[1230隔夜超短劇評][無綫][不懂撒嬌的女人 第24集]
[讚]
Saving同Cherry嗰段好感動呀。先講明，我琴晚返到屋企已經遲咗，一開電視，係睇到Saving己經聽緊Cherry嘅voice msg，之後先再返睇頭半集。我諗諗吓，可能咁睇法會感動好多。因為我一開始已經知道Cherry要走，所以Saving教佢唱《陪着你走》嗰段睇到我好感動，而我又再諗返前幾集，原來唐詩詠演出一臉無奈冇乜表情係啱嘅，因為佢真係千頭萬緒在心中，不停問自己應該扮唔知Bobby嘅遺言呃住Saving，定係要講畀佢知呢？不過如果做得兩好啲，可能觀眾順住睇都可以感受得到Cherry有啲苦衷。
Saving擲銀仔嗰吓真係好緊張，佢自己決定緊自己感情結局都唔知，最慘係咁…另外，一吓解釋咗《陪着你走》嘅重要，亦都解決埋「ICQ初戀男友」嘅問題，亦都講埋Saving好耐之前做乜要無啦啦避走台南。舒服晒，雖然真係鋪排得太耐，冇留心嘅觀眾可能一早唔記得晒。
Annie同Oscar喺碼頭嗰段都幾好喎。Zoie嗰幕係佢嘅發揮戲，叫做做到。但畀我，我會畀多啲層次啦。例如係：(1) 喺樓下遙望蝦米仔時勁冷靜。(2) 聽到蝦米仔電話爆喊，(3)收線之後睇第一輪相，冷靜返少少。(4)睇第二輪相時再崩潰。可能會正好多喎。
[彈]
明明講緊Saving同Cherry，人哋好感動呀，做乜中間冇啦啦剪返去Gordon度，幾個鏡頭又返返去Saving，玩嘢呀？
另外，琴晚先問完大家記唔記得個十蚊銀，今集立即返出嚟。都係嗰句，個十蚊銀咁緊要，做埋主宰命運嘅角色，做乜唔畀多幾場戲託起佢？
Mall姐同Gordon嗰段都唔知做乜……大佬呀，Mall姐打定輸數，佢先會飛去美國睇吓自己啲雪咗嘅卵子，再去搵人捐精（有觀眾提醒，係喎佢應該係叫小白捐卵子或者借肚。點解咁憎佢都咁做？）。
一返到香港又會原諒返Gordon。係要有波折，係要有啲嘢喺結局推到高潮，都唔係咁搞呀？今集結尾佢哋又和好，係咪下集又分開過？
[認叻]
嗱，我都話Bobby係叫Saving一定要創業啦~~ 琴日投啱咗票嘅觀眾，獎品係今晚可以懷住勝利嘅心情，睇《不懂撒嬌的女人》，enjoy~
[演員表]
王浩信 飾 Saving / 唐詩詠 飾 Cherry / 張達倫 飾 Oscar / 譚凱琪 飾 Annie / 宣萱 飾 Mall姐 / 林文龍 飾 Gordon
#1230隔夜超短劇評 #無綫 #不懂撒嬌的女人 #TVB #王浩信 #唐詩詠 #張達倫 #譚凱琪 #宣萱 #林文龍 #陪着你走 #ICQ
