係喎，係一隻手放晌佢左邊膊頭，一隻手放晌佢右邊膊頭咁。
即係…
好似細佬仔玩火車損山窿嘅搭法。
N仔晌前，個女仔晌後…
勁共勁勁共……
嗰刻個畫面......
嗱嗱嗱想知N仔同呢個簡淑兒跟住點？
去買返本《口耳相傳的香港鬼故事２－歷歷在目》啦！
Tag 情人好朋友叫佢聽日落書局買本畀你。
#期間限定 #感謝助養作者計劃 #試讀 #的士陳 #簡淑兒 #離奇家遮 #恐怖 #鬼 #鬼故 #離奇 #靈異 #不可思議 #驚 #淆底 #香港 #口耳相傳的香港鬼故事 #文字 #歷歷在目
