重溫「小病是福」
老媽子講，我細細個上契齊天大聖保平安，或者因為咁，特別鍾意運動，好少病痛，偶然唔舒服，都覺得小病是福。
92年，陪老豆去診所檢完查，隨口噏：「小腹痛咗幾日。」醫生吩咐瞓上牀，左撳右撳，「你老豆走得，你唔走得，慢性盲腸炎，隨時變腹膜炎，即刻去做切割手術。」留院期間，撞正歐國杯外圍賽，屋企人攞咗架小型手提電視機，夜晚睇直播，日頭招呼絡繹不絕嘅親朋戚友，又有老婆餵食粥，完全唔使郁。爽，小病是福。
98年，足球比賽中，畀個波兜口兜面省中，雙手掩面倒地，隊友檢查傷勢，大叫：「血呀。」擘開雙眼，一片白濛濛，乜都睇唔到。去到醫院，醫生植入矽膠，填補視網膜裂縫，瞳孔撕裂就救唔番，從此伸縮不靈。畀老婆徹底問候完，咪又係噓寒問暖，照顧周到，乜都唔使做，半個傷殘人士，地鐵有人讓座。爽，小病是福。
今趟心臓病發，除咗心受重傷，死咗啲無得復元嘅細胞，裝咗六件支架，終生食藥之外，頭尾不過四日，傷口得個小窿，無劇痛，無不便，仲有成村人關心。諗起休養期內，唔使洗碗吸塵晾衫，無人再叫我跑馬拉松啦，第時見到老婆想鬧我，只要揞住心口，皺埋眉頭，大人肯定收口。超爽，小病是福。
乜嘢係小病？取決於積極正面樂觀心態，呢幾樣品性，我都有；明知改變唔到事實，不如接受；既然接受，不如苦中作樂，快樂總好過哀愁。
「老婆，小病是福，口淡淡想食橙。」
「好番，小你個頭，去幫我搣個橙。」
後記：
寫於四年前，今日重溫，仿如隔世，發覺好多嘢都變咗，自己老咗殘咗慢咗，香港更係面目全非，但有幾樣無變過，積極正面樂觀笑面，終生追求快樂，完全無變過，仲係咁信守《道德經》嘅教訓：「一曰慈，二曰儉，三曰不敢為天下先。」好彩。
後後記：
珍惜今日，忘記昨天明天，一書在手，老婆在旁，樂以忘憂，不知老之將至，呢種生活，係幾咁令人嚮往。
後後後記：
形勢比人強之下，惟有積極正面樂觀幽默，才可以培養創意毅力剛強，謹守公民崗位，屢敗屢戰，切記。
慢性盲腸炎 在 慢性盲肠炎怎么检查有来医生 - YouTube 的推薦與評價
慢性盲肠炎 的检查如下：1、盲肠的位置与阑尾位置一致，而慢性盲肠炎也为慢性阑尾炎。患者可使用B超的方法，查看有无肿大的阑尾，若阑尾肿大且静止， ... ... <看更多>