#新年並不需要快樂而是需要覺醒
如果你哋想聽一啲好開心好快樂好祝福嘅說話，對唔住！呢篇文冇！甚至你可能會覺得呢篇文放負...
但係呢篇文真係好真，而我又唔怕俾大家見到呢一個真實嘅自己。
其實今年自己有好多改變：轉咗工、將會搬屋，甚至第一次感受到好多好多人嘅幫助同埋愛...開心嘅好多，但係坦白講我真係真心講唔出一句：「新年快樂！」上年真係快樂咩？你覺得今年又真係會快樂咩？
跨年嘅時候，五月天同我哋過，佢地嗰句類似嘅意思係：
好慶幸我哋係同一個時代，黑暗嘅盡頭就會有光明。
對不起！太浪漫啦！以前可能我都有啲Feel，但係今年冇啦！上年每日都係充斥着荒謬嘅事，一個人幾浪漫都好都會慢慢變得實際，而我都承認自己已經唔係一個浪漫主義嘅人！
所以，對唔住！當你見到WhatsApp我同你地講「新年快樂！」嘅時候，坦白講都唔算係真心，只不過係唔想掃大家嘅興致，所以就copy and paste俾大家。其實每一個節日大家都係咁㗎啦！好忙碌咁樣去send一啲冇養分嘅祝福。
對於我來講，我寧願大家送上一啲有養分嘅問候同埋對話，我咁樣會開心好多，亦唔使咁流於形式主義。但係你啲問候可唔可以唔好節日嗰度做？因為我仲忙緊copy and paste...
其實呢種形式主義係成個香港都充斥着，包括運動期間嘅口號、贖罪券嘅消費等等。坦白講：
我今年所需要嘅唔係快樂而係覺醒。
我覺得我嘅覺醒未夠，口口聲聲說爭取自由民主，但係其實每個人包括我都未有犧牲或者付出嘅覺醒，其實我哋渴望嘅並唔係爭取自由同民主，而係我哋所擁有嘅權益可以假手於人或者因為天時、地利、人和等等嘅因素而自動實現。
自由民主係點樣出現㗎？就係人民做主！但係人民真係有做主嘅準備嗎？
人嘅盡頭就係醒覺。
係呀！人嘅盡頭唔係神啊！而係自己呀！因為你可以靠神都仲未係盡頭啊！上年大家覺得係盡頭咪？當大部份宗教都傾向某一種權力嘅時候，佢仲會保護你嗎？就算有神加持，人都唔該拎返啲志氣出嚟去承擔返自己應該要有嘅責任！
所有嘅祝福都唔係從天而降嘅，係要靠你本身嘅努力同運氣！係要自己爭取㗎！
我希望我新一年真係有一個覺醒嘅機會，上年同再上年係一個覺醒，令我變返一張白紙，由一個政治冷感嘅白癡，做返一張謙虛、唔抗拒承擔同埋肯學習嘅白紙。
我希望下年香港搵到方法贏之餘，亦都有個覺醒：問清楚自己係咪真係諗過會贏同埋想贏。
上年，我覺得香港人仲未準備好，希望今年香港人包括我自己真係會準備好，但係伴隨着嘅痛苦同埋恐懼係會倍大，咁香港人真係要好好去思考下自己真正嘅願望係啲乜嘢。
其實呢篇文我寫完之後，咪又係放完假乖乖地返工，但係如果能夠喺自己個平台，可以暢所欲言將自己想講嘅嘢講出嚟，係呢個世代其實已經係一種幸福。而我都好坦白承認我都係一個有口話人冇口話自己嘅香港人。
祝大家 新年覺醒！身心安康！
社工 Key
放緊假嘅香港人
#新年 #香港人 #新年香港人不快樂
圖：一個葬禮中遇見嘅小物件，每一年我哋講「新年快樂」嘅時候其實都係講緊我哋又埋葬左上一年，我親手將2020年埋葬，希望2021年我可以埋葬佢之餘，可以做得風光啲！
新年香港人不快樂 在 獨立媒體inmediahk.net - 香港民研 的推薦與評價
【香港民研：四成港人不快樂無新年願望人數創新高】 https://bit.ly/3HcyurW 香港民研共訪問了1017名市民。只有約兩成半市民滿意 過去一年發展，數值為2018年以來 ... ... <看更多>