//本Page Patreon經已開通，請訂閱支持本Page運作，謝謝！ 連結： https://bit.ly/2TvzIaF //
615除咗係梁義士墮樓犧牲嘅日子以外，同時亦係林鄭開記者會宣佈暫緩《逃犯條例》修訂嘅一日──唔知仲有幾多人記得，當日林鄭講到願意暫緩、其後再撤銷修訂嘅原因，就係由於唔想見倒612嘅衝擊再次發生。
之所以要反覆提醒大家，係因為香港人太容易淡忘歷史，除咗當日有「黃屍KOL」堅持同勇武衝擊無關，純粹係特朗普向特區政府施壓嘅成果以外，一年後嘅唔少人，竟然將呢次戰功記在69大遊行上面，咁樣落去再過多幾年，可能就會同民主黨走入中聯辦由賣港變成幫香港爭取民主一樣，被某班有人心巔倒是非黑白。
客觀睇番，如果當日林鄭講實啲撤回而唔係暫緩；五大訴求入面接納咗四項，包括唔將612衝擊稱呼為暴動（其實當日都係話暴動定義與否由律政司定義），放棄起訴被捕6位人士、成立一個實際上無乜追究權力，只會不了了之嘅「獨立」調查委員會，然後再將爭取真普選以「要向中央咨詢」為理由拖一拖，根本就唔會再往後咁多混亂發生，特區政府亦可以順理成章繼續溫水煮蛙。
掉番轉從抗爭角度睇黎，香港並無因為612嘅「階段性成功」而變得更好：中共強行立法《國安法》，變相就係《逃犯條例》加辣版。好多人因為之前街頭抗爭嘅慘重傷亡，同埋林鄭響宣佈撤回之後就再無任何讓步，於是香港人又開始諗番縮數：
飯民果邊就不停吹風35+，「投票就係最低成本嘅抗爭」，另一邊就猛鬧邊個上街邊個就係送頭，「坐定定等美國佬制裁就OK」，其實就同當日魚蛋革命之後一樣，當發現連磚都擲埋都改變唔今乜嘢，大家就變得鄉愿，唔係諗走佬就係諗點樣唔駛作任何犧牲之下作低成本「抗爭」減輕自己嘅罪疚感。
即係無人要你做啲乜嘢驚天動地嘅大事，但最低限度，捉少啲鬼得唔得？聽少啲「黃標KOL」果啲自我催眠投咗票當做咗嘢、多謝飯民論述得唔得？有人上街，唔好怕咩限聚令，最低限度去一個你自覺安全嘅地方聲援下得唔得？
響度我唔打算懷緬當日612有幾波瀾壯闊，點樣親歷呢個歷史轉捩點，所以特登避過咗唔寫當年今日嘅回顧；我亦唔會拎住梁義士嘅死走黎質問大家「對唔對得住手足」。但我想講嘅係，正正因為612有班人為香港犧牲，我地先擺脫自魚蛋革命以來嘅無力感；林鄭當日嘅退縮，正正代表勇武有用。即使我地今日面對共產黨瘋狂嘅反撲，情況好似比一年前更壞，但同樣亦代表咗共產黨已經被迫入窮巷，係全面攤牌前嘅最後黑暗。
1987年嘅612，列根總統向蘇聯總書記戈爾巴喬夫喊話，叫佢Tear down this wall，實際上果刻，根本無人想像過柏林圍牆真係會響兩年後倒塌，連帶蘇聯共產黨都隨之灰飛煙滅。卡特同列根，正好係一個溫吞同激進嘅對比，差別在於究竟甘於綏靖，定係決心將敵人視之為邪惡軸心──33年後嘅612意義並不在於五大訴求實踐咗幾多個，而在於我地願唔願意將抗爭之心延續落去，同政府攬炒落去。
