《無異之局》荒村異聞（八）
【無二視角】情況同我估計嘅差唔多，「城寨幫」果然安排咗人看守喺凌永岳所死嘅地方。
而且，眼前嘅呢對孖生姐妹──「燕」同「蝶」顯然唔係泛泛之輩。從散發嘅靈力推斷，佢哋異能等級大概接近七級……同今朝早搵上門嘅陸孝忠差唔多。
換句話說，佢兩位應該都係「九龍」──解釋返，「九龍」係「城寨幫」九位頂尖高手嘅別稱，亦係幫主（凌永岳）同長老（董炎）以下地位同權力最高嘅人物。
「鼠輩！」見我不斷閃避完全冇還過手，『大姐』燕怒聲咁講：「就算你唔還手我哋都唔會放過你！」
「冇錯！」『細妹』蝶和應：「你都已經落手殺死少爺……就唔好喺度扮仁慈喇！」語畢，佢再次揮劍刺過嚟。
＝＝＝＝＝＝＝＝＝
另一篇長故《扮工鬥室》Patreon 連載中！歡迎訂閱支持！
https://www.patreon.com/echoofheart
《荒村異聞》連載中：
https://www.facebook.com/pg/Echo.of.Heart/photos/?tab=album&album_id=2067100083421797&__tn__=-UC-R
《惡夢島》全集：
https://www.facebook.com/pg/Echo.of.Heart/photos/?tab=album&album_id=1861298627335278
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
【廣告】《無異之初》、《無異之地》各大書局有售！
＝＝＝＝＝＝＝＝＝
我以一厘米之差避開咗佢直刺喉嚨嘅一劍，退後幾步之後回應：
「我咪講咗所有嘢都係誤會，點解妳哋硬係聽唔入耳？」
下一瞬間佢哋兩個已經衝到嚟聯手夾擊，燕先一劍然後蝶預判我避開嘅位置再補一劍。
幾乎就要命中嘅一瞬間，我身上嘅「保護牆」終於發揮作用（同喺「惡夢島」保護399號嘅係同一招數），蝶嘅劍尖就好似刺中一道牆咁反彈開……
「可惡……」受到反作用力影響，蝶握劍嘅右手當然係受到小傷。
可能見呢下咁好機會都傷唔到我，佢哋總算肯暫時停低動作。
「如果係誤會……咁點解你哋會識嚟呢個地方？」燕問。
雖然佢表面上係提出疑問，但實際上……除咗係俾時間蝶恢復，同時亦係想搵出我嘅破綻。
既然係咁……
「係陸孝忠話俾我哋知。」我如實作答，反正佢都冇話過唔可以同其他人講。
「忠哥？」燕一臉意外，呢個語氣聽落佢哋應該關係非淺，「佢明明話今朝突襲嘅時候俾你哋偷走咗……」
「事實唔係咁，妳嗰位忠哥相信我哋唔係兇手，所以先透露呢個訊息……妳返去問清楚佢就得。」
「咁你之所以喺呢度……」
「當然係為咗搵凌永岳問清楚。如果佢係含冤而死，咁佢嘅『遊魂』肯定仲喺呢度附近……話時話，你哋『城寨』人冇試過咁做咩？」
「我哋『城寨』有條幫規……就係唔可以太過接近『白湖村』嘅結界，以防錯手釋放裡面嘅『妖邪之物』。」
呢個規定，九成係「天師」陸孝虎當年定落嚟。當然，定得一定係有佢嘅理由，所以我並冇打算質疑。
「所以妳哋先會喺外圍等？」
「除咗等你哋，亦都係等緊少爺出現。」燕回應：「無二，假如你真係唔係兇手。咁你就乖乖跟我哋返城寨，到時只要確認清楚……自然可以還你哋清白。」
「嗯，呢個的確係最好嘅方法。」蝶同意。
「聽落係唔錯，但關於『確認清楚』呢點……我冇估錯嘅話，呢部份應該係由董炎負責？」
「呢層當然。」燕回應：「而家凌少爺唔喺度，佢就係『城寨幫』地位最高嘅人，而且佢仲係出名嘅……」
「拷問師。」我打斷佢，嘆咗口氣之後講：「咁我只可以拒絕喇，因為我完全信唔過你哋嗰位董伯伯。」
試想像下，假如佢係兇手又或者幫兇，咁俾佢「拷問」肯定係唔會得出咩好結果。
