一時間寫唔切，睇住其中一篇 #我的你的綠帽 先？
【打炮後記得執返啲彈殼】
24小時茶記嘅招牌燈紅紅綠綠，喺過路人身上投下光影，同我盞頂燈互相輝映。唔同嘅係，人哋有燈就有人，我有燈就無人。停低抵禦緊火腿通嘅誘惑時，一個耷低頭嘅長髮女人，幫我渡過難關，就算只係去隔離區都好。
佢嘅長髮喺雙眼前垂簾聽政，同大多數乘客一樣，上車後保持沈默，只係偶然一兩下訊息提示聲，拉一拉牛仔裙嘅下擺，改變下雙腳嘅擺放位置咁。
女人突如其來嘅尖叫聲，往往最令人驚呆，就算係P牌Benz女司機，動態都有跡可尋，女人幾時尖叫，從來無從猜度。看後鏡中，長髮女人終於撥開額前嘅簾幕，摸住個頭重複：「SHIT，死火，SHIT，死喇今次。」解決女人嘅問題唔係司機嘅職責，加上多年經驗令我習慣將女人嘅聲音由右耳送出，（我指我上過好多女老師，嘅堂而無聽書啫），即使女乘客尖叫不斷，我嘅行車線亦無絲毫嘅偏離。
我繼續留意佢嘅動態。喺一連串嘅SHIT SHIT聲中，佢拉住副駕駛座半企起身，艱難咁擰轉頭，仲微微扭轉自己條腰輔助，去望自己半秒前壓住嘅位置。一見到呢個動作，我估計佢唔見咗嘢，就收慢車速，預備隨時更改目的地。「司機唔該你返返去上車嗰度丫，我好似漏咗嘢。」「好呀，漏咗咩呀，可能上車嗰陣跌咗喺門邊或者地毯底喎。」我提出呢兩個可能都係常見嘅細小失物出現位置，明明地毯都唔輕，啲戒指耳環就係有本事鑽入去。「唔係呀，無咁細，SHIT。」女乘客重重咁坐返低後，長髮又自然而然咁將雙眼遮返住。
「我頂帽係咪漏咗喺你度？」電話一接通就講清楚問咩，咁直接了當嘅女人真罕見。「你搵真啲，應該唔喺房㗎，我諗諗先⋯⋯我哋喺梳化除咗衫先上床嘅，頂帽應該都係嗰陣除低，你睇下喺唔喺梳化附近？」露骨嘅對白令我不禁望一望女乘客嘅白色短紗袖TEE，想像一個黑影喺梳化除低女乘客頭上嘅帽，繼而將件TEE過頭扯出，掉喺梳化旁邊嘅畫面。「係咪有呀，你攞落黎俾我啦，你樓下個保安望到我好唔舒服呀。」女乘客雖然心虛，同時心細，隔住個MON都可以搵返失去嘅嘢。「我過緊黎喇，唔等得呀，情侶帽黎㗎，星期六我同佢去睇戲要用頂帽呀，得啦，你預十分鐘啦。」漏你老帽丫，將情侶帽漏咗喺姦夫屋企，唔怪得急不及待要攞返啦。
七分鐘後我停返喺24茶記嘅招牌等下，期待住即將出現嘅情夫同老帽，等我可以具體化幻想中嘅兩個黑影。
「閣閣」。情夫成功咁避過我嘅視線，突然出現喺後座車門外，敲窗示意女乘客打開車門交收。「都叫你CHECK清楚有無漏嘢㗎啦。」沈厚嘅聲音令人感覺到佢嘅鎮定鬆容，相反女乘客就氣急敗壞：「無喇，你上返去啦，唔好俾人見到呀。」「咁對耳環係俾我留念？分手嗰陣你已經留咗好多首飾喺我度喇。」能成為炮友大概都有舊愛，原來又係前度變炮友。「攞黎啦，記住呀，我哋今晚係成班舊同事飯聚呀。」炮又打完，女乘客黎收返啲彈殼後，我哋就再度上路。
女乘客繼續保持沈默，長頭髮亦遮返住雙眼，唔同嘅係頭頂戴返深色嘅CAP帽，上面有個金色英文字，直到我盞頂燈再度亮起，我哋都無再交流。
資料就係咁多，各位男女讀者，自己留意下身邊有咩人戴類似嘅款啦；如果當事人覺得我無講地點都算侵犯私隱，歡迎衝出黎對號入座。PM白告，或者去IG：lazytaxihk留言都得。
#我的你的紅的
#我的你的綠帽
#仲有好多頂
