當消費者委員會喺度比較唔同牌子嘅氣炸鍋嘅時候，我已經陷入咗氣炸鍋嘅氣流之中，不能自拔！其中近排做得最多嘅係糯米釀雞翼。
我用嘅係雞中翼，貪佢拆完骨之後，就係啖啖肉。但亦因為佢開嘅口比較大，所以封起口上嚟比較困難，而且啲糯米會成日唧晒出嚟，但係咁樣食落去啲糯米脆脆地又反而有口感。
我嘅做法非常簡單：
1. ¾杯糯米洗乾淨，浸水不少於6小時
2. 乾瑤柱三粒、蝦米一執洗乾淨浸水，水留用。
3.開始同雞翼拆骨，呢個步驟比較難以形容，總之切斷哂佢啲筋，再順住啲骨推啲肉落去然後一扭、一拉條骨就應該會出嚟😅。明就明，唔明就算😅😅！跟住用豉油同埋糖醃雞翼。
4. 當你發覺浸糯米嘅水差唔多俾糯米吸收晒嘅時候，就可以將啲浸乾瑤柱同埋蝦米嘅水倒落啲糯米度，順便將乾瑤柱撕成一條條、蝦米切粒鋪喺糯米上面。
5. 浸夠6小時之後，就可以隔水蒸大概20分鐘。將糯米攞出嚟挑鬆佢，調味。可以加糖加豉油，最簡單就係加蠔油，撈勻。
6. 將撈勻嘅糯米釀入已經無骨嘅雞翼入面。用牙籤封口。
7. 放入已預熱至180度嘅氣炸鍋，每面氣炸10分鐘，如果望落去顏色唔係太靚，再加兩至3分鐘。
8. 禮成，有得食。
#何嘉麗callmegaga #何嘉麗 #為食路上
#氣炸鍋 #糯米釀雞翼 #氣炸鍋食譜
#簡單而美味 #拆雞骨嘅嘢拆下拆下就識
#大不了剪爛晒隻雞翼跟住四邊用牙籤拮返實佢
#浸水嘅嘢都係憑感覺 #今次多得滯下次咪少啲囉 #今次少得滯下次咪多啲囉
#好好食 #好易整 #送啤酒一流 #送可樂都一流