「咁即係冇得傾落去喇。」燕望咗眼蝶，確認過眼神之後重新握緊細劍。
「只要妳哋願意等，大可以等我助手去搵凌永岳……」
「我哋唔信你……自然都唔會信你嘅助手。」蝶冷冷咁回應。
果然到最後都係還原基本步。但我並冇失望，因為喺佢哋搵我破綻嘅同時，我都唔係撓埋手咩都唔做……
首先，我已經再次確認周圍只有佢哋兩個，應該唔會有人騷擾到阿聰……
「蝶，妳係咪已經確認清楚？」燕將劍尖劃過飄浮喺空中嘅燭台，碰到燭火嘅一刻，劍身隨即被點燃起嚟。
蝶點點頭，然後將劍尖輕輕劃過草地，草隨即高速生長好似藤蔓一樣包圍劍身。接住由佢再次展開攻勢，但連刺三下都依然打唔中，起初我仲懷疑緊分別喺邊度……
但就喺下一刻，我突然感到雙腳完全郁唔到。低頭一望，先注意到有堅韌嘅藤蔓緊緊咁纏住我雙腳。然後纏繞劍身只係假動作，真正嘅目的係咁……
「燕！」但蝶並冇乘勝追擊，「佢嘅真身喺左手邊！」
「收到！」燕即刻直奔過嚟，但目標並唔係之前同佢哋對話嘅『我』。而係幾十米之外，一直隱身安安全全咁觀察一切嘅我本人。
說時遲那時快，下一秒佢已經嚟到我面前，一擊火劍直破「保護牆」，以壓倒性嘅氣勢刺入皮膚之內……
但結果並冇如願直刺入我心臟，因為喺最後一刻，燕突然反射性咁收劍，然後連退好幾步。
「你……」燕一臉驚恐，「到底……」
「燕！？」蝶都好驚訝，因為呢下明明係千載難逢嘅機會……
「妳唔好過嚟呀！」燕大喊道：「外間對佢嘅傳聞根本就係錯嘅……」
「吓？」
「佢……根本就唔係人……而係怪物！」
我嘆咗口氣，望住傷口迅速復原之後講：「如果唔係要整呢個結界，我都唔洗中呢一劍……」
「你……」
「我之前唔出手，係同妳哋顧慮嘅一樣……驚影響到『結界』裡面嘅『妖物』。」我指向分身嗰邊，分身即刻化成白煙消失，「但整完呢個結界就唔怕啦。」
下一刻，一陣寒風吹過，火劍熄滅、草劍枯萎……結界之內彷彿好似墓地一樣死寂。
「放心，我對女人從來都非常溫柔。」
聰，我已經確保唔會有人阻礙到你，希望你唔會令我失望喇。
*
*
*
【韋家聰視角】
我沿住指南針指示嘅方向行咗差唔多三分鐘，途中依然一個身影都未見過。
老實講，雖然先後經歷過「無人小巴」同「尾東樓」事件，對「怪異」已經有一定認識。但而家話晒要主動接觸佢哋，內心多少係有啲恐懼。
不過，我並唔係孤單一個……因為身邊仲有「赤染」陪住。
講返頭先，如果唔係「赤染」再次提醒，我九成已經中咗暗器爆頭而死。
雖然只係手環，但我有時覺得佢好似真係有靈性咁。就好似之前喺「極樂園」面對冒牌貨嘅時候，佢大概已經感覺到所有嘢只係無二同陳園長嘅一場戲，所以先至冇觸發到。
諗到呢度，我終於見到前方出現一個身影──有「人」企咗喺一棵老樹下抬頭望住樹頂，因為睇落似係女性，所以我並冇走上前。雖然話「遊魂」一般係無害，但既然明知唔係目標，當然係少惹為妙。
「嗚……阿威……點解你仲未嚟搵我……嗚……」經過佢身邊嘅時候，可以聽到佢喺度低聲哭泣。
既然出現第一個，咁之後肯定會陸續出現……我繼續行，沿途開始見到更多遊魂──有小朋友、亦有老人家……但全部都唔似係岳少。
直到轉入石梯往下走嘅時候，終於見到一個表徵符合嘅男性身影……呢刻佢擋咗喺梯中間背對住我。我再望多次指南針，依然係指向呢個位置嘅時候停留最耐，即係話……機會好大。
「係唔係岳少？」
佢冇回應，因為太黑我只能嘗試行近望清楚。講真身高係附近，亦同樣係短髮，但衣著同我哋見面嗰晚明顯唔一樣……但可能佢係事後換咗衫？
諗下行下，我已經差唔多去到佢背後。
「岳少？」
下一刻，佢終於有所反應轉身望過嚟……我一見到佢個樣即刻倒抽一口氣。
眼前呢個「男性遊魂」，佢嘅左邊臉就好似俾猛獸咬開一樣冇咗一部份，可以見到頭骨口腔同牙齒都暴露晒出嚟，然後本來嘅左眼眼球部位仲有蛆蟲不斷轉嚟轉去……
