【屍人屋苑】病毒變種、喪屍橫行，一個屋苑困獸鬥的故事……
當世界末日來臨嘅時候，你最想同邊個一齊去面對？
如果可以嘅話，我當然想好似電影入面嘅男主角咁，喺某次危機入面救到落難嘅女主角。然後同佢兩個人喺災變下並肩求生，最後患難見真情……
但實現總係殘忍。自從「W流感」突變，喪屍成為地球主宰之後，我遇到嘅女人唔係大媽就係得幾歲嘅小妹妹。稍為靚女少少嘅，見到嗰下唔係喪屍就係準備變成喪屍，抑或就係死屍……
最有印象係嗰位叫做Sally嘅女模特兒，瞞住自己大腿被咬傷。等我遇到佢之後仲開心咗成晚。無預到佢瞓瞓下教會突然變成喪屍，足足追咗我幾條街。老老實實，我成世人都係第一次俾靚女咁樣「倒追」法……真係越諗就越無奈。
結果，經歷咗好幾次嘅同伴更替。而家同我組隊嘅，只係剩低一個叫做阿俊嘅男人──佢係少數對得住「阿俊」呢個名嘅人。除咗有型，佢仲係上市公司老闆嘅仔，毫無疑問係「前」人生贏家……
本身聽到佢呢個背景，我仲忍唔住心中暗爽。因為喺末日之下，就算幾有錢都係浮雲。我甚至諗過拋低佢自己求生，因為當初招攬佢加入嘅同伴而家都成為咗喪屍嘅午餐，所以我冇必要格硬再帶住佢……
但就喺兩日前，我下定決心想咁做嘅一晚，佢居然成功聯絡到自己老豆……然後，證明我之前嘅想法係大錯特錯──呢個世界依然係由有錢人話事。
－－－－－－－－－－－－－－－－－－
上集（母女篇）：
https://bit.ly/3aD2eyn
－－－－－－－－－－－－－－－－－－
原來，阿俊老豆早喺災難初期就同一班有錢人避到去某個安全島上面。當知道阿俊仲在生之後，佢老豆決定為佢安排一艘撤離船。但我哋有必要喺限時之內趕到紅磡碼頭，因為要載嘅人並唔止我哋……
見到咁嘅情況，我當然打消咗拋棄阿俊嘅念頭。只要跟住阿俊，作為當初有份救佢嘅人，我肯定可以上撤離船離開呢個人間地獄。結果，我哋簡單收拾好行裝之後，就坐車前往碼頭。
開車一刻，我真係有種「人生滿希望」嘅想法……但原來，等緊我嘅只係另一場永遠唔會完嘅夢魘。
呯！
一下強烈嘅碰撞聲，汽車重重咁撞埋其中一隻喪屍身上，將佢撞飛上車頂，再翻滾落地。我回頭一望，透過車尾燈，可以見到幾十隻喪屍依然窮追不捨，唔想放過我同阿俊呢兩個美味嘅晚餐。
「後面全部都係喪屍……」我同揸車嘅阿俊講。
雖然事前已經揀一條較偏僻嘅馬路行，但結果都係有一堆喪屍，迫住要喺條窄路左穿右插……
「唔洗你講我都知！」因為車頭嘅水潑壞咗，所以阿俊要打側頭先唔會俾車窗嘅血阻到視野，「可惡！點解佢哋唔落大路反而喺呢度？」
「可能有其他人都好似我哋咁諗，專登揀條小路行……」雖然我回應得好冷靜，但其實內心係驚到爆，而且已經成手汗，「結果反而引晒班喪屍過嚟……」
碰！又撞到另一隻喪屍，今次直接被捲落車底，成架車因為咁而上下顛簸。雖然好彩無炒起，但著地嗰下都有少少失控左搖右擺起嚟……
「你可唔可以揸好少少！？」我忍唔住大嗌。
「咁叻你嚟揸呀！？」阿俊反駁，下一秒即刻張開嘴巴，「嘩！？」
前方至少有二三十隻喪屍，佢哋一聽到聲即刻不約而同用灰白嘅臉頰望過嚟。呢下撞埋去架車就算唔停都肯定報銷，所以阿俊即刻扭軚急轉彎想轉入小路避開……但一轉入去就見到馬路上面有架反咗嘅的士。
「喂避開……啊啊啊啊啊啊！！！！！」
雖然阿俊已經即踩急剎掣，但架車最後都係直撞埋去。一股衝力瞬間將我拋向前再抽後，好彩開車前有綁好安全帶，唔係肯定會成個人撞埋去車窗。雖然冇大礙，但我多少係感到頭暈，而且肋骨位置都被安全帶勒到有啲痛。
「啊……」我喺朦朧間感到有人解開我嘅安全感，再用力搖我。
「喂！老超，醒呀！班喪屍過緊嚟！我呢邊道門推唔開！」
「喪屍……」一聽到呢個字，我即刻清醒過嚟後忍住痛楚推開旁邊嘅車門。
「……嗚……」
