#生物觀察日記
20210623 蘋果執
蘋果日報摺埋，陸陸續續見到有好多人post返自己曾經上過蘋果日報嘅經過，我自己就無謂啦，對於合群嘅活動從來都冇咩興趣，另外因為上得蘋果通常都冇乜好嘢，唔認為要post返出嚟多謝佢啲咩，因為咁樣好戇居，如果我要多謝有哩啲報道，我會多謝我自己囉，因為我所有嘅失敗都係我自己一手造成！Hand made嘅。
哩一個集團做嘢嘅方法，我未能夠完全認同，但係仍然，呢個唔應該係佢離開嘅方式，佢要瞓低，都應該要係由佢自己一手造成，唔係俾哩班人陰陰濕濕過佢一橦。佢唔似係我的英雄學院入面嘅all might退休，未能夠成為嗰種最純粹、完全嘅和平象徵，佢比較似𡚒進人，佢進取，但我唔欣賞，為咗收視，佢都會揭發人私隱，公開一啲逃生路線，要谷訂閱嘅時候，你就會睇到一啲藝人偷食嘅相，標題黨亦都係經常發生嘅事，而作為其中一個訂閱者，我亦都唔覺得訂閱嘅登入方式特別方便，當大家懷緬佢嘅時候，呢啲都係其中一啲我記得佢嘅事蹟，但我同時都記得佢有年輕偏門創業嘅報道，有好奇怪試哩樣試嗰樣總之你去到嗰個國家你一定唔想試嘅旅遊節目，講車嘅片講到好似講馬咁，你唔熟車都會學到啲嘢。
喺大家好傷心好灰嘅時候我想提醒大家，蘋果日報唔係一個人，佢係一間大公司，樹大有枯枝、人多有低B，有人努力做報道嘅同時，亦有人千方百計去跟八卦，哩個係好傳統嘅報章做法，總之一份報紙養百樣人，大家關心嘅嘢唔同，佢一律提供晒，因為媒體要提供資訊，但媒體對社會文化有冇責任？要唔要選擇提供啲乜嘢資訊呢？可唔可以養大班讀讀者嘅同時，都養大到班有質素嘅讀者呢？可唔可以養埋大家嘅品味呢？但今日亦都無謂討論，反正佢好嘅部份、唔好嘅部份，今日都要一齊完結。
佢嘅離開大家覺得傷心，唔係因為佢係一份報紙，係因為佢代表一種精神、一份骨氣，而哩兩種元素，你放喺心，係不滅嘅。作為讀者除咗被動地閱讀新聞之外，讀到嘅養分，要運用返喺自己生活上，先至叫做有吸收過。蘋果跌落地會變種子，雖然係咁講，但蘋果切開咗一樣係蘋果，冇咗傳統報章嘅框架底下，大家可能要從頭做起，唔同嘅版數分開晒，各自養各自嘅讀者，又即管睇吓會係點樣？每一樣嘢完結都係每一樣嘢嘅開始，但係唔一定要係對家時代嘅開始。
除咗種下種子之外，祝咁多位蘋果員工、讀者，作為切咗出嚟嘅一片蘋果，無論有幾咁單薄，都努力地進行光合作用，我哋唔可以永遠都有一個打工嘅心態，唔可能永遠都有大樹為我哋遮蔭，冇嘅嘢就靠自己創造，或者某日我哋都可以成為其他人嘅大樹，蘋果執嘅時候，至少榨返杯蘋果汁，吸收完，又起行。
Star Wars Art by Ralph Mcquarrie: A New Hope