「我……唔……岳……」喺咁嘅情況下，佢講嘢當然係非常困難，亦好似漏風一樣相當唔清楚。
「唔好意思。」但我大致已經清楚佢唔係岳少，正想離開搵第二個目標，但佢卻伸手抓住我膊頭。
同喺「無人小巴」嗰次唔同，遊魂並冇真正咁觸碰到我，我只係感覺到一陣強烈嘅寒意……
「你……走……」
「明白，我唔會阻到你……」我慢慢退後，來仲以為呢個係要脅，但我錯了。
「危……險……」
「吓？」
下一刻，男性遊魂嘅身軀開始扭曲起嚟。雖然冇發出任何聲音，但我從佢僅餘嘅臉睇得出佢非常痛苦，眼睛暴凸、嘴巴張大令到「咬傷」嘅位置撕裂得更嚴重，甚至連牙齒都開始爆開……
終於，等到佢全身被扭曲到上下裂開之後，隨即有股引力將佢成個人吸落去，而我要即刻捉實旁邊棵樹先勉強企得穩……等到平靜落嚟後，我重新望向石梯下方，眼前嘅黑彷彿所有光都冇辦法照亮，就好似黑洞一樣……
──呢個味道，好熟悉……
一把女聲突然喺我耳邊響起，而同一時間，我感覺到右手嘅「赤染」開始熾熱起嚟。
明知有危險，但我完全行唔郁，係因為恐懼，定因為受到其他嘢影響？
──但你唔係佢，不過肯定係同佢關係好密切嘅人……
佢……佢即係邊個？
──可唔可以落嚟？我想見下你……
我就好似冇辦法控制身體一樣，慢慢邁開腳步，正準備踏落一級嘅時候……
「唔好啊！」
一隻手突然從後拉住我，而且呢個人冇停落嚟，捉住我手臂一直拉到我上返梯級頂為止。
「嗄……嗄……」
一上到去我就好似獲得解放咁，即刻跪喺地上面，雖然重新郁得返，但感覺就好似跑完十公里中途完全冇停過咁，全身虛脫而且出晒汗……
「你差少少就入錯禁地。」
我抬起頭，眼前係一個年輕嘅少女，年紀應該二十出頭左右……
「禁地……？」
「白湖村。」少女回應：「你點解會一個人嚟呢個地方？」
「我係嚟搵一個人……」因為係佢救咗我，所以當刻我完全冇考慮過掩飾動機。
少女聽完眼神即刻一變，然後換個語氣問：「係唔係凌永岳？」
「妳點解……」
一種不祥嘅感覺浮起，如果對方都係「城寨幫」嘅人，咁情況肯定又會變得危險起嚟……
「我係岳少嘅朋友。」但少女卻咁回應：「一直等緊一個叫『無二』嘅人……」
「我要將岳少嘅『遺言』講俾佢聽。」
（待續）
今集遲咗好耐先出，除咗因為上禮拜病完，仲因為開始準備緊十二月書展嘅書。希望快啲搞掂可以恢復正常速度啦～睇完又鍾意嘅，記住俾個 like 同分享開去呀。
Patreon 正式有連載啦！長篇故事《扮工鬥室》集歡樂、恐怖、愛情於一身……會更加似我以前嘅風格，遲下仲會有投票互動添。希望大家多多訂閱支持！
https://www.patreon.com/echoofheart
第一集（試閱）：
https://www.facebook.com/Echo.of.Heart/posts/2085452518253220?__tn__=K-R
第二集（試閱）：
https://www.facebook.com/Echo.of.Heart/posts/2091293244335814?__tn__=K-R
－－－－－－－－－－－－－－－－
【地方的無默媽資助計劃】（試行中）
近年作者生存空間越收越窄，大眾結業更加似係雪上加霜。所以推出資助計劃，希望各位可以直接課金支持。計劃並唔係強制性，一蚊可以，想繼續免費睇亦無妨，有心就可。
Payme 連結：
https://payme.hsbc/echoofheart
轉數快 FPS ID：6065460
計畫緣由及詳細內容：
https://bit.ly/39b5Fuw
－－－－－－－－－－－－－－－－－
IG：echoofheart
