今日Urban Touch麗風鞋業公司PAPA Shoes
快要七十歲o既葉Uncle自七十年代入行，做過魚網拖鞋、涼鞋、密面鞋、按摩鞋、橡筋鞋，無專登去學做皮鞋師傅，但經過咁多年，乜鞋都識做lu！而家one man band幫人度腳訂造鞋。
佢入行第一日，就雄心壯志要開間鞋廠，後尾由屋企山寨廠做到荃灣山邊木屋廠，點知木屋區大火，間廠都燒埋。唔緊要，由頭嚟過，又喺屋企做鞋，自己開van仔去搵客賣埋鞋。七十年代中，獲得安置，喺晉昇工廠大廈設廠，隨住香港製造業興起，葉Uncle租三個工廈單位嚟做，間廠都有二十個員工，又接過韓國大order，做過萬對鞋。九十年代，工業北移，佢都北上過o架，頂咗一間大廠嚟做「按摩鞋」出口去歐美國家，有百名工人，不過佢都話自己做咗「老襯」。「按摩鞋」o既生意因為代理公司結業，葉Uncle再接唔到order...唯有放棄呢間大廠。
返到香港，葉Uncle去返晉昇工廠大廈小小o既單位，同幾個員工一齊做「橡筋鞋」即係女裝有橡筋邊o既婆仔鞋，非常受歡迎！做咗十年橡筋鞋左右，葉Uncle唔再追求「量」，而家幫客人度腳訂造鞋。可以直接同客人溝通，令佢有好大滿足感。最難忘幫一位坐輪椅，雙腳腫到買唔到鞋着o既老伯伯做鞋。老伯伯本來只可以着對襪然後着拖鞋，但去到冬天，對腳會好凍，老伯伯o既女就託葉Uncle幫忙造鞋，推住爸爸嚟到工廈度腳。葉Uncle趕工喺冬天嚟臨前做好對鞋畀老伯伯，佢收到時非常開心。
葉Uncle感受到從未有過o既滿足感，造鞋呢回事，原來可以幫到人，又可以令客人好開心o架喎！同一工作做咗四十年，而家呢個階段係最開心！
PAPA Shoes
地址：葵芳葵福路85號晉昇工廠大厦1050室 (請先電話預約）
查詢：24099117
