我嘅職業係：NPC（下）
上集：https://bit.ly/2Nqq8a6
我想跟正義之劍一齊去闖盪江湖，而唔係佢得閒先嚟搵吓我，但我根本冇辦法離開酒館。
呢個時候，系統更新，出咗一個大型任務。
按照任務完成度排行，按排名畀豐厚嘅獎勵。
第一名，可以選擇一個NPC進行挑戰，挑戰成功後，NPC就會成為你嘅隨從，跟你闖蕩江湖。
一時間，所有玩家都對呢個任務議論紛紛。
「我要揀獨孤求敗！我早就想學玄鐵劍法……到時仲可以叫佢幫我打，唔駛自己郁手。」
「就算畀你做到第一名，你都打唔贏獨孤求敗啦。」
「我就會揀周芷若，有《九陰真經》又有倚天劍，有武功有秘笈，本身武功又唔係咁勁，容易打贏。」
「係喎，佢仲係超級靚女，帶出去都特別有面子。」
我好興奮咁講：「不如你去做呢個任務？你做咗第一名，就可以帶我走啦。」
「我？我連第一章主線都未做完喎，我會做到武林第一人？」正義之劍好猶豫。
「哎呀，唔試吓點會知啫。」我諗一諗：「反正玩家又唔會死，衰咗咪返嚟囉。」
第二晚，正義之劍嚟搵我，佢已經換咗一套衫，係殺死山賊頭領後獎勵嘅裝備。
正義之劍好內疚：「我知道佢冇罪，但我殺咗佢。」
「佢係NPC，呢個係佢注定嘅命運。」我安慰佢。
正義之劍狠狠咁點頭：「我最在乎嘅係你，為咗改變你嘅命運，我始終要……融入呢個江湖。」
為咗練武功、做任務，正義之劍離開咗呢個城市。
我好掛住佢。
酒館嘅玩家，會討論近排武林上有咩名人。
聽講，正義之劍最近聲名鵲起，拜入武當派，成為武當第三代弟子。
我好開心，武當係名門大派，正義之劍終於唔駛委屈自己，去做啲唔係咁「正義」嘅任務。
但時間一日一日咁過去，我聽到嘅消息愈嚟愈奇怪。
聽講，正義之劍行事亦正亦邪，為咗增進武功不擇手段，武當派嘅NPC對佢幾多不滿。
後來，佢得到血刀老祖嘅賞識，叛出武當派，成為血刀老祖嘅嫡傳弟子。
邪門功法最易速成，佢以一身血刀刀法，縱橫江湖，殺人無數。
我幾乎懷疑，呢啲消息係假嘅。
但我只係一個唔識武功嘅NPC，點會有人作假消息嚟呃我？
之後，正義之劍真係喺活動中拎到第一名。
我既感動又期待，等緊佢返嚟帶我走。
但我聽到嘅下一個消息，係正義之劍挑戰周芷若，將佢收為隨從，將《九陰真經》同倚天劍都收入囊中。
我呆咗。
好耐好耐之後，正義之劍帶住一班玩家嚟酒館，仲有一個好靚嘅NPC。
佢前呼後擁，所有人都爭相拍佢馬屁，佢自己都好享受咁。
我覺得，呢個人好陌生。
有個玩家指一指我：「劍幫主，嗰度有個NPC望住你，會唔會有咩隱藏任務？」
「一個小酒館嘅NPC，你期望佢有絕世武功，定神兵利器啊？」正義之劍淡淡然咁答。
嗰一刻，我個心好痛，同時又有幾分放鬆。
我終於唔駛再為呢個人牽腸掛肚，因為佢已經變成一個普通嘅玩家，只追求更強大嘅武功同更多嘅榮譽，將NPC當成利益嘅來源。
我忽然記起，我曾經笑過佢傻。
依加佢唔傻啦，但我都唔再掛住佢啦。
每個女人，都想男人進步，想男人為自己改變。
但佢進步好多、變化好大，或者會唔小心改變埋……你最唔想佢改變嘅嘢。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我嘅職業係NPC #我嘅職業係
