DIY Minions 快d一齊整啦！
首先我準備咗啲黃色嘅線網，跟住喺入面加咗個里，令佢唔好咁透同埋刮身，另外有一條過頸嘅黃色絲帶。
而下身嘅藍色紗，就會穿入去再勾返出嚟，打個結，定係度，就變咗條紗紗裙喇！
而 Minions 嘅眼耳口鼻就係用絨布整嘅，3蚊一塊好抵買，總共買咗兩塊，分別係黑色同白色，加埋只需 6 蚊，用嚟做心口個圖案。
跟住我用咗個圓形嘅奶粉罐「給」住絨布，畫好個圓形，沿住啲線剪返出嚟。
再用筆喺絨布上高畫個口同啲牙，剪出嚟，黐返上去就得。
而楊千嬅戴嗰個頭箍，原價係港幣 6,000 蚊，不過我整嘅呢個好平，因為我攞咗個舊黑色頭箍、一塊黑色網，同哥哥姐姐送畀 Keicy 嘅細細隻 Minions。
首先用將頭箍穿過一格格嘅網窿，跟住用熱溶膠槍將公仔黐喺個頭箍上高，只要三至五分鐘就做起呢個「楊千嬅頭箍」喇！咁啱屋企有啲藍色粒粒，加埋喺頭箍上面做裝飾。
至於個圓型眼鏡仲簡單，我攞咗屋企玩開嘅一副圓形膠眼鏡，跟用攞卷攞錫紙，剪開一條條長方形，好似摺星星紙咁樣，再圍住個鏡框就整好，前後唔駛兩分鐘搞掂！
所有嘢加埋條裙唔駛三十分鐘就整好喇！係咪好靚呢？^^
後記：
因為Kassy都話好鍾意都想要，所以我下星期會去買材料，再整過另一個款 Minions 嘅裙畀佢。
成條裙連配飾 100 蚊都唔駛，半個鐘內整好，真係花少少心思就整倒，最重要係好慳錢！因為喺舖頭買一條公主裙要幾百蚊，小朋友大得快，着得幾次唔係唔啱着就係唔中意，所以呢個親子玩意真係幾有意義，幾開心，又唔會同人撞衫，大家都試吓整吖！^^
#minions #小小兵 #小黃人 #miriamYeung #楊千嬅 #PiersAtkinson #迷你兵團 #DIY #親子活動