正如阿俊所講，頭先避開嘅喪屍群果然過緊嚟，好彩都係屬於「屍變體」（死後先變成喪屍，所以行動緩慢），唔係早就追到上嚟將我哋重重包圍。
「仲望？走呀！」阿俊落車之後即刻想拉我走。
「但可以走去邊？」我先望一望四周，見到「黃埔號」就喺眼前，「我認得呢度！呢度離碼頭唔係好遠，我哋應該可以跑去……」
「你見唔到嗰邊全部都係喪屍咩？我哋肯定穿唔過……」
「咁就搵架車撞過去……」
「嚟唔切啦！我哋先搵個地方避一避……」
哐啷──對面街突然傳嚟清脆嘅爆玻璃聲，原來有喪屍衝破商場嘅玻璃櫥窗。吼叫一聲後，隻喪屍即刻將目光轉到我同阿俊身上……呢隻九成係「感染體」（感染而未死嘅情況下變成喪屍，行動迅速而且仲保留些少生前行為）。
反應過嚟後，阿俊即刻大喊：「唔好諗喇，跟我嚟！」
雖然見佢跑去反方向多少有啲唔情願，但我最後都係跟上去。雖然外表睇落唔似，但跑對我嚟講唔係一件難事，問題係目的地喺邊度？
轉眼間就跑咗兩條街，可以聽到身後嘅嚎叫聲越嚟越響亮。將本來死寂嘅大街變成人間煉獄。如果周圍大廈仲有人住緊，呢刻聽到肯定會覺得好心寒吧……
「嗄……嗄……就快……頂住呀！」
我哋轉入圍欄走入屋苑範圍，跑埋最後一段路終於去到某座私人屋苑嘅大閘前。阿俊毫不猶豫即刻撳大門密碼。但唔知係太過緊張定出現其他問題，所以第一次居然係密碼錯誤……
「快呀！」我焦急咁講，可以見到有更多喪屍出現喺屋苑四圍，有幾隻仲向我哋直奔過嚟。
噠噠──又一次密碼錯誤，有一瞬間我真係有諗過自己走。但生活喺喪屍國度，一秒猶豫就足以錯過最後機會。
「嘶啊！」
下一秒，距離我哋最近嘅中年男喪屍終於衝到嚟。因為只係一隻，所以我都仲勉強應付到，一腳將佢踢低落地。
「得喇！」阿俊總算生性解開密碼鎖，把握時間即刻拉閘門，「老超！」
見佢想俾我入去先，我當然老實唔客氣。為咗阻止其他喪屍闖入，阿俊入嚟嘅時候都不忘閂門，但喺最後一瞬間隻中年男喪屍居然爬到門前伸入嚟卡住道門！
「可惡！」雖然係咁，但阿俊依然唔肯放棄，雙手用力握緊門柄，再係咁踢喪屍隻手，試圖將佢踢返出去。
「哇嗚……嘶啊啊啊啊！！！」
說時遲那時快，有更多嘅「感染體」喪屍趕到嚟。佢哋全部一擁而上撞埋閘門，對住只有半米距離嘅阿俊張開血盤大口，畫面相當恐怖。呢股衝力令到中年男喪屍隻手開始發出「格、格、格」嘅骨裂聲。如果頂多一陣，話唔埋就可以壓斷佢隻手，再靠佢哋嘅蠻力閂埋門……
但事情當然唔會咁順利，下一秒又有另一隻喪屍伸手入門，今次嘅高度可以話係準確無誤。就喺冰冷而腐爛嘅喪屍手掂到阿俊手背嘅一刻，驚會俾佢抓傷嘅阿俊終於忍唔住鬆開手。
見狀，心知不妙嘅我即刻退後兩步。果不其然，閘門即刻俾竭盡全力想入嚟嘅中年男喪屍撐開。情況瞬間變得一發不可收拾，阿俊見勢色唔對都轉身，指住後樓梯方向大嗌：
「跑去後樓梯，我哋上廿五樓！」
雖然有好多疑問，但我都係照做。臨入後樓梯之際忍唔住望返閘門一眼。有兩隻喪屍已經率先闖入大堂成隻瞓落地，而閘門亦俾後面嘅喪屍越撐越開……
呢座大廈，馬上就會俾喪屍所佔據了。
入到後樓梯，我哋冇講任何說話就一連跑咗好幾層，阿俊更加係一馬當先。我可以聽到最底層有推門聲，繼而傳嚟喪屍嚎叫。佢哋追入嚟了，要擺脫「感染體」果然唔容易……
碰──上到七樓嘅時候，我冇注意到阿俊突然停低腳步，結果一嘢直撞埋佢背脊。
「你搞咩！？」
「有雜物！」阿俊望住上方由各種傢俱堆積而成嘅雜物，明顯係有心阻礙唔想俾人或者喪屍再上去，「我哋由呢層出去，行另一條後樓梯上！」
因為一路跑幾乎無停過，所以我開始有種脫氧嘅感覺。但下方嘅叫聲同腳步聲並冇停落嚟，而且越靠越近，猶如死亡嘅呼喚一樣……
我先用力吸一口氣，再跟住阿俊開門走入走廊。而家只可以祈禱另一邊冇俾雜物擋住，仲有班喪屍唔識跟住走入嚟……
「咦？」入到走廊再轉一個彎，阿俊突然停低腳步。
