［第三餐］［禮失求諸野］呢個正嘢！埃汾認證！赤峰街「共樂」，蔣雅交間「心地日常」（已執）對面，都有啲名氣，好似係香港人開，但對我嚟講煮得好唔好食先重點。（內文價錢台幣）
1. 以前都去過幾次，今日膽粗粗叫外賣UBEREAT。第一次叫「五香肉丁餐肉炒蛋一丁」，半個鐘先畀佢cut我單！頂丫，再試多次，今次有反應，話我知賣晒。咁當然我唔會麥兜到叫「五香肉丁餐肉煎蛋一丁」。就咁叫餐蛋一丁，加杯凍奶茶。
2. 港仔嘢就好多地方都有得叫，但好食先難。首先杯凍奶茶係對辦嘅（連香港都好多麻麻地，當然我個人口味）。「不過150！」「想平嘅自己飲水」（其實房間送咗24支 600ml水）
3. 更重要係，個一丁係好食嘅！講真，好食過香港八九成舖頭。當然個人口味啦。
4. 應該留意到，個湯係叫佢另上嘅。「咁呢個當然係叫過外賣嘅常識」「亦因為咁我好少叫外賣」「不過而家冇得揀」。但，就算你打電話叫，好多舖頭都未必記得。咁你在app上 remark 更加係聽天由命，正如我懷疑你在酒店入住啲「特別要求」話 「我想要陀地」都冇人理你的。
5. 咁十分難得地，我在外賣app落嘅remark，佢居然睇到喎。有另上喎！十分重要！仲要啲湯係熱的！（咁當然，唔熱我都有微波爐，都話好重要）
6. 十分滿足的一餐。「不過如果有多啲小食仲好」（其實係有，不過咖喱魚蛋好似160一份，仲要好多）
7. 又，我一直都話去台灣開香港茶餐廳應有得諗（＊）。個原因係，好多都相當難食，賣幾貴，但依然好多人！例子係「萬芳」（屯門元朗大埔有），香港不錯，嚟到台灣就相當難食—而佢收返香港嘅價！但依然好Q多人
8. 咁我估，你搵啲好啲嘅師傅，整返香港嘅水平，應該好掂。不過個盲點當然係：我地覺得好食，唔等於台灣人覺得好食。仲有各種文化都唔同，不能直接相比。
9. 你一方面話香港租貴，但啲舖頭交得起，總有原因。首先就香港人好有錢，都話人工係台灣四倍—我知，樓貴租貴，但台北樓價肯定唔止香港四份一。我冇乜見邊個香港人嚟到台灣洗費可以係香港四份一，因為香港人真係好撚富貴的。你食啲嘢，好多台灣人唔會食。第二，人流多，你自己開過餐廳就知，香港你去到好濕鳩偏遠嘅區，夜晚都可以做好多生意，台灣另一回事，台北都只係某啲區，好多區夜晚就收檔。仲有第三，餐廳特別係，台灣人係會一杯嘢飲坐你全日的。香港就真係面斥不雅，唔使舖頭設規矩，你自己都唔好意思。咁又係嗰句，文化唔同，冇話啱定唔啱，但台灣人真係一杯嘢飲坐你全日—而除咗好少部份名店，好多都有得你—反正又唔係多客（返返去第二點）。其實大都市以外好多地方都係咁，嗰時我在黑山（歐洲呀）一杯啤酒睇足三場波，侍應仲坐低同我吹水。
10. 咁當然，呢餐唔平啦，呢度個麵200，奶茶就150。夾埋350。差不多港紙成舊水（台幣呢期新高了）。「想平嘅食酒店餐」（其實都唔平）。但，對自己好啲嘛，唔通食40魯肉飯咩（台北應該難啲搵到）
11. 另外，你都留意到，麵係香港價，但奶茶貴幾倍。又要講文化不同，台灣一來唔興茶餐（邊撚有香港人咁富貴咁大壓力，同埋香港人食無定時），二來唔興餐飲。所以凍飲加幾蚊呢啲唔係老奉的，我呢杯凍飲就150。而台灣人好多自己飲水算。
12. 亦都返返頭先個問題，台灣人係會一杯嘢飲坐全日（再講一次，只係文化不同，冇話乜）。所以你不能香港咁十幾廿蚊港紙杯奶茶。所以咪要150一杯。「有啲友仲預期你可以免費續杯」（即係無限添飲）
13. 而在台灣呢，「最低消費」或者「用餐時間限幾多個鐘」呢啲，台北外都幾少見。即使在台北亦往往畀當地人屌（久而久之就變晒遊客舖）。況且啲最低用餐時間往往都幾文明，好似至少都兩個鐘，唔會香港咁「五輪真弓」（＊＊）
（＊）事實亦好多人咁做，台灣香港人三寶，文青café，茶餐廳，燒味舖。
（＊＊）費事搵舊文，「五輪真弓」係日本老歌手，但在香港餐飲業嚟講，係指一晚做五輪生意。又，年紀大嘅知，譚詠麟嘅《雨絲情愁》（＊＊＊）《忘不了你》都係改編佢。但最出名嘅作品，係，《小鳳姐》。但原曲其實係情歌，不見得十分喜慶。所以我一路懷疑咩Spotify呀Apple Music呀啲睇聽歌分析心情有幾準，同一首歌填唔同詞就可以係唔同意思。「但你打死我我都覺得首歌係熱烈地彈琴熱烈地唱」
（＊＊＊）都係要講多次，呢首《雨絲情愁》，原曲叫做"リバイバル"。當年嘅我同識啲日文嘅師傅Coconut Tsang，研究咗好耐，都唔知咩係咩意思。答案，Ribaibaru，即係Revival。都真係要好有想像力先估到。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
月頭訂最抵，Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已800人訂！（https://bityl.co/4Y0h）
#ivanliresearch #台北隔離十四天 1/14
日本老歌手 在 日本老歌精選-08 - YouTube 的推薦與評價
日本老歌 精選-08. 198K views · 6 months ago ...more ... Comments23. 曹蔡鳳嬌. 日文老歌真的太好聽了 ！讚 . ... <看更多>