我撐本地波倫敦直擊🤭
真·由本地走向世界👏🏻👏🏻👏🏻
#點解我唔跟查維斯去馬爾代夫
#唔跟周返日本
#唔同杜度去旅行
#喂呀我可以隨團㗎 😩
#唔明上文第二句嘅可以睇番廣告
#仲有邊到睇得番
#成為大人之後最冇尊嚴係冇暑假放 😂
【我撐球員開心放暑假】港超聯嘅球季就完咗好一段時間，但係有啲球員就仲有波要踢，除咗新出爐嘅香港足球先生華杜斯代表匈牙利踢國際友誼賽之外，仲有理文中堅孫民哲喺倫敦參與獨立足球聯盟世界盃（CONIFA World Football Cup），代表「在日韓人聯隊」（United Koreans In Japan）參賽。
獨立足球聯盟（Confederation of Independent Football Associations）2013年喺瑞典成立，成員多數都係未受普遍承認或者無法加入國際足聯（FIFA）嘅國家、地區、少數族裔或者無國家民族，成員包括世界各地40多個國家同地區。今屆獨立足球聯盟世界盃喺英國倫敦舉辦，賽事喺5月31日至6月9日期間舉行，有16支球隊參賽。至於由孫民哲出任隊長嘅「在日韓人聯隊」，喺小組賽排第3名後，直到星期六（9日）嘅最後一場排名賽，喺90分鐘後同西藏打成1比1平手後，互射12碼以4比1嘅比數贏波，最後球隊就以第11名完成賽事。
講到自己下季嘅去向，孫民哲就話依家仲未可以落實︰「我依家同理文約滿咗，目前仲係透過經理人幫我同港超球會傾緊，如果可以留喺香港就最好啦，否則就可能會試吓去印尼落班。」雖然「阿Son」仲未知下季去邊，但係佢就話喺英國踢波嘅時間好enjoy，可以令佢忘記一下煩惱︰「喺倫敦踢波真係好正，環境好舒服！雖然球隊入球能力係低啲，但係一班年青球員都好虛心學習，同埋都好高興可以同前北韓國腳安英學合作，所以今次嘅體驗真係好開心！」
文、相片︰曼頭
