【寢食難安乜可以解決問題咩？】
其實比人有個容身之所，儲下錢先諗得唔得？「寢食難安」！
講起香港買唔買樓，拗幾日都唔會拗得完。你話有排升，唔買就笨。佢話買得起，都供到癲。我就話點解唔可以比幾年到十年時間年青人自己儲下錢，自己揀呢？講到尾其實都係有瓦遮頭，安身之所又可以有聚積小小財富。香港年青人就係無咁嘅機會，同家人住又擠迫，租又燒錢，買又要首期（重驚爆）。
一個香港年青人，萬一「咁好彩」或者「叻」有能力或者父母幫忙上車的話，可以買到幾大嘅容積（因為所有空間都要用盡）嘅樓呢？大過一個車位小小嘅蚊型納米上車盤，容積可能同架七人車差唔多嘅都要六七百萬（過千嗰啲唔好講）。如果揀啲新樓所謂嘅九成按揭，供四五萬一個月。即係一個月唔呼吸唔飲食，都已經無咗一半收入或以上。
唔好怪我得罪講句！就算成功上到嗰啲蚊型納米盤架車，唔好話家嘅感覺，真係連酒店嘅感覺都無啦。响間煮到無位食，屙到無涼沖嘅「家」喎？其實一生人大量休息時間係咁，會唔會慘咗啲呢？比啲時間同光陰，等人儲下錢睇定啲好嗎？
公屋？唔好玩啦！幾時小學可以開始，申請排隊呢？無地起公屋，有地土地拍賣。地小人多厘啲概念呃上一代到我嗰代，咪再呃啲後生啦。
竟然又話無地之餘又要迫人租或者買貴樓，Caravan（大型旅行車）係唔係一個可能性。節衣縮食十年八載或者/加埋屋企人嘅棺材本，先夠比首期買咁嘅容積嘅樓。買架咁嘢住真係好似好啲，容積分分鐘大啲，供車、保險加停車場，可能實際啲。至少免裝修，免地租，免管理費喎！其實咪等如一個Studio Flat。
Caravan一樣係一間屋應有嘅嘢都齊全，納米樓嘅廚房同厠所都搞到變型金剛咁先用到啦。如果又係講嗰啲安全，發牌，防火之類此類嘅問題。我真係想知厘啲解決問題嘅成本貴啲，還是依家香港啲地價貴啲？最多咪好似美食車咁，指定地方唔比駛出街！其實外國好多人都係住响流動車屋，香港點解唔可以考慮下。新界又咁多鄉紳擁有咁多爛地停車場（咪又係兩三千月租），比人泊晒响度住咪平好多又可以回氣儲錢。
如果一個政府真係關心市民嘅住屋問題，講乜嘢「寢食難安」厘啲門面嘢吖。乜都應該諗下，試唔同方法！而唔係諗黎諗去，都係個「價」。因為個「價」就係包含好多利益，世界上係無政府諗得掂嘅（除非大土改同鬥地主囉）。
#唔係曲線
#真心提議
#我估相嗰架車
#實用過納米樓
#回下氣諗下得唔得
