【天父聽禱告】
呢篇文章有宗教成份，大家唔介意請睇落去！
聽日要帶媽回院舍了！假如佢情況穩定 ，冇突發意外或病情惡化，兩星期後我會再帶佢返嚟堡壘，同佢以及同一日生日嘅細妹一齊慶祝生日！
最近，我祈禱嘅次數越嚟越頻密！因為我真係好驚！好驚媽承受更多痛苦！好驚媽隨時同我永別！
2018年9月中，媽確診第二次中風，正係我攞堡壘鎖匙嘅日子；公立醫院醫生、私家腦科醫生、針灸中醫師都唔敢同我講，佢，仲有出院機會！
當時我邊喊邊祈禱邊訂購醫療器材邊執拾堡壘，我希望天父可憐我，俾我抱媽返堡壘，兌現我承諾咗十三年「帶佢返屋企」嘅承諾！
結果，喺醫院留醫四十天，我成功爭取帶媽出院，直接抱佢返堡壘；細妹磅住我，住咗兩星期！
人總係貪心，試得一次，自然想試第二次！由於媽病情嚴重，我需同時間競賽，所以決定申請無薪假，再抱媽返堡壘住兩星期；唔同嘅係，今次開始，只得我一個(細妹只間中支援)！
2019年二月中，媽第三次中風！
2019年三月尾，申請第二次無薪假，第五次返堡壘！
返嚟十三日，噚日第一次有機會帶媽落街，只因自從媽第二次中風，我再冇能力獨自抱佢起身！
大家見到啲相好似好靚，但其實我係喺近百幅中挑選出嚟！
噚日下晝，天使醫生嚟探媽，佢認同媽嘅腫瘤有變大、皮膚有變薄跡象！
假如媽嘅嘅腫瘤破損，會有幾痛？我又有能力幫佢洗傷口嗎？
媽最近血糖好高，徘徊14-16度，我一日幫佢篤八次手指，既減奶又加胰島素，但依然冇改善！
仲有個小意外發生喺今早凌晨……
話說凌晨12：20，我幫媽上第五餐奶，點知拖住佢隻手喺床邊恰著咗！
凌晨1：40扎醒，即刻倒水俾佢，點知條胃喉已經塞咗！
我用針筒注水打入胃喉多次，但都通唔到！仲攪到媽枕頭、床單、地下全部濕哂！
我好慌張！唯有不停祈禱，向天父求救！
感謝天父聽我禱告，第七次，通了！
凌晨4：00，我抱住內疚同不安入睡……
直到宜家，中午12：30，我幫媽上第二餐奶時，同大家分享！
希望天父能繼續聽我禱告，繼續看顧肥媽，奉主耶穌名祈求～阿們！
