我估唔到幾十年前既教仔方法到今日都仲有人會用
唔讀書，係咪想做的士司機？
唔讀書，係咪想做乞衣？
唔讀書，係咪想做掃地？
有人認為呢件係歧視，職業無分貴賤，呢點我當然認同，但諗深一層，就算唔講都好，呢班人又係唔係真心覺得無分貴賤，係一份佢想個仔做既職業呢？
司機群組有人話，自己有幾個的士牌，分分鐘仲富貴過呢對母子多多聲，咁係唔係將個目標，改為乞衣、大食懶、廢青廢中廢老，呢種恐嚇式既教學，就變得合理呢？
我著眼點係，呢位母親，真心覺得恐嚇係有用？
教仔有幾個層次
最低層次係強迫，我係為你好，你聽我講就得
比較好少少，就好似呢個老母（先唔講歧視）用邏輯上既不安去令小朋友因為害怕而改變
事實上好多大人都係會用呢套邏輯
你唔想肥啊，戒口啦；你唔想死啊，戒煙啦；你唔想乜乜乜，咁就唔好做乜乜乜
但我分享返一種，我聽過最驚為天人既教仔方法，到今日我都記係心入面，有個老母，指住街上面既乞衣講：
「阿仔，如果你將來讀好書有能力，就可以令呢個世界既乞衣減少，令更多人變得幸福。」
當時我終於發現，最可以令人改變既，唔係令佢害怕，而係令佢可以幻想到美好，令佢眼光胸襟更大。
讀好書，你可以改變呢個社會，令的士司機唔會受到歧視，社會上每一個崗位既人都可以安居樂業。
我唔知，呢個方式會唔會令小朋友真係做到佢所講既野，但起碼，呢個小朋友唔再係只睇自己
