［每日一刁］東芝機械升20%，因為有疑似敵意收購，十幾年最多
1. 首先講，東芝人人都識，但而家已經拆到散晒，我都唔係好知邊舊打邊舊，但Consumer electronics應已經全部摺埋，白色家電賣咗碌卜賣咗電視機賣咗NAND Flash都賣埋。當然仲有好多其他東西
2. 導火線就應該唔少人知，做假帳，晶片同半導體部門嘅假數，去遮住西屋核電蝕錢。又，呢間西屋，基本上就係你睇《電流戰爭》Current War 嗰間Westinghouse。
3. 當年東芝就用天價買呢間嘢，比其他對手高出一大截（美國人在笑）。睇中乜？睇中專利。可能得佢先知，可能。無論如何，貴還貴，當時東芝就拎住頂尖嘅核電技術，同很多的專利。
4. 然後，就係福島大地震。你懂的。當初已經買得貴，加埋福島，當然差不多輸清光， AIG，All investment gone（美國人在笑）。
5. 之後啲東芝啲假數做極都有，好似呢兩日都仲有。
6. 然後講返今次呢單，都要分返開三間公司。東芝（Toshiba Corp），東芝機械（Toshiba Machine），同埋NuFlare．
7. 同早前寫過韓國「現代集團」有啲相似，而家韓國好多你見到嘅現代XX，已經叫做係獨立咗。而同樣地，東芝機械，同東芝，應該係冇關係嘅，只係保留個名，至少枱面上冇，法律上冇，枱底就另一回事。呢啲亦係日本公司過去數十年一路畀人媽嘅嘢。同終身僱用制，交叉制股等等日本獨有嘅國情，未爆煲年代當然被視為長處，亞洲價值觀，國情不同。到你衰咗就乜都係錯。
8. NuFlare就係半導體公司（光刻設備？），上市的。東芝本身就渣住52%NuFlare，即係附屬公司，大股東。另外東芝機械就渣住16% NuFlare，二股東．再講一次，理論上東芝同東芝機械係獨立的
9. 而之前呢，東芝機械就話會將佢渣住嘅NuFlare都賣埋畀東芝。點解會咁？原來因為之前Hoya（配眼鏡會識呢間公司）都想買NuFlare，明明就出價高啲，但東芝機械就唔係畀Hoya，係用低啲嘅價錢賣畀東芝，以保住東芝嘅控股權。
10. 睇到啦，即係擺明搵小股東笨，有人出高價都唔賣，賣畀低啲價嘅。而suppose東芝機械同東芝係獨立架喎，唔使理佢感受的。東芝堅持話NuFlare離開東芝就生存唔到，但明明生產晶片已經唔係核心業務。
11. 然後個故事就係有維權投資者（activist investor，其實呢個譯名好怪，講到劉曉波咁）踩入嚟，村上世彰，日本維權投資者嘅先驅（監都坐過，不過緩刑），不過唔知會唔會搞垮呢單刁。
12. 唔好睇少呢樣嘢，日本爛船（其實唔爛，只係低增長低通脹，但公司 OK的）仲有大把貨賣。但好多應該幾出色嘅公司，估值都相當低殘，正係因為日本股市啲企業管治實在比較唔得。唔止講造假數之類，而係講大股東同小股東利益唔多一致，好難換到管理層，交叉持股又令到好難狙擊拆骨之類。
13. 加上文化都唔同，呢啲股壇狙擊手，外國唔少，香港都有（大劉正係最出名嘅一個）。其實應該係好事，佢地瞄住啲管理不善嘅企業（好多係家族企業），但資產往往雄厚，可惜管理層太差，或者拎住啲錢又唔派，股價長期折讓，企圖去買起間公司—點令其他投資者信佢賣畀佢？就係佢答應會派晒啲現水，或者將間公司拆骨出售，反映返真實價值。近年最出名嘅當然係中巴。
14. 不過實際上，由於係家族生意，好多時啲家族都會出手（高價）向狙擊手買返。狙擊手亦都樂於沽畀佢，畢竟搵錢先係專長，唔係落手落腳run巴士。
15. 但呢類東西，在日本仲係好少見嘅，甚至畀人覺得係勒索，係蝗蟲（無獨有偶，德國就係叫呢啲友做蝗蟲，文化同日本幾似），外國人就更少。今次呢位都係日本人
16. 而東芝亦都樂於抹黑村上世彰，出份文件列舉此人往績，拿，佢冇心搞企業架，只係想我地高價接返佢手貨佢就有錢賺之嘛。咁喎
17. 幾肯定嘅係，股價唔呃人。東芝股價固然頂位（07，唔係八九十年代）跌七八成，東芝機械其實都得返一半，倒係NuFlare幾年升十倍，市場都仲係雪亮嘅。
