《來回地獄又折返人間的才藝表演》
關於決賽,印象最深刻最驚險一定係才藝表演。由一開始話無呢個環節,到後期話可能無,有的話再通知,最後某一晚食飯時忽然間叫大家即場決定好要表演啲咩,當時距離決賽不到三星期,然後下星期就要全世界準備好晒所有服裝道具音樂表演一次。作為一個得把口冇乜才藝可言嘅人,又已經無乜時間練習,嗰時我諗住求其跳兩下中國舞算啦,就算跳錯咗都無人知吖嘛。
後來發現好多人揀跳舞(睇黎大家同我諗法都差唔多),工作人員就提議唔好浪費我口才,叫我唔好跳舞,做棟篤笑啦。我虎軀一震!下!澳姐舞台做篤棟笑好似唔係幾岩feel喎!不過佢地好堅持,而我都決定繼續秉承「一切聽從大會安排」呢個理念,放棄跳舞。到計劃講稿嘅時候,發現一分半鐘做棟篤笑真係唔掂,時間太短乜都舖排唔到,但由於第二日就要試表演一次,我都漏夜逼左啲野(唔係棟篤笑)出黎交貨。第二日表演完之後,效果意料之內地未如理想,大家都沉默左。
呢個時候導演組就話,如果演講呢個方向真係唔得,你仲有啲咩可以做才藝表演。我諗諗下,掹車邊都叫識樣樂器嘅⋯⋯牧童笛囉,想當年本《Harry哥哥教你吹直笛》我都玩到出神入化㗎⋯⋯講笑咋,呢啲嘢點擺得上舞台。這時Carmen媽出聲了,話,唱歌啦,Dindin唱歌OK架。嗰刻我內心好崩潰!!!打從一開始我最唔想嘅就係唱歌,大佬呀成件事好Yap架,才藝表演玩唱歌咪即係等於話比全世界知我係冇才藝架唯有唱兩句啦咁?同埋重點係,我唔係唱開歌嘅人黎架嘛!上台緊張走音咪好大鑊!!!所以那時候我是拒絕的。但其實決定權已經唔係我手上,係群眾壓力之下我都係唱左幾句比各位大佬聽下我把聲,然後佢地就決定左⋯⋯派我去唱歌⋯⋯
好啦咁即刻就要諗唱咩歌啦,因爲ViuTV會播嘅關係仲要check埋啲歌嘅copyright問題,我揀左四首歌去check但都因為版權問題全數ban晒,此刻我的內心又崩潰了。再搞左好幾日,都係傾唔掂,最後折衷方案就係揀返澳門本地歌曲,自己人好商量呀嘛。其實我自己都覺得唱返本地歌曲比較有澳門小姐feel,但舞台效果出黎就爭啲啲,不過都無辦法,唯有係咁。呢個時候已經係比賽前兩日。
當我已經打定輸數無紅玫塊唱嘅時候,比賽前一晚Final rehearsal嗰陣導演又叫我唱紅玫塊,我話下唔係ban左咩?導演話得啦唔好理啦照試住先。於是我就戰戰兢兢咁試唱左一次紅玫塊。然後,就沒有然後了⋯⋯因爲第二日就係show day⋯⋯而無預過唱紅玫塊嘅我神早借左一條完全唔關紅玫塊事嘅普通禮服⋯⋯所以rehearsal完即刻周圍R人問有冇紅色裙可以聽日借到比我⋯⋯呀又真係好彩比我借到。
重頭戲黎啦,比賽當日上午,同Carmen媽討論起才藝服裝嘅野,我就話我借左紅裙啦,嗰件禮服唔洗修改了,佢竟然話,下!紅玫瑰唔係攞唔到right咩!當時我再崩潰了,死啦夜晚就on show啦我仲係乜都未confirm,今舖真係刺激好玩啦⋯⋯Carmen媽即刻幫我衝去搵導演確定首歌,而我就繼續係後台內心受煎熬,等左一段時間終於確定到,係紅玫瑰,謝天謝地。
經過咁多波折,我人生第一場威尼斯人金光綜藝館演唱會(誤)終於成功開到,好賺呀覺得自己可以企係呢個台到唱歌!講緊係千萬製作呀!!!(喂)不過講真第一次係咁多人面前唱歌,其實上台之前一直都好驚好緊張好擔心,反而企到上去時莫名淡定。點都好,最後能夠順利完成演出,仲得到評審司儀觀眾嘅認可讚賞,真係好開心呀呀呀呀呀呀呀呀Q_Q。
完。
/
@macaupageantalliance @suncitygroup
#🇲🇴 #澳門小姐 #澳門小姐競選2019
#Macau #MissMacau #MissMacau2019
Search