我嘅職業係：白狐俠（下）
上集：http://bit.do/eJkZ4
終於有一晚，我見到大狐身上有血跡。
原來，大狐俾獵人射中咗，好彩無中要害，先走得甩。
「嚟唔切啦，再咁落去，我哋全族都會死晒。」
小狐突然哀求我：「你可唔可以親身過嚟，見吓我哋？」
吓，我雖然自命「白狐俠」，但我要飛去北冰洋搵白狐？
我本來唔同意，但係幾日後，小狐就消失咗。
大狐同我講，小狐被獵人捉走，應該已經變成一張白狐皮。
大狐好絕望咁同我道別：「就算逃過獵人，食物都愈嚟愈少，我諗，我都無咩機會再托夢畀你啦。」
嗰一刻，我全身熱血上湧，我決定買機票遠行。
我袋住成個背囊嘅食物，著住厚厚嘅衫，飛去北邊。
最慘嘅係，我唔熟路，白狐又無電話，只可以靠托夢聯繫。
我跌跌撞撞，差啲凍死，經歷無數苦楚，終於去到夢中嘅冰洞，面對大狐。
嗰一刻，我個心反而安定落嚟。
我見到佢哋冰洞嗰塊神鏡，神鏡除咗「入夢術」外，都有翻譯功能，所以我先同佢哋溝通到。
但係一離開神鏡，白狐就無辦法再講人話。
我將食物分畀白狐一族，喺冰洞內，同佢哋傾咗好耐。
佢哋都明白，我人微言輕，實在有心無力。
就算我全心投入保育工作，到有成效嗰陣，呢班白狐都死晒。
最後，我哋商量出一個對策，就係我收埋啲小白狐，帶佢哋走。
去到機場，小白狐多數會俾檢疫隊搵出嚟，白狐係保護動物，會收去動物園。
「雖然以後都見佢哋唔到，至少佢哋可以好好活下去，傳承血脈。」
大狐含淚將兩隻初生小白狐，放入我個背囊度。
我見到大狐身上嘅槍傷，都覺得幾心酸。
我有諗過，違法攜帶受保護動物，會唔會要坐監呢？
唉，不過就算要坐幾年監，都當係為佢哋做最後一件事啦。
大狐亦應承我，只要我做到呢件事，就唔再托夢畀我。
我帶住小白狐走出森林，點知行咗無幾耐，就俾一班持槍嘅外國人圍住。
佢哋帶住獵狗，逼我打開背囊，拎走咗兩隻小白狐。
我估，佢哋就係捕殺白狐嗰班獵人！
我憤怒、傷心，但喺槍嘅威脅下，我咩都做唔到。
好彩佢哋無諗住殺人，搶走小白狐後，就放走我。
呢個時候，我有兩個選擇，一係番屋企，當我已經完成任務，反正大狐唔會知真相；
二係番去話畀白狐族知，獵人已經嚟到附近，叫佢哋搬家。
我身為「白狐俠」，天下咁多人，佢哋只可以托夢畀我，
我當然唔可以背棄佢哋，哪怕要令佢哋失望，我都要儘量幫佢哋。
我跑番去個冰洞度，已經係深夜。
我聽到裡面有聲，係小狐講緊......人話？
小狐唔係俾獵人捉走咗咩？我都走咗，佢仲同邊個講人話？
我偷偷望入去，大小二狐對住塊鏡講嘢，好明顯係托緊夢。
大狐對住嗰個人講：「世間上咁多人類，我哋偏偏搵到你，你一定係我哋嘅救星！」
咪住，佢當日都係咁同我講。
我聽到，大狐問咗好多嘢，似乎佢今次搵到個有錢人，可以更有效地幫到佢。
托夢完成後，佢哋好似未關塊「入夢神鏡」，塊鏡仲翻譯緊人話。
唔止咁，我望多兩眼，居然發現，仲有幾隻白狐喺個冰洞度，都對著塊鏡講緊嘢。
小狐問：「點解我哋要向咁多人托夢嘅？」
大狐嘆氣：「無幾多個傻仔會真係因為一個夢，嚟呢度幫我哋，成功率大概得0.5%。托多一個人，就多一個機會。」
唉，原來兩隻白狐呃我，塊鏡雖然係隨機托夢，但佢哋可以向好多人托夢，分明係集團式網絡騙案。
點解我會為一個夢，遠走冰天雪地？
枉我仲沾沾自喜，自命「白狐俠」。
所有被騙嘅人，都曾經以為，自己係好特別、被選中嗰一個，
但總有一日會發現，自己只係漁翁撒網嘅其中一條魚。
－完－
將專頁設定為「搶先看」/ "See first"，最新故仔馬上睇！
新書《買樓結婚超能力》現正有售，
係Facebook故仔嘅精選紀念裝，亦有從未面世嘅彩蛋故仔。
詳情可點擊這裡：https://goo.gl/rGbwhi
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我嘅職業係白狐俠
明係集團 在 AXMAN... - 單車傳騎Ride With Passion 的推薦與評價
今天來到AXMAN的總部也就是明係集團，AXMAN 2017新車發表，最大的亮點是多了2位新同學1、Azure Q1 - 適合身材比較嬌小騎者2、Enduro C1 - 適合長途及衝刺的用途， ... ... <看更多>