多得五金王Andy熱血幫助, 構想兩年既"盒仔檔"項目開發終於開始, 今早5:30已到了1998年我eBay創業年代的太源街街市影相度尺, 有幾樣野想問大家意見同埋有幾件事同大家分享。
在腦海中TINY香港盒檔畫面已經一早浮現, 遠在2015年在K11 Designmart時已唸, 合金盒仔, 可拉出來的店頂波浪簷篷, 打開金屬門內有櫃啦及店的商品可供開檔, 比例跟小販車啦, 真人看檔Figure一定唔少得, 顔色跟真檔有綠, 灰, 紅, 黃, 紫等...好, 做什麼檔好? 大家俾俾意見! 價錢想控制在$99-120.
其實此類合金檔投資巨大, 大家唸, 做生果檔少不免7,8款生果, 好多箱, 架, 盒, 哩, 一檔模錢一定貴過車仔50%, 頭一款15-17萬走唔甩, 一出4-6檔, 45-55萬, 咁? 要幾百間店幫手賣到6萬套就回到本了, 唔容易? 易就晨早有人做左啦。。。
太源街, 20年來留低左唔少脚毛, 我回憶起洪興嫻姐只有一間店的年代, 仲未有日昇, 但街頭有玩具駅Rocky, 縱橫行Starwars...其實我有一套紀錄片好想好想拍, 就係邀請䇄立香港多年的玩具模型店店主分享下, Toyzone, 精品, 關東店, 康田, 發利隆, 偉高, 創昇, 三和, 鴻興, 日昇, 名車博覽, 永捷, 80M, 黄埔奇趣, MSD, 玩具叔叔。。。為什麼會選擇賣玩具? 為何在天價租金下仍堅持? 希望有天為香港玩具店可以拍一個特輯把他們的心聲願望留住。
