給寧仔的情書
不經不覺，原來已經過咗五日啦。
日日對住我，有咩感覺呀？
咁近距離聞到我頭髮嘅味道，
感受到我嘅體溫，
係咪忍得好辛苦啊？
關於夢想，
其實你幫我完成左一件
我由細到大都好想做嘅事，
電台開咪！
細細個第一次聽電台，
起身返學之前，放學返到屋企，
同埋臨瞓之前，一定係開着903，
返到學校就同同學討論艾粒電視台有咩聽。
嗰陣時每次一問到我有乜嘢夢想，
我都係毫不猶豫咁同佢講我想做DJ.
會考之後入咗天比高，
真係認識左點樣做一個DJ之後，
先發現呢一樣野原來一啲都唔簡單。
做DJ唔係報下天氣播下歌就得，
特別係當你擁有自己嘅節目，
每日都要諗個節目講啲乜嘢做啲乜嘢，
真係唔係講個笑話卡卡聲就可以捱到一集嘅節目時間。
我有好一大段時間忘記咗呢一個夢想。
之後我走咗去做戲，做自己嘅音樂，
幫人哋做配樂，做電視節目主持⋯⋯
忽然之間過咗幾年，
忽然之間睇到呢個星期。
唔知呢個禮拜我做得好唔好呢？
但係起碼我真係好享受，
而且好感覺到我呢幾年係冇白過。
呢幾年我做嘅每一件事，
對我呢個星期做電台節目主持都好有幫助。
如果我冇經歷過呢啲嘢，
可能呢個星期我係會拿手唔成勢。
我個人好唔專心，
好容易做緊一樣野嘅時候走咗去做另一樣野。
兜兜轉轉，最尾又返返去起點，
但唔同嘅係我經歷咗啲嘢，
令到我可以做得更好。
就好似最近放榜嘅你哋，
分數嘅嘢，決定唔到你嘅人生。
你要係叻嘅話，
就算你直頭連試都冇考，
你都係一個好成功嘅人。
只要你夠熱愛，
就算你走咗去做音樂，
走咗去做舞台劇，
最後唔知點解，
你都會有機會喺電台做一個星期嘅節目。
寧仔，
本身一封情書係送俾你嘅，
結果我透過你，
將一封情書送咗比一樣咁愛你嘅聽眾們。
我唔知我哋兩個夠唔夠叻，
足唔足夠做大家嘅榜樣。
但起碼我哋兩個可以話俾大家聽，
我哋兩個都唔係10優狀元，
但係今日咪又係過得好地地。
最後多謝你哋，
希望真係再有機會可以做節目比大家聽。
你地⋯⋯在尋找什麼啊？
壹仔
@ningbbbbb
#毒檸王國
#拾壹黃金周
#香港寧仔
#香港壹仔
#一連五日完滿結束