今次我冇撞埋去，亦都知道係咩原因令佢停落嚟──七樓其中一室嘅大門居然神奇咁開住咗，而且門外位置仲有一啲散收收嘅包裝食物。猶豫咗陣，阿俊起初應該係諗住放棄呢度繼續上廿五樓……但另一邊後樓梯突然傳嚟閂門聲。
「上唔到㗎喇！入去啦！」一聽到聲，我即刻第一時間走入屋。
阿俊聽完之後，即刻彎低身隨便執起兩包食物，再跟住走入屋。雖然今次順利閂到門，但危機並未解除，大門開始不斷傳出「碰碰碰」嘅撞門聲。我第一時間將旁邊嘅矮櫃推過嚟擋住，但唔知可以擋到幾耐……
「入房！」阿俊拉住我，「入到去再好似咁搵嘢頂住道門，撐得幾耐得幾耐……」
然後，就要聽天由命。
我同阿俊揀咗最遠嘅主人房。閂埋門之後即刻合力將大床推埋去門前。雖然已經兩重保護，但阿俊依然覺得唔夠，走埋去窗邊推開窗花……
「喂你想點！？」我壓低聲問。
「如果班喪屍真係入埋嚟，就只係得返呢個機會。」佢表情雖然冷靜，但都改變唔到呢個做法係荒謬嘅事實。
呢度係七樓，就算正正經經跳落去都係死硬，何況屋苑下面已經滿佈喪屍……
啪！就好似嫌我哋未夠絕望一樣，我聽到最外面嘅大門被撞破嘅聲音。
我即刻同阿俊做個「殊」嘅手勢。只要夠靜嘅話，或者仲有一線生機……
呢一瞬間，時間就好似俾人較慢咗一樣。我可以清楚聽到自己嘅心跳聲、聽到外面喪屍嘅嗚叫聲、但佢哋好似冇打算撞入嚟……
……要撐住……千祈唔好發現呢度……
……我仲未搵到自己嘅女主角……我唔可以死住……
……嗚……嗷……嗚……嗚嗚……嗚……
……嗚……嗚……嗚嗚……
……嗷……啊……
……嗚……
……
……
唔知過咗幾耐，外面終於靜落嚟。但我同阿俊都唔敢鬆一口氣，佢先拎出自己部手機，打咗一句字再俾我睇：
【確認外面安全之後，我會再聯絡老豆。】
我點點頭，然後指一指主人房嘅廁所，再指向自己下面。其實頭先坐車嘅時候我已經開始急尿，呢刻跑完一輪再放鬆落嚟，呢種感覺當然更加強烈。
【小心，同埋唔好太大聲。】
我用口型講咗句「唔好當我傻」之後，就放輕腳步行去廁所門前。我先拎出一枝迷你手電筒，開燈、再用最細嘅力度推開門……
見冇任何異樣，我慢慢行入去，再將電筒移向浴缸位置，隨即俾眼前景象嚇到倒抽一口氣……
呢刻，有個上半身赤裸，面青口唇白嘅女人躺喺浴缸裡面。佢合埋雙眼，喉嚨有一刀非常明顯嘅傷口，鮮血一直流到下半身……睇嚟係俾人割喉致命。
我再行近少少睇，眼前呢個女人年紀睇落比我大，但生前都算係一個靚女。而正如我一開始所講，我遇到嘅靚女，唔係喪屍、就係準備變成喪屍、一係就好似咁……已經係死屍。
然而，因為身體未腐爛，加上血仲係濕潤未乾。所以呢個女人應該唔係死咗好耐，甚至有可能只係啱啱死……我突然有個大膽假設，唔通，頭先開另一邊後樓梯門嘅並唔係喪屍，而係殺人兇手？
唉，諗到呢度我不禁嘆一口氣。
果然，生活喺喪屍國度。最應該提防嘅唔係喪屍，而係其他人類。
正正係抱住呢個信念，我先可以一直生存到而家。
困獸鬥篇（待續）
上集反應有少少估唔到😳 困獸鬥篇係由我嘅夢發展而成，完埋再睇下有無機會寫屋苑其他人物嘅故事。暫定仲有兩篇，睇完記住畀嬲同分享出去呀！
－－－－－－－－－－－－－－－－
【地方的無默媽資助計劃】（試行中）
近年作者生存空間越收越窄，大眾結業更加似係雪上加霜。所以推出資助計劃，希望各位可以直接課金支持。計劃並唔係強制性，一蚊可以，想繼續免費睇亦無妨，有心就可。
Payme 連結：
https://payme.hsbc/echoofheart
轉數快 FPS ID：6065460
計畫緣由及詳細內容：
https://bit.ly/39b5Fuw
－－－－－－－－－－－－－－－－－
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
－－－－－－－－－－－－－－－－－
IG：echoofheart
