【回想時間】第一集＿可怕的「害喜」
記得啱啱開始知道有貝貝果時 當時好似已經個零2個月 一直都相安無事 但慢慢我就開始無胃口 完全無晒對食嘅慾望
最記得果時嚴重得每日三餐前嘅一至兩小時 我成個人不期然就好驚 我好驚我又要準備見到野食 對食野變得越黎越恐懼
「有咁誇嗎？」
真係！真係！唔係講笑！當時我地兩公婆多數都係食出面飯為主 只要一望時間知道差唔多返工時 我就已經開始唔舒服 每次坐住車去目的地嘅時候就開始作嘔 老公仲成日話係咪貝貝唔鍾意佢所以成日見到佢就想嘔 但其實大概係因為每次老公接就係去食飯 所以我就變得好唔舒服 但就算我幾唔舒服 或者可能最多我自己唔食囉 但我都唔可以因為我唔想食而令老公唔食飯架嗎 但！係！我嚴重得連喺商場路過/搭lift見到果啲每層有咩食嘅宣傳品 我望到都會反胃 我有一刻諗過我會唔會變咗厭食症?
而初初有bb正正值值係我結完婚仲係瘦得棚骨嘅日子 個個都好擔心我都已經瘦到咁 唔知我點陀bb 而不斷叫我 「食多啲野 唔食bb點有營養呢啲嘅說話」 老實講 新手媽媽每次聽到呢啲說話係會崩潰 因為絕！對！係難聽過粗口 （如果食得落其實你覺得我真係唔會食？） 只要你幻想我果時望住相都想嘔 我又點放一件食物入口呢 ？
又或者有時我個心係想食一樣野 之後我地就去搵啦 但可能長途跋涉完 或者買到番黎 突然間我又好驚 好唔想食！
仲有就係每次刷牙都係一種折磨 只要一放牙刷落口又係就想嘔 每次都迫自己求其快快手撩兩下就算
果段日子真係覺得時間好漫長～到底幾時先會過去
但其實我覺得自己比起好多媽媽已經好lucky 因為全個孕程我真係會嘔得出黎嘅次數應該唔多過5次 當時嘅我只有無數次作嘔但無真係嘔出來 仲記得果時去戲院睇戲都唔敢入 搭長途車又好驚 返工時又好驚(尤其未正式公佈果時又要同大家食lunch) 真係好驚唔知邊一刻會反胃
最後搵到屬於我的舒緩方法 都希望幫到你地：
1: 隨手袋住自己覺得最酸嘅野 因為我從來都唔會食話梅果味野 我推介的就係Super lemon同埋三角形果隻酸酸糖 只要每次一黎料 我就會即刻拎出黎啪一粒 再慢慢深呼吸到無事為止（老公當時稱之我為道友）有時慌亂得制我又要叫老公幫手摷袋 摷唔切我會鬧佢會好崩潰🤬但呢個方法的的確確對我來講係最有效的方法 果時唔知食咗幾多粒呢啲糖 好彩無糖尿
2: 上網睇每次嘅害喜代表bb每次都係到成長緊1啲野 雖然當刻好辛苦好絕望 但係我腦裡面會不斷不斷催眠自己再同肚裡面講 「bb好叻 bb又大個咗 快啲大個啲咁自己就唔會再作嘔 媽媽辛苦啲都唔怕」跟住慢慢深呼吸到鎮定為止
其實唔想食就唔好迫自己食野 唔好因為身邊人講嘅說話 辛苦自己隔硬迫自己食 媽媽自己最清楚自己情況 孕初期食少咗野係好正常嘅事 唔會影響bb 記住u are not alone 最緊要搵到方法令自己開心 令自己心情好先係最重要 過咗孕初期 之後食量自然會好返 會越黎越想食野 食到變左肥豬好似我咁
如果正在經歷同樣苦況嘅媽媽 我都好希望你地睇完內心會好啲！頂住呀！今日星期1 聽日星期2 後日星期3 好快就1星期！不斷咁諗 孕初期好快就會過架嗱～
多謝睇晒全文的任何一個你！唔知有無人想我下集分享D乜呢？
⭐️害喜的狀況一般出現在懷孕6週到4~5個月間，只有少部分的孕婦會持續到7~8個月，而害喜程度因個人體質而異。
害喜所表現的明顯症狀是經常噁心、反胃、嘔吐，另外也會有頭暈、疲倦和耳鳴等現象。這些症狀在低血糖、飢餓或者聞到某些味道時反應特別明顯，且最常發生在孕婦早晨起床的時候⭐️
FB: 貝貝Alice-小寶貝夢遊日記
IG:bowl_lam
#貝貝Alice #90後媽媽 #香港媽媽 #害喜 #新手媽媽經歷 #孕初期 #貝媽誠意分享
懷孕初期症狀 香港 在 [ 我懷孕了! ] 如何發現 早期懷孕症狀 | HIDDIE T - YouTube 的推薦與評價
56K views · 2 years ago #懷孕 #pregnancy #香港 ...more ... 我懷孕了 肥仔波的反應 懷孕初期症狀分享| cheerS beauty【中字】. ... <看更多>